सरकारं गुठीसम्बन्धी आःयागु संरचना व कानुनयात पुनरावलोकन याना संविधान कथं गुुठीसम्बन्धी ऐन हयेगु गृहकार्य यानाच्वंगु दु।

देयन्यक गुठीयात निर्देशित याइगु गुठी संस्थान ऐन २०३३ न थौकन्हयः माःगु व वयागु अपेक्षायात सम्बोधन याये मफगु धका सर्वसाधारण व सम्बद्ध पक्षं ताः ईनिसे असन्तुष्टि याना च्वंगुयात ध्यानय् तया गुठीसम्बन्धी न्हुगु ऐन हयेगु गृहकार्य न्ह्याके त्यनागु धका भूमि व्यवस्था, सहकारी लिसे गरिबी निवारणमन्त्री बलराम अधिकारीं धयादीगु दु।

मन्त्रालयं मन्त्रीस्तरीय निर्णयपाखे गुठीसम्बन्धी सरोकारवालानाप सुझाव कायेगु निति कानुनया मस्यौदा तयार यायेत संस्थानया केन्द्रीय प्रशासक किरण शाक्यया संयोजकत्वय् न्याम्हेसिगु कार्यदल गठन याःगु खः। भूमि व्यवस्था, सहकारी लिसे गरिबी निवारण मन्त्रालय काजीबहादुर विष्ट, नापी विभागया प्रमुख नापी अधिकृत मग्नु दत्त, दीपकराज पाठक, गुठी संस्थानया कानुन अधिकृत जनक पोखरेल दुजः दुगु कार्यदल गठन याःगु खः।

कार्यदलयात नेपाःया संविधान यागु धारा २९० कथं गुठीया मूलभूत मान्यतायात छु न असर मलाइगु कथथं गुठी सम्पत्तिया संरक्षण नाप उपयोग, गुठीया मौलिकताया संरक्षण यायेगु मौजुदा कानुनय् याये माःगु खाकानाप न्हुगु कानुनया मस्यौदा पेस यायेत जिम्मेवारी बिःगु खः।

कार्यदलयात बिगु कार्यक्षेत्र सतय् धयातःगु दु– ‘सर्वोच्च अदालतपाखे प्रतिपादित कानुनी सिद्धान्ततक आधारय् गुठीसम्बन्धी विद्यमान कानुनी व्यवस्थाय् ई कथं हिलेमाःगु खनेदुगुलि गुठीसम्बन्धी विद्यमान व्यवस्था, प्रथा, परम्परा व गुठी संस्कृतिया संरक्षण व प्रवद्र्धन यायेमाःगु आःया कानुनय् यायेमाःगु परिमार्जनया खाका नापं न्हुगु गुठी कानुनया मस्यौदा तयार यायेत मन्त्रालययात लच्छि दुने पेश यायेमाः।’ कार्यदलं आःयागु गुठीसम्बन्धी कानुनय् दुगु कानुनी, सांस्कृतिक लिसे परम्परागत व्यवस्था व गुठी व्यवस्थापन सम्बन्धय् अदालतपाखे जुगु आदेश/निर्णय व गुठी व्यवस्थापन यायेत थ्व स्वया न्ह्यः गठन जुगु आयोग, समिति नापंं कार्यदलया प्रतिवेदनय् दुगु परिभाषित व्यवस्थायात अध्ययन यासे केन्द्रबिन्दइ तयेमाः धका धयातःगु दु।

अथेहे स्वनिगःया देगः, गुम्बाया व्यवस्थापन सम्बन्धय् गुठीसम्बन्धी आःयागु व्यवस्था जुयाच्वंगु अध्ययन याना स्वनिगःया हकय् मःगु कानुनी व्यवस्था यायेत बिस्कं परिच्छेदया व्यवस्था यायेमाः धका धयातःगु दु। स्वनिगः पिनेया मल्लिका अर्जुन, उग्रतारा, स्वर्गद्वारी, हलेसी, मटिहानी, रामजानकी द्यःया थाय् व्यवस्थापन यायेत देगःया नामय् दुगु जग्गानापं चल अचल सम्पत्तिया व्यवस्थापन सम्बन्धी माःगु कानुनी व्यवस्था यायेत धयातःगु दु। अथेहे थीथी द्यः थाय् दुगु गुठीया अचल सम्पत्ति विशेष याना जग्गा न्हापानिसे च्वना च्वपि मोही किसानतय्गु मोहीसम्बन्धी समस्यायात माःगु कथं व्यवस्थापन यायेत माःगु कानुनी प्रबन्ध यायेगु विषययात केन्द्रबिन्दुइ तया मस्यौदा तयार यायेत धयातःगु दु।

भूमि व्यवस्था, सहकारी लिसे गरिबी निवारण मन्त्री बलराम अधिकारी कानुनसम्बन्धी न्हुगु कानुन मस्यौदा तयार यायेगु ज्यायात सरकारं तधःगु प्राथमिकताय् तयागु दु। ‘म्हिगः गुठी विधेयकय् जुगु कमि कमजोरी छु छु खः। थौ छु छु समस्या दु। प्रचलित कानुनी प्रावधानय् छु छु दु। उकियात ध्यानय् तया न्हुगु कथं कानुनया मस्यौदा दयकेत मन्त्रालय गम्भीर दु’ धका मन्त्री अधिकारीं धयादीगु खः।

कार्यदलया संयोजक नाप गुठी संस्थानया प्रशासक किरण शाक्यं २०७५ सालया गुठीसम्बन्धी विधेयकय् छु छु बुँदाय् सरोकारवालातय्गु असहमति दुगु खः, आः छु यायेमाःगु दु, निजी गुठीयात गयेयाना व्यवस्थित यायेगु विषय सरोकारवालातय् नाप च्वना कानुनया मस्यौदा तयार यायेगु प्रतिबद्धता प्वकादीगु खः। उगु सहलह जुगु मुज्याय् नेवाः तयेगु थीथी खलः पुचः नाप बिशिष्ट मनू तयेगु ब्बति दुगु खः।

बौद्ध धर्मया ख्यलय् दानया तःधंगु महत्व दयाच्वंगुयात विशेष प्राथमिकता बिया येँया शाक्य महाविहार संघया ग्वसालय् पंचबुद्धया प्रतिककथं झिगु बहाःया न्याम्ह श्रद्धेय स्थविर थाय्पा जूपिन्त येँया श्री गणेश व श्री भैरवया समुपस्थितिइ कोहिति बहाः (कीर्तिपुण्य महाविहार) य् पंचदान ज्याझ्वः क्वचाःगु दु।

उगु पन्चदान ज्याझ्वलय् माननीय शैलेन्द्र बज्राचार्य बागमति प्रदेशया संस्कृति लिसे सहकारी विकास मन्त्री नियुक्त जूगुलि संघपाखें भिन्तुना देछागु खः। मङ्गलवाः ल्हुति पुन्हि कुन्हु क्वःहिति बहालय् विराजमान जुया बिज्याम्ह क्वाःपाद्यः समक्ष पुजायासे पंचदान ज्याझ्वः क्वचाःगु दु। उगु ज्याझ्वलय् लायकूया श्री कुमारीयात दान प्रदानया झ्वलय् भाग तयाः वसपोलयात तकं सम्मान यायेगु ज्या याःगु खः।

श्री गणेश व श्री भैरवजुपिन्त सिन्हः तिका दान प्रदान यायगु ज्या न्ह्याकूगु खः। येँ देया शाक्यपिं वन्दे लुइगु (प्रवज्याभिषेक) बिइगु झिगू बहाःया न्याम्ह न्याम्ह स्थविर याना मुक्कं न्ययम्ह (५०) श्रद्धेय थाय्पा वा बहाःया प्रतिनिधिपिन्त बज्रयानी विधि विधानकथं पंज्ररां विइगु ज्या याःगु खः।

शाक्य महाविहार संघया नायः शुभकाजी शाक्य व मूछ्याञ्जे संघरत्न शाक्य लगायतया कार्य समितिया सक्रियताय् थुगु ज्याझ्वः सम्पन्न जूगु खः।

महिला, बालबालिका लिसे ज्येष्ठ नागरिक मन्त्री भगबती चौधरीं मिसापि लगानीकतातय्त प्रोत्साहन यायेमाः धका धयादीगु दु।

स्वतन्त्र ऊर्जा उत्पादकतयेगु संस्था, नेपाल (इप्पान) या ग्वसालय् थौ हिमालयन हाइड्रो एक्स्पो अन्तर्गत ऊर्जा ख्यलय् बातावरण, सामाजिक व सुशासन लिसे लैँगिक समताय् एकीकरण विषयय् अथे मन्त्री चौधरीं धयादीगु खः।

नेपालय् ताः ईनिसे मिसा सशक्तीकरणया निति ज्या जुया वयाच्वंगु धका धयादीसे वयकलं धयादीगु दु, मिसापि मेमेगु ख्यलय् न अप्पोया वयाच्वंगु दु धका धयादीगु दु। संविधान जारी जुइ धुका राजनीतिक ख्यलय् ३३ प्रतिशत मिसापिनिगु सहभागिता सुनिश्चित जूसा मेमेगु ख्यलय् अप्पोके मफुनि धका धयादीगु खः।

लगानी यायेगु निति प्रोत्साहन यायेगु लागि सरकारं लगानी सम्मेलन यानागु धका धयादीसे अपुक लगानी दुकायेगु निति विधेयक न हये धुकुगु दु धका धयादीगु खः। हिमालयन हाइड्रो एक्स्पो २०२४ सुरु जुइ धुकुगु दु। मत खपत अप्पोकेगु निति सन्देशनापं स्वतन्त्र ऊर्जा उत्पादकतयेगु संस्था, नेपाल (इप्पान) या ग्वसालय् हिमालयन हाइड्रो एक्स्पो सुरु जूगु खः।

ऊर्जा जलस्रोत लिसे सिँचाइमन्त्री शक्तिबहादुर बस्नेतं ¥यालीया उलेज्या यानादीगु खः।

थ्व हे वइगु बैसाख १५ गते जुइत्यःगु इलाम २ या उपनिर्वाचनय् पहिचानवादी स्वतन्त्र उम्मेदवार डेकेन्द्र थेगिमयात येँया पहिचानबादी नेवातय्पाखें सर्मथन याइगु जुगु दु।

कोशी प्रदेशया नां हिलाः लिम्बुवान प्रदेश नामाकरण यायेमाःगु माग यासें डेकेन्द्र थेगिमया नेतृत्व सशक्त आन्दोलन जुयाच्वंगु खः। सतक आन्दोलन नापं संसदय् न संर्घष यायेगु नितिं वयकलं थथे प्रतिनिधि सभाया सदस्यया नितिं उम्मेदवारी बियादिगु खः।

येँया पहिचान पक्षधर नेवातय्गु पाखें नं वयकःयात सर्मथन यायेगु लिसें इलामाय् च्वनाच्वपिं सकल नेवातय्त पहिचानबादी स्वतन्त्र उम्मेदवार डेकेन्द्र थेगिमयात ग्वाहालि यायेत इनाप यायेगु नितिं कन्हय् बुधवाः सुथय् येँया नेपाः ब्याकेटय् नेवातय्गु मुज्या च्वनेत्यंगु खः

उपप्रधान लिसें स्वास्थ्य व जनसंख्यामन्त्री उपेन्द्र यादव जनसंख्या सम्बन्धी सम्मेलनय् ब्बति कायेगु निति अमेरिकाय् वनिइगु जुगु दु।

जनसंख्या विकास सम्बन्धी ३० क्वःगु अन्तर्राष्ट्रिय सम्मेलनय् ब्बति कायेगु निति २७ अप्रिल (१६ वैशाख) य् मन्त्री यादव अमेरिका वनेत्यःगु दु धका मन्त्रालयया समन्वय महाशाखा प्रमुखं जानकारी बिःगु दु।

मन्त्री यादवया नेतृत्वय् स्वास्थ्य लिसे जनसंख्या मन्त्रालय समन्वय महाशाखा प्रमुख डा. चुमनलाल दास, जनसंख्या महाशाखा प्रमुख विनोदबहादुर कुँवर, मन्त्री यादवया स्वकीय सचिव भवनाथ खतिवडा व परराष्ट्र मन्त्रालयया सह–सचिवपि उखेपाखे वने त्यःगु खः।