जलवायु परिवर्तन सम्बन्धी सम्मेलनय् ब्बति कायेगु निति प्रधानमन्त्री पुष्पकमल दाहाल प्रचण्ड थौं यूएईया दुबई वनेत्यःगु दु।

प्रधानमन्त्री प्रचण्ड थौं बुधवाः चान्ह्यः साढे ९ बजे दुबइ वनिइगु धका वयकःया सचिवालयं धाःगु दु ।

जलवायु परिवर्तनसम्बन्धी संयुक्त राष्ट्रसंघीय संरचना महासन्धि (युएनएफसीसीसी)या पक्ष राष्ट्रतय्सं २८ क्वःगु सम्मेलन (कोप २८) थ्व हे मंसिर १४ निसे २६ गतेतक यूएईया दुबईलय् जुइगु खः । उगु सम्मेलनय् प्रधानमन्त्री प्रचण्ड नेतृत्वया नेपाली प्रतिनिधिमण्डलं ब्बति काये त्यःगु खः।

प्रतिनिधि मण्डलय् वन लिसे वातावरणमन्त्री वीरेन्द्र महतोया नापं उच्च सरकारी अधिकारीतय्सं ब्बति काइगु जुगु दु । उगु भ्रमण टोलीइ प्रधानमन्त्रीया म्ह्याय् गंगा दाहाल न ब्बति काइगु जुगु दु।

शेयर बजाः थौं मङ्गलवाः न कुहावःगु दु। शेयर बजाः परिसूचक नेप्से थौं २ दशमलव १७ अङ्कं कुहावया १ हजार ८ सय ९४ दशमलव ५३ विन्दुइ कुहावःगु खः।

थौं फाइनान्स, होटल पर्यटन, जलविद्युत्, उत्पादन नाप प्रशोधन व म्युचल फन्ड समूहया शेयर सामान्य थहावंगु दु । मेमेगु समूहया शेयर कुहवंसा थौं दकलय् अप्पो नारायणी विकास बैंकया शेयर झन्डै साढे ५ प्रतिशतं कुहावःगु दु।

समग्र बजाः कुहावःगु दिं लकलय् अप्पो बुद्धभूमि जलविद्युत् कम्पनीया शेयर १० प्रतिशत व मेन्छियाम जलविद्युतया शेयर झन्डै ९ प्रतिशत स्वया अप्पो थहावःगु दु।

थौं ४७ लाख २७ हजार कित्ता शेयर १ अर्ब २८ करोड रुपैयाँया कारोबार जूगु दु। दकलय् अप्पो सोनापुर मिनरल्स एन्ड आयल कम्पनीया ८ करोड ४९ लाख रुपैयाँया शेयर किनबेच जूगु दु।

लुँया भाः आःतकया हे अप्पो थ्यःगु दु। लुँ तोलां थौ स्वसः थहावःगु दु। लुँ तोलां स्वसः थहावना थौं १ लाख १७ हजार ७ सय रुपैयाँ न कारोवार जूगु दु धका नेपाल सुन चाँदी व्यवसायी महासङ्घं धाःगु दु।

अथेहे वहःया भाः धासा म्हिगः थे तु हे तोलाया १ हजार ५ सय रुपैयाँ न कारोबार जुगु दु।

वज्राचार्य क्लबया प्यक्वःगु तःमुँज्या व न्हय्क्वःगु दँमुँज्या क्वचाःगु दु। उगु ज्याझ्वःया मूपाहाँ उच्च अदालतया न्यायाधीश राज्यलक्ष्मी वज्राचार्यं उलेज्या यानादीगुलि क्लबया कार्यसमितिया न्हूधाः नं जूगु खः।

ज्याझ्वलय् ललितपुर उद्योग वाणिज्य संघया नायः विश्वराज वज्राचार्य व सशस्त्र प्रहरी बलया एस.पि. समेनन्द वज्राचार्यपिंत विशेष कथं हनेज्या नं याःगु खः । न्हूगु ज्यासना पुचलय् सर्जु वज्राचार्य ं नायः जुयादीगु दुसा न्वकू सृजन वज्राचार्य, छ्याञ्जे अल्बर्ट वज्राचार्य, लिउछ्याञ्जे श्रद्धा वज्राचार्य, दांभरी मोनिशमानन्द वज्राचार्य, लिउदांभरी कुशल वज्राचार्य ल्यःगु दु ।

अथे हे सजन वज्राचार्य, बिजयराज वज्राचार्य, स्नेहा वज्राचार्य, आकाश वज्राचार्य व श्रीजा वज्राचार्यपिं दुजलय् ल्यःगु दु । अथे हे वंगु पंचदान कुन्हु सामूहिक पञ्चदान ज्याझ्वःपाखें मुंगु दां १,०१,१०१ तकाया चेक क्लबया नायः सर्जु वज्राचार्यं नेवाः छेँ दयेकेत नेवाः देय् दबूया नायः पवित्र वज्राचार्ययात लःल्हागु खः ।

लसकुस न्वचु डा. मनिसरत्न वज्राचार्यंयाःगु उगु ज्याझ्वलय् वार्षिक प्रगति विवरण सृजन वज्राचार्य व आर्थिक प्रतिवेदन ज्ञानरत्न वज्राचार्यं न्ह्यब्वःगु खः । मुंज्यां वज्राचार्य क्लबया न्हूगु ज्यासना पुचः सर्वसम्मतं ल्यःगु दु ।

ज्याझ्वलय् प्रदेश सभाया सांसद शैलेन्द्रमान वज्राचार्य, न्हूदँ समारोह समितिया नायः प्रा.डा. नरेशमान वज्राचार्य, चर्यानृत्य गुरु यज्ञमानपति वज्राचार्य, प्रा.डा. हृदयरत्न वज्राचार्य लगायत थीथी ख्ययाःपिं प्रतिष्ठित वज्राचार्यपिं पाहांकथं ब्वति काःगु खः ।

सूर्यविनायक–रत्नपार्क रुट लच्छि तक चले जुगु द्रुत बस सेवा न्ह्यागू दु। हाकनं मेगु झीछगः बस थपे याना साविकया हे रुटय् थौंनिसे न्ह्यागू दु।

थौं सुथय् साढे ८ बजेनिसे हाकन न्ह्यागु दु । थ्व स्वया न्ह्यः नीन्यागः बस न्ह्यागु खः सा आः मेगु थप झीछगः याना रत्नपार्क निसे सूर्यविनायक रुटय् स्वीखुगः बस चले जुगु दु।

उगु बस थौं सुथय् साढे ८ बजेनिसे स्वगू स्वंगू मिनेटया दुने सूर्यविनायकपाखे रत्नपार्क वःगु दु । सूर्यविनायकनिसे रत्नपार्क साढे १० बजेतक चले जुइ व न्हिनय् साढे ३ बजेनिसे साढे ५ बजेतक रत्नपाकनिसे सूर्यविनायकतक चले जुइ।

थ्व स्वया न्ह्यः उगु बस रत्नपार्क व सूर्यविनायक निगु थासं न्यागू न्यागू मिनेटय् चले जुगु खःसा न्हिं सुथय् ९ बजेनिसे ११ बजेतक व न्हिनय् ४ बजेनिसे सनिलया ६ बजेतक चले जुःगु खः।