चेपाङ समुदायपाखें गोरखा जिल्लां स्नातकोत्तरया उपाधि कायेत ताःलाम्ह गण्डकी गाउँपालिका–१ मकैसिङया रमिला चेपाङयात हंगु दु। शनिबाः इच्छाकामना न्यूज डटकमया न्हय्क्वःगू बुसादँया लसताय् इच्छाकामना–३ चुम्लिङतारय् वय्कःयात हंगु खः।

बागमती प्रदेशया वन व वातावरणमन्त्री कृष्णप्रसाद सिलवालं चेपाङयात हनापौ लःल्हानादीगु खः। मन्त्री सिलवालं सीमान्तकृत समुदायतय् मिसापिनिगु निंतिं प्रमिला छम्ह प्रेरणाया स्रोत जूवंगु दु धयादिल। विसं २०४८ कार्तिक ७ गते बेनिघाट–रोराङ गाउँपालिका–६ धादिङय् जन्मे जुयादीम्हः रमिला इहिपाः याना २०६६ सालय् गोरखाया गण्डकी गाउँपालिका–१ झायादीगु खः।

स्नातकोत्तर तगिं (एमएड) क्वचायेकादीम्ह वय्कः चेपाङ समुदायपाखें जिल्लाय् हे न्हापांम्हः जुयादीगु दु। रमिला २०७६ सालनिसें शिक्षण पेशाय् आबद्ध जुया च्वनादीगु दु। (रासस)

सङ्घीय गणतन्त्र जर्मनीया निंतिं नेपाःया आवासीय राजदूत डा शैल रूपाखेतीं जर्मनीया राष्ट्रपति फ्र्याङ्क वाल्टर स्टेनमायरयात थःगु ओहोदाया दसिपौ पेस यानादीगु दु।

राष्ट्रपति भवनय् वंगु बुधबाः जूगु ज्याझ्वलय् वय्कलं थःगु ओहोदाया दसिपौ पेस यानादीगु जर्मनीया बर्लिनय् च्वंगु नेपाःया राजदूतावासं धाःगु दु।दसिपौ पेस याये धुंकाः राष्ट्रपतिलिसे नाप लानाः जूगु बःचा हाकःगु खँल्हाबल्हाया झ्वलय् राजदूत डा रूपाखेतीं नेपाःया थौंकन्हय्या राजनीतिक घटनाक्रम, भूराजनीति व नेपाःया आःया प्राथमिकता तय्गु बारे ध्वाथुइकादीगु खः।

उगु झ्वलय् जर्मनीया राष्ट्रपति स्टेनमायरं नेपालया राष्ट्रपति रामचन्द्र पौडेलयात जर्मनीइ थ्व हे दँय् नाप लाःगु सन्दर्भ व निगुलिं देय्दथुइया आः दयाच्वंगु सम्बन्धबारे खँ ल्हानादीगु खः।उगु ज्याझ्वलय् जर्मनीया उच्च पदस्थ अधिकारीतलिसें नेपाःया राजदूतावास बर्लिनया अधिकारी नं च्वनादीगु खः ।(रासस) 

प्रधानमन्त्री केपी शर्मा ओली युद्ध व अशान्तिपाखें दिक्क जुयाच्वंगु हलिंयात शान्तिमय दयेकेत योग व ध्यानयात जीवन पद्धतिकथं नालेमाःगु धयादीगु दु।

हलिं ध्यान दिवस, २०८१ या झ्वलय् प्रधानमन्त्री व मन्त्रिपरिषदया ज्याकुथिपाखें थौं सैनिक मञ्च–टुँडिखेलय् जूगु ज्याझ्वःयात संबोधन यानादिसें प्रधानमन्त्री ओलीं ल्वाभःयात ल्वाभः हे छ्यलाः हलिमय् शान्ति मजुइगुलिं सकारात्मक बिचाः ज्वनाः ध्यान व योगयात नालेत इनाप यानादीगु खः।

प्रधानमन्त्री ओलीं सभ्य संस्कृति व सकारात्मक चिन्तनया नापं शारीरिक व मानसिक ध्यानयात मद्दिक न्ह्याकेमाःगु व थुगु कथंया ज्ञांयात विद्यालय व न्हूगु पुस्तायात लःल्हाये माःगु धयादिल। ध्यान प्राकृतिक ढङ्गं सचेत मानव जातिं छ्यःगु व सभ्यताया मुहान जूगु धयादिसें प्रधानमन्त्री ओलीं नेपाः देय्यात स्वस्थ दयेकेगु सरकारया सङ्कल्प पूवंकेत नं ध्यान व योगयात मद्दिक न्ह्याकेमाःगु जूगु धयादिल।

“मद्दिक पाय् िछगु नँसा त्वँसा नयाः झीसं आरोग्य जीवन हनेमाः। फयांफक्व बिरामी जुयाः वासः यायेत अस्पताल वने म्वालेमा धइगु बिचाः तयेमाः।

स्वस्थ्य व शान्तिमय हलिं दयेकेत झीपिं सकलें जुइमाः”, प्रधानमन्त्री ओलीं धयादिल, “सरकारपाखें ध्यान व योगया निंतिं यायेमाःगु ज्याय् जिगु ध्यान वंगु दु। स्वार्थीपन त्वताः एकाग्रताय् ध्यान यायेगु दक्व समस्यायात ज्यंकेगु उपाय नं खः।”

उगु झ्वलय् स्वामी आनन्द अरुण, सन्तोष केडिया व एलपी भानु शर्मां ध्यानया थी थी अभ्यास याकादीगु खः।

कन्हय्निसें सञ्चार व मिडियासम्बन्धी सम्मेलन २०२४ न्ह्यायेत्यंगु दु। त्रिभुवन विश्वविद्यालय पत्रकारिता नापं आमसञ्चार केन्द्रीय विभाग व सेन्टर फर मिडिया रिसर्च नेपाःया ग्वसालय् निन्हुयंक सम्मेलन जुइत्यंगु खः। सम्मेलन विभागया क्यामेरा भवन बल्खुइ जुइ।

सम्मेलनय् पत्रकारिता, मिडिया व सञ्चारलिसे स्वापू दूगु छगू दर्जन स्वयां अप्वः अनुसन्धान क्यनेगु विभागं धाःगु दु। विभागया प्रमुख डा कुन्दन अर्यालं पत्रकारिता व सञ्चार ख्यलय् अध्ययन व अनुसन्धानयात हःपा बिइत, सञ्चार व पत्रकारिता ख्यःया थी थी विषयकय् खँल्हाबल्हाया संस्कृतिया विकास, न्हून्हूगु प्रविधिं हःगु ह्वःतातय्गु सदुपयोग व हाथ्यायात बुकेत ग्वाहालि जुइगु तातुनां सम्मेलन न्ह्याकेत्यंगु धयादिल।

सम्मेलनय् भारत, बङ्गलादेश व श्रीलङ्काया विज्ञतय्सं प्रस्तुति न्ह्यब्वइ। प्राध्यापक पी खरेलया ‘बहुच्यालन र दर्शकको खण्डीकरण’ विषयकय् विशेष प्रस्तुति न्ह्यब्वयेत्यंगु दु।

थुगु सम्मेलनय् कृत्रिम बौद्धिकता युगय् मिथ्या सूचं विरुद्धया ल्वापु, मिडिया व भ्रष्टाचार, पत्रकारिताया भविष्य, मिडिया व राज्यया सम्बन्ध, पत्रकारिताया दिगोपनाबारे सम्बन्धित ख्यःया विज्ञ, पत्रकार व अनुसन्धानकर्ता दथुइ ब्यागलं ब्यागलं खँल्हाबल्हा यायेगु ज्याझ्वः दु। (रासस)

राष्ट्रियसभाया नायः नारायणप्रसाद दाहालं मातृभूमिया गौरव यानादिसें देय् विकासया अभियानय् जुइत युवा पुस्तातय्त इनाप यानादीगु दु।

रैथाने एग्री प्रोडक्स नेपालपाखें थौं दरबारमार्गय् न्ह्याकूगु रैथाने उत्पादन हाटबजार मेलाया अवलोकन यानादिसें वय्कलं नेपालय् स्रोतसाधन व जनशक्ति माक्व दूगुलिं उकियात फयांफक्व छ्यले माःगु धयादिल। नायः दाहालं थथे धयादिल, “मानव चोलाया दकसिबे महत्वपूर्ण पक्ष धइगु श्रम खः, नेपालय् माक्व स्रोतसाधन व जनशक्ति दु, थजाःगु मूवंगु जनशक्तित श्रम यायेत विदेश वनाच्वंगु अवस्था दु, इमित गथे यानाः देय् दुने हे छ्यलेगु धइगु आःया हाथ्या खः।

थुकिइ बिचाः यायेमाः।” रैथाने एग्री प्रोडक्ट नेपाःया नायः तिलक ढकालं नेपाःया खाद्यान्नया विविधता बचे यायेत नापं दैनिक उपभोग्य ज्वलंपाखे आत्मनिर्भर जुइगु प्रेरणा बिइत दरबारमार्गय् शनिबाः हाटबजार न्ह्याकाः वयाच्वनागु धयादिल। हाटबजारय् वइगु खाद्यन्नलिसेंया उपभोग्य ज्वलं विषादीमुक्त, स्वच्छ लकसय् उत्पादन जूगुलिं मनूतय्त स्वस्थ्यकर जूगु वय्कःया धापू दु।

उगु संस्थां विसं २०८० साउन १ गतेनिसें हरेक शनिबाः सुथसिया ७ निसें १२ ता ईतक हाटबजाः न्ह्याका वयाच्वंगु खः। हाटबजारय् मार्सी वाया जाकि, कःनि, चिनो, कागुनो, मुस्या, कोदो, तछ्व, सतिवा, लट्टे, फापर, किबी, लौका, न्हाकं, फसि, च्या, कस्ति, दुरुया ज्वलं नापं तपुलि व गलबन्दीथेंजाःगु ५० गू स्वयां अप्वः जिल्लाया रैथाने उत्पादन मिइत हयातःगु दु।

हाटबजारय् न्हियान्हिथं थ्यंमथ्यं न्हय्सः उपभोक्तातय्सं अवलोकन यानाः माःगु ज्वलंत न्यानाः यंकीगु नापं उपभोक्ता व उत्पादनकर्तादथुइ अनुभव कालबिल यायेगु ज्यातकं जुयावयाच्वंगु नायः ढकालं कनादिल ।