नेपाल आयल निगमं इन्धनया भाः घटे याःगु दु। बिहीवाः चान्ह्यः १ बजेनिसे लागू जुइगु कथं डिजेल, मचिकं व पेट्रेलय् भाः घटे याःगु दु।

पेट्रोल लिटरय् नितका व डिजेल नापं मचिकनय् लिटरं प्यतका घटे याःगु दु। एलपी ग्यासया भाः धाःसा यथावत याःगु दु।

न्हुगु भाः कथं चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी व वीरगञ्ज डिपोया १५ किलोमिटर क्षेत्रय् पेट्रोल लिटरं १६७ रुपैयाँ ५० पैसा याःगु दु। सुर्खेत व दाङ क्षेत्रय् १६९ रुपैयाँ व स्वनिगः, पोखरा व दिपालय डिपोया १५ किलोमिटर क्षेत्रय् पेट्रोल लिटरं १७० रुपैयाँ कायम याःगु दु।

डिजेल व मचिकंया भाः न १५७ रुपैयाँ ५० पैसा, १५९ रुपैयाँ १६० रुपैयाँ याइगु दु।

एलपी ग्यासया भाः देयन्यकं सिलिण्डरं १८९५ रुपैयाँ हे कायम याःगु दु धका निगमं धाःगु दु।

थौं ३६ क्वःगु विश्व एड्स दिवस । ‘समुदायया नेतृत्वय् एड्सयात अन्त्य याये’ धइगु नारा ज्वना देय्न्यकं चेतनामूलक ज्याझ्वः यायेत्यःगु दु।

एचआईभी व एड्ससम्बन्धी प्रभावकारी रोकथाम, हेरचाह, ग्वहालि लिसे उपचार सेवाया लागि विश्वव्यापी ध्यानाकर्षण यायेगु जनचेतना हयेगु निति दँय् दँसं डिसेम्बर १ तारिखय् थुगु दिवस हनिइगु याइ। स्वास्थ्य लिसे जनसङ्ख्या मन्त्रालय अन्तर्गतया राष्ट्रिय एड्स लिसे यौन रोग नियन्त्रण केन्द्रं दिवसया लसताय् थीथी चेतना व सन्देशमूलक ज्याझ्वः यायेत्यःगु दु।

केन्द्रया कथं नेपालय् सन् २०२२ या लिपां तक ३० हजार मनू तय्त एचआईभी सङ्क्रमण जुगु अनुमान दु। सन् १९८१ य् न्हापां एचआईभी सङ्क्रमित लुइवं सन् २०२२ या अन्त्य तक हलियकं ८ करोड ५६ लाख म्हेसित सङ्क्रमण जुइ धुकुगु दु।

सङ्क्रमणया कारण ४ करोड ४ लाख म्हेसियागु ज्यान वने धुकुगु तथ्याङ्कय् दु । हलिमयय् न्हिन्हि ३ हजार ६ सय मनूत एचआईभी सङ्क्रमित जुयाच्वंगु दु।

प्रधानमन्त्री पुष्पकमल दाहाल प्रचण्डं नेपालय् पुँजी परिचालन यायेत संयुक्त अरब इमिरेट्स (यूएई) या लगानीकर्ता तय्त इनाप यानादीगु दु।

जलवायु परिवर्तनसम्बन्धी संयुक्त राष्ट्रसङ्घीय सम्मेलन कोप–२८ य् ब्बति कायेगु झ्वलय् म्हिगः बिहीवाः अबुधाबी थ्यःगु खः। प्रधानमन्त्रीं नेपाल–दुबई व्यापार मञ्चयात सम्बोधन यायेगु झ्वलय् नेपालय् पुँजी प्रवाह यासे उकिया प्रतिफल कायेत इनाप यानादीगु खः ।

दुबई उद्योग वाणिज्य सङ्घनाप सहकार्यय् अवुधाबीइ नेपाली राजदूतावास व नेपाल उद्योग वाणिज्य महासङ्घया मंकाः ग्वसालय् जुगु ज्याझ्वलय् प्रधानमन्त्री प्रचण्डं वैदेशिक लगानी दुकायेत नेपाल सरकारं अवलम्बन याःगु नीतिगत सुधारबारे जानकारी बियादीगु खः।

यूएईया अर्थराज्यमन्त्री अब्दुल्लाह अहमद मोहम्मद अल सालेहं यूएई व नेपाः दथुइ आर्थिक सम्बन्धयात अझ क्वातूकं यकेत सहकारी नापं साझेदारी अपरिहार्य दु धका धयादीगु खः।

बिहीवाःनिसे कोप–२८ दुबईलय् शुरु जुगु खः।

प्रधानमन्त्री पुष्पकमल दाहाल प्रचण्डयात कया दुबई वनेगु झ्वलय् म्हिगः बुधवाः छुटे जूपि ३१ म्ह यात्रुयात ज्वना नेपाल वायु सेवा निगम (नेपाल एअरलाइन्स) या जहाज थौं बिहीवाः वनिइगु जुगु दु ।

यात्रु तय्त जूगु असुविधाप्रति क्षमायाचना यासे निगमं थौं वैकल्पिक उडानपाखे दक्को यात्रुतय्त गन्तव्यय् थ्यकिइगु प्रबन्ध मिले यागु दु धका जानकारी बिःगु दु।

म्हिगः चान्ह्यः ११ बजेया तालिका दुगु खःसा बहनि साढे ९ बजे ब्बकूगुलि यात्रुतय्गु उपलब्ध मजुगु इमेल, फोन नम्बर व ट्राभल एजेन्सीपाखे जानकारी याकगुलि छू यात्रुत छुटे जूगु धका निगमं धाःगु खः।

निगमं वंगु चान्ह्यः प्रधानमन्त्री प्रचण्डयात ज्वना दुबई वनेगु झ्वलय् ३१ म्ह यात्रु छुटे जूगु खः।

नेकपा एमालेया अध्यक्ष केपी शर्मा ओलीं हाकनं रैती जुइत थःपि तयार मदु धका धाःगु दु।

झुलाघाट–चिवाभञ्ज्याङ समृद्धिया लागि संकल्प यात्राया न्हापागु दिं बैतडीया गोठालापानीइ जूगु आमसभायात सम्बोधनयासे ओलीं सरकार कमजोर जुगुलि प्रतिगामी शक्ति तय्स छ्यं ल्ह्वना वःगु धका धयादीगु खः।

गणतन्त्रया विरोध यायेगु दुस्साहसी ज्या जुगु धका धयादीसे ओली न्ह्यने धाःगु दु, ‘उगु इलय् राजतन्त्र दु, उगु राजतन्त्रया आः सालिक दय्का श्री ५ महाराजाधिराज धका च्वया तमासा यायेगु असंवैधानिक ज्या जुयाच्वंगु दु।’

एमाले अध्यक्ष ओलीं हाकन लिफः स्वया लिहावनेगु व रैती हजुइत थःपि तयार मदु धका धयादीगु खः ।