राष्ट्रिय समाचार समिति (रासस) न थौनिसे नेपालभाषा व मैथली भाषाया समाचार बुलेटिन प्रकाशन याःगु दु।

समाचार प्रेषण व प्रसारण यायेगुलि देय् या दकलय् पुलागु व मुख्य समाचार समितिं याःगु थुगु पलाः ऐतिहासिक जूगु दु धका नेवाः पत्रकारतयेगु राष्ट्रिय संगठन नेवाः पत्रकार राष्ट्रिय दबूया नायः नृपेन्द्रलाल श्रेष्ठं थौ छगु बिज्ञप्ती पिकया लसकुस याःगु दुं।

दबूया नायः श्रेष्ठं नेपालभाषाया पत्रकारिता न्ह्यागू सच्छि दँ थ्यःगु नाप संंयुक्त राष्ट्र संघं भाषा दशक हनाच्वंगु इलय् राससपाखे थज्यागु महत्वपुर्ण ज्या जुगु दु धका लसता प्वकादीगु खः। नेपाःया संविधान धारा ६ नं दक्को नेपालय् न्ववाइगु भाषा राष्ट्रभाषा खः धका धयातःगु दु। थज्यागु अवस्थाय् राससं थौनिसे नेपालभाषा व मैथैली भाषाया समाचार प्रषेण व बुलेटिन प्रकाशन व प्रसारण याना संविधानया उगु मर्म व भावनायात व्यवहार अनुवाद यायेगु कुतः जुगुलि लसता प्वकादीगु खः।

थुगु ज्याझ्वः न नेपालभाषा व मैथली भाषाया सञ्चारमाध्यमया विकास व प्रवद्र्धनय् माक्वः ग्वहालि जक मजुसे राससं व्यापक व अपनत्वयात थुइका बालाक्क सकारात्मक भूमिका निर्वाह याइगु भलसा पत्रकार दबू कयातःगु दु धका धयादीगु दु।

पत्रकार दबू नेपाल टेलिभिजनय् नेपाल भाषाया न समाचार तयेमाः धका तत्कालिन सुचना तथा संचारप्रबिधि मन्त्री रेखा शर्मा व नेपाल टेलिभिजनया महाप्रबन्धक फुलमान बलयात न ध्यानाकर्षण पौ लःल्हायेगु जुगु खःसा आःया सुचना तथा संचारप्रबिधि मन्त्री पृथ्वी सुब्बा गुरुङ्ख व सम्मानिय राष्ट्रपति रामचन्द पौडलयात न ध्यानाकर्षन पौ लःल्हायेगु ज्या जुगु खः।

मनकामना केबलकार कन्ह्यः असोज २९ गतेनिसे स्वन्हुतक बन्द जुइगु दु। मर्मत सम्भारया निति असोज २९, ३० व कात्तिक १ गते केबलकार बन्द याइगुजुगु दु।

नवमी, दशमी व एकादशी कुन्हु न केबलकार बन्द याःगु खः। थौ द्वादशी  केबलकार चाय्कूगु खः।मोहनिया सिन्हं टिइगु निति चायकूगु खः। कन्हय निसे स्वन्हु तक बन्द यायेत्यनागु खः धका मनकामना दर्शन प्रा.लि.न धाःगु दु।

मनकामना केबलकारया सेवा नकतिनि हे जक डिजिटलाइज्ड सिस्टमय् न्ह्याकूगु खः। उकिया निति न्हुगु तार हिलेमाःगु, लठ्ठा हिलेमाःगु ज्या जुयाच्वंगु खः।

मनकामना केबलकार मर्मत सम्भारया निति अष्ट्रियां प्राविधिक हःगु खः।

मोहनि न्ह्यःया लिपागु सेयर बजाःया कारोवार थौ छु भचा थहावंगु दु। थौ बुधवाः ४.८५ ल्याखं थहावना बजाः २६६८.१७ बिन्दुइ थ्यःगु दु।

नेप्सेय् थौ ३ अर्ब ७६ करोड १५ लाख १२ हजार ७०६ तका बराबरया कारोबार जूगु दु। बुधवाः २९४ गु धितोपत्रया ४० हजार १३१ कारोबारपाखे ८३ लाख १२ हजार ६८५ कित्ता सेयर कारोवार जूगु दु।

आः सेयर बजाः असोज २९ गते चालिइगु जूगु दु। बुधवाः बैंकिङ, वित्त, होटेल एण्ड टूरिजम, जलविद्युत, उत्पादन व प्रशोधन, लघुवित्त, म्यूचअल फण्ड, निर्जिवन बीमा व मेमेगु समूह थहावंगुलि विकास बैंक, लगानी, जीवन बीमा व व्यापार समूहया भाः कुहावःगु दु।

दकलय् अप्पो उत्पादन नाप प्रशोधन समूहया लगानीकर्ता तय्स १.०५ प्रतिशतं कमे याःगु दु। बुधवाः मध्यसोलु हाइड्रोपावर, अपर स्याङ्गे हाइड्रोपावर व राप्ती हाइड्रो एण्ड जनरल कन्स्ट्रक्सनया भाः सर्किट लेवलय् थहावंगु खः। बुधवाः दलकये अप्पो थ्रिस्टार हाइड्रोया लगानीकर्तात दकलय् घाटा जूगु दु। थुगु कम्पनीया भाः १० प्रतिशतं घटे जूगु खः।

सिटिजन्स सुपर ३० म्यूचुअल फण्ड, सिटिजन्स म्यूचुअल फण्ड १, सानिमा बैंक न यक्को घटे जूगु दु। थौ नेपाल फाइनान्स दकलय् अप्पो कारोबार जूगु दु।

बरिष्ठ गीतकार विश्व बल्लभ ८० दँय् थौ बुधवाः मन्त।छु दि न्ह्यःनिसे अन्नपूर्ण न्युरो अस्पतालय् मस्तिष्कघातया वासः याका वयाच्वंगु खः।

बल्लभयात वासः याकेगु निति अर्थ संकलन यायेगु सक्रियम्ह गीतकार राजेन्द्र थापां सामाजिक सञ्जालपाखे बल्लभ मदुगु धका च्वंगु खः।

ताः ईनिसे रेडियो नेपालया जागिर नयाच्वम्ह बल्लभया निम्ह म्ह्याय्पि दु। वयकःया जहान निदँ न्ह्यः क्यान्सरं मदुगु खः।

तारादेवीं हाःगु म्ये ‘शुभकामना’, अरूणा लामां हागू म्ये ‘भाग्यले खुसी खोसेर लग्यो’, अमर तण्डुकारं हालादिगु ‘धेरै दिन भो तिम्रो झझल्को’ थे लोकह्वागु म्ये बल्लभं च्वयादीगु खः ।

मध्यपुर थिमि बचत तथा ऋण सहकारी संस्थां थिमि भैलः २०८१ या कलाकार व व्यवस्थापन समितियात छगु ज्याझ्वः दथुइ हने याःगु दु।

आनुष्ठानिक प्याखं मध्ये थिमि भैलःयात म्वाका तयेगु ज्या याःगुलि अथे हने ज्या याःगु खः। सहकारीया १७ क्वःगु दँमुज्याय् थिमि भैलः २०८१ व्यवस्थापन समितिया माइला प्रजापति नाप कलाकारपि तृशल प्रजापति (ज्यापुंगः), अशोक प्रजापति (न्हापा भैलः), बाल मुकुन्द प्रजापति (लिपा भैलः), आयुष प्रजापति (न्हापा दागिं) र शाहील प्रजापति (लिपा दागिं)यात दोसल्लां न्यय्का थिमि नगरपालिकाया उपप्रमुख विजयकृष्ण श्रेष्ठं हनापौ लःल्हानादीगु खः।

संस्थाया अध्यक्ष नाप ज्याझ्वःया सभाध्यक्ष कृष्ण काजी मानन्धर जुगु उगु ज्याझ्वलय् मूपाहाँ मध्यपुर थिमि नगरपालिकाया उपप्रमुख विजयकृष्ण श्रेष्ठ व पाहाँपि ८ या वडाध्यक्ष रमेश थापा, समाजसेवी कृष्णलाल गोजा श्रेष्ठ, समाजसेवी न्हुछेरत्न मानन्धर, नेफ्स्कूनया सुशीला पराजुली, सिवा सायमि खलःया अध्यक्ष मनोज लाल मानन्धर, केन्द्रीय मानन्धर संघया सहायक सचिव तुलसीकाजी मानन्धर, मध्यपुर सञ्चार समाजया अध्यक्ष चन्द्रकृष्ण गोपाल श्रेष्ठपिनिगु न ब्बति दुगु खः।