महिला, बालबालिका लिसे ज्येष्ठ नागरिक मन्त्री भगबती चौधरीें आध्यात्मिक ज्ञानपाखे प्रशिक्षित मनूतय्स समाज व राष्ट्रयात सकारात्मक लँय् यकिइ धका धयादीगु दु।

ब्रह्मकुमारी राजयोग सेवा केन्द्र येँ न याःगु ‘स्वच्छ व स्वस्थ्य समाजया लागि आध्यात्मिक सशक्तीकरण’ छगु ज्याझ्वलय् सम्बोधन यानादीसे मन्त्री चौधरीं अथे धयादीगु खः। आध्यात्मिक ज्ञानपाखे प्रशिक्षित सू न मनूखं स्यकिइगु, नोक्सानी याइमखु धका वयकलं दाबी यानादीगु खः।

‘यदि आध्यात्मिक ज्ञानपाखे प्रशिक्षित राजनीतिज्ञ जूसा वं याःगु ज्या व रणनीति न समाजयात सकारात्मक स्वइगुलि विकासया लँय् न्ह्यावनिइ’, मन्त्री चौधरीं धयादीगु दु, ‘झी थःव थः हे अन्तर्द्वन्द्वय् दु। मनू–व्यक्तिमनू दथुइ, समुदाय दथुइ अन्तर्द्वन्द्व दु। धका धयादीगु दु। छम्ह मेपिन्स ल्युउने लाका थः न्ह्यने वनिइगु गलत प्रतिस्पर्धाया कारण समाज छु भचा मखु लँय् पाखे वनाच्वंगु दु अथे अज्यागु गलत मान्यता व अभ्यासयात थज्यागु ज्यापाखे न्ह्यावने फइ ।

वयलकं धयादीगु दु, ‘आःयागु समाजयात स्वयेगु खःसा छम्हेसिया मेम्हेसित ल्युउने लाका न्ह्यावना च्वंगु समाजं मखुगु लँय् व मखुगु बिचाः पाखे न्ह्या वनाच्वंगु खः।‘ ओम शान्तिया अभियान नेपालयक जक मखु हलियक हे न्ह्याय् माःगु धका धयादीसे वयकलं समुदाययात सकारात्मक खँपाखे प्रोत्साहन यासे मखु लँय् वनाच्वपि म्हो जुयावनिइ धका वयकलं धयादीगु खः।

ब्रह्मकुमारी राजयोग सेवा केन्द्र नेपाःया राष्ट्रिय निर्देशक राज दादी माँया सभाध्यक्षताय् उगु ज्याझ्वः जुगु खः।

भारतय् नांजाम्ह आध्यात्मिक गुरु श्री नीलमणीकृपालुजु महाराजं यलया लाय्कूलि दुने भण्डारखाल क्यब्वय् कन्ह्यः आध्यात्मिक प्रवचन बिइगु जुुगु दु।

गुरु नीलमणी नेपाः वःगु इलय् यलय् च्वम्ह सुभद्रा श्रेष्ठया इनापय् प्रवचन बिइगु ज्याझ्वः दु धका थौ छगु पत्रकार सम्मलेन याना जानकारी बिःगु खः।

‘न्ह्यावलय् टेलिभिजन, युटुयुब पाखे जक कृपालुजी महाराजया प्रवचन न्यनाच्वंगु स्थितिइ प्रत्यक्ष सत्संगपाखे प्रवचन न्यने दइगुलि तसक लयतायागु दु।’ धका श्रेष्ठं धयादीगु खः। अथेहे वयकलं ‘सुथय् जुइगु कृतन लिसे प्रवचनय् ब्बति कायेगु निति सकसित न इनाप यानाच्वना।’ श्रेष्ठया कथं उगु प्रवचन शनिवनःनिसे न्यान्हु तक न्ह्यावलय् बहनि ५ बजे निसे ज्याझ्वः जुइत्यःगु दु।

उगु ज्याझ्वलय् नेपाः नापं भारतया भक्तजनतय्गु न ब्बति दइगु दु।

सरकारं मिडिया काउन्सिल विधेयक राष्ट्रिय सभाय् दर्ता याःगु दु। थ्व स्वया न्ह्यः २०७५ सालय् राष्ट्रिय सभापाखे न्ह्याकूगु विधेयक प्रतिनिधि सभाय् सहलह जुगु इलय् कार्यकाल क्वचायेवं निष्क्रिय जुगु खः।

सरकारं हयेत्यःगु न्हुगु विधेयकय् पत्रकारतय्स आः मिडिया काउन्सिलपाखे परिचयपत्र कायेमाःगु व्यवस्था तःगु दु। आः सरकारं सूचना विभाग व प्रदेशस्थित सञ्चार रजिष्टारया कार्यालयपाखे थथे परिचयपत्र वितरण याना च्वंगु खः। विधेयकं थुगु अधिकार मिडिया काउन्सिलयात बिइगु प्रस्ताव याःगु दु।

२०७५ सालय् सरकारं हउगु मिडिया काउन्सिल विधेयक् वःगु इलय् राष्ट्रिय सभां पत्रकारतय्त लाइसेन्स कायेगु निति जाँच बिइमाःगु प्रावधान दु। सरकारं हःगु न्हुगु विधेयकय् जाँच बिइगु प्रावधान तयातःगु मदु। तर पत्रकारं प्रेस प्रतिनिधि परिचयपत्र कायेमाः धासा सञ्चार संस्थाया सिफारिसनाप तोके यानातःगु योग्यताया प्रमाणपत्रया प्रतिलिपि दुथ्याकेमाः याना तःगु दु।

सर्वोच्च अदालतं नक्कली भुटानी शरणार्थी प्रकरणया अभियुक्त पूर्वमन्त्री टोपबहादुर रायमाझी, पूर्वगृहसचिव टेकनारायण पाण्डेनापं न्ह्यय्म्हेसित कुनेत उच्च अदालतया निर्णय सदर याःगु खः।

न्यायाधीश कुमार रेग्मी व टेक प्रसाद ढुंगानाया मंकाः इजलासं अभियुक्त आङटावा शर्पायात ३० लाख धरौटीइ त्वःतुगु दु। अथेहे समशेर मियाँयात साधारण तारेखय् तःगु दु धका सर्वोच्चया सहप्रवक्ता गोविन्द घिमिरें जानकारी बिःगु दु।

गोविन्द कुमार चौधरीयात १० लाख धरौटीइ त्वःत्येत आदेश बिःगु दु। केशव प्रसाद दुलाल, सन्देश शर्मा, सागर राई, इन्द्रजीत राई, सानु भण्डारीपिन्त उच्च अदालतं कुना तयेगु निर्णयया सदर याःगु दु।

कक्षा १२ परीक्षा थौनिसे देयन्यकं सुरु जुगु दु। सुथय् ८ बजेनिसे ११ बजेतक न्ह्याइ। थौंनिसे न्ह्याउगु परीक्षा वैशाख २६ गते क्वचाइ। थुगु दँय् नियमितपाखे १ लाख ९६ हजार ९ सय १४ मिजंपि व १ लाख ९३ हजार ९ सय ३३ मिसापि याना ३ लाख ९० हजार ८ ४७ परीक्षार्थीतय्स ब्बति काउगु दु।

अथेहे ग्रेड वृद्धिपाखे १ लाख ६ सय ५० विद्यार्थीपि ब्बति काउगु दु। देयन्यक ५ हजार ५ सय ४२ विद्यालयया विद्यार्थी कक्षा १२ परीक्षाय् ब्बति काउगु खः। परीक्षाया लागि बोर्डं देयन्यक १ हजार ५ सय २५ परीक्षा व जापानय् छगु नाप १ हजार ५ सय २६ परीक्षा केन्द्रया निर्धारण यानातःगु दु। दकलय् अप्पो येँ १ सय ४४ व मनाङ÷मुस्ताङय् छगु छगु परीक्षा केन्द्र निर्धारण यानातःगु दु।

न्हापागु पटक बोर्डं थुगु दँनिसे स्वचालित (स्यान्डम) प्रक्रियापाखे येँ परीक्षा केन्द्र निर्धारण याःगु खः। परीक्षा सञ्चालनया लागि केन्द्राध्यक्ष, सहायक केन्द्राध्यक्ष, निरीक्षक, कर्मचारी, कार्यालय सहयोगी याना ३४ हजार १ सय ७१ जनशक्ति व १८ हजार ३ सय प्रहरी परिचालन याःगु दु।