नेकपा मालेया नेता नाप पूर्वमन्त्री डम्बर श्रेष्ठ ७३ दँय् मन्त। स्वँया क्यान्सर जुयाच्वम्ह श्रेष्ठ बुधवाः सुथय् ३ बजे जूया ८ मिनेटय् चितवनस्थित थःगु हे निवासय् मदुगु खः।

मदुम्ह श्रेष्ठयात थौ बुधवाः हे अन्त्येष्टि याःगु दु। मदुम्ह श्रेष्ठया छम्ह काय् व छम्ह म्ह्याय् दी।

जापानी राजदूत युुताकां प्रधानमन्त्री ओलीयात नापलात प्रधानमन्त्री केपी शर्मा ओलीयात नेपाःया निति जापानया राजदूत किकुुता युताकां थौ प्रधानमन्त्री निवास, बालुवाटारय् नापलायेगु ज्या जुगु दु।

नापलायेगु झ्वलय् निगु देय् या दथुइ जुयाच्वंगु परम्परागत सम्बन्ध, निगु पक्षीय हितया विविध विषय नापं ग्वहालिया बारे सहलह जूगु खः।

भौतिक पूर्वाधार लिसे यातायात मन्त्रालयया सचिव केशबकुमार शर्मा, परराष्ट्र मन्त्रालयया सहसचिव कृष्णप्रसाद ढकालपि नापलायेगु झ्वलय् खुसिबाः वःगु नाप चलः वया प्रभावित विपी राजमार्ग पुनः निर्माणय् जापानपाखे यायेफइगु ग्वहालिया विषय न सहलह जूगु खः।

थौ बुधवाः सेयर बजाःया परिसूचक नेप्से ४३.२२ ल्याखं (१.६० प्रतिशत) थहावंगु दु।

थ्व नाप नेप्से २७४२ ल्याखय् कायम जूगु दु। कारोबार यायेगु झ्वलय् थौ १ः३० बजे बजाः २७४८ ल्याः तक थ्यःगु खः।अथेहे कारोबार रकम न थहावना ५ अर्ब ६६ करोड थ्यःगु खः। मुक्क २०६ गु कम्पनीया भाः थहावंगुलि ३५ गु कम्पनीया भाः कुहावःगु दु सा स्वंगू कम्पनीया भाः स्थिर जूगु दु।

थौ दक्को हे क्षेत्रया सूचक थहावःगु दु। व्यापार समूह दकलय् अप्पो ३.४४ प्रतिशत थहावंगुलि साल्ट ट्रेडिङया भाः ३.८४ प्रतिशतं थहावःगु खः। अथेहे विशाल बजार व साल्ट ट्रेडिङ याना निगु कम्पनी जक सूचीकृत जूगु खः।

अथेहे बैंकिङ १.९८, विकास बैंक १.८५, फाइनान्स ०.८६, होटल तथा पर्यटन १.४९, हाइड्रोपावर २.१३, लगानी ०.६९, जीवन बीमा १.८०, उत्पादन १.३६, माइक्रोफाइनान्स १.४८, निर्जीवन बीमा १.३८ व मेमेगु समूह ०.५७ प्रतिशतं थहावंगु दु।

विजय लघुवित्तया भाः ९.३३, इस्टर्न हाइड्रोपावरया ९.२४, समता घरेलु लघुवित्तया ८.६२, आत्मनिर्भर लघुवित्तया ८.५९, सगरमाथा जलविद्युतया भाः ७.४५ प्रतिशतं थहावःगु दु। अपर स्याङ्गे हाइड्रोपावरया भाः १० प्रतिशतं कुहावःगु दु।

मिडसोलु हाइड्रोपावरया ५.५४, मिथिला लघुवित्तया ४.५५ प्रतिशतं भाः कुहावःगु दु। कारोबार रकमया आधारय् नेपाल फाइनान्स, हिमालयन रिइन्स्योरेन्स, एनआईसी एसिया बैंक, गुडविल फाइनान्स व एचआईडीसीएल प्रमोटर सेयर धाःसा न्ह्यने लागु दु।

नेपाल टेलिभिजनय् थौनिसे नेपालभाषां समाचार बिइगु जुगु दु। थौ न्हिनय् १ बजे सुचना तथा संचार प्रबिधि मन्त्री पृथ्वी सुब्बा गुरुङ्खं औपचारिक ज्याझ्वः याइगु जुगु दु।

नेपालभाषाया पत्रकारिता न्ह्यागू सच्छि दँ थ्यःगु नाप संंयुक्त राष्ट्र संघं भाषा दशक हनाच्वंगु इलय् नेपाल टेलिभिजनं समाचार न्ह्याकूगु खः। थौ न्हिनय् ४ बजेनिसे नेपालभाषां समाचार बिइत्यःगु खः।

पत्रकार दबू नेपाल टेलिभिजनय् नेपाल भाषाया न समाचार तयेमाः धका तत्कालिन सुचना तथा संचारप्रबिधि मन्त्री रेखा शर्मा व नेपाल टेलिभिजनया महाप्रबन्धक फुलमान बलयात न ध्यानाकर्षण पौ लःल्हायेगु जुगु खःसा आःया सुचना तथा संचारप्रबिधि मन्त्री पृथ्वी सुब्बा गुरुङ्ख व सम्मानिय राष्ट्रपति रामचन्द पौडलयात न ध्यानाकर्षन पौ लःल्हायेगु ज्या जुगु खः।

राष्ट्रिय समाचार समिति (रासस) पाखें नेपाल भाषा व मैथिली भाषाया समाचार सेवाया परीक्षण न्ह्याःकूगु दु।

म्हिगः सनिलनिसें निगुलिं भाय्या समाचार सेवा परीक्षणया कथं न्ह्याकूगु खः। वंगु दँया माघंनिसें अवधी भाय्या समाचार सेवा राससं न्ह्याःके धुंकूगु दु।

संविधानय् कय्च्यानातःगु समावेसी चरित्रयात कःघाना राससं थी थी माँभासं समाचार बुलेटिन पिथनेगु कुतः याःगु खः।

राससया कार्यकारी नायः धर्मेन्द्र झा नं संविधानया भावनाकथं राससयात समावेशी दयेकेगु आःज्जु ज्वनाः निगुलिं भाय्या बुखँ सेवा न्ह्याःकेत्यंगु खँ कनादिगु खः। थ्यं मथ्यं निदँया अध्ययन धुँका राससं नेपाःया यक्वः ल्याःखय् न्ववाइपिं दूगु मैथिली व मेगू महत्वं जाःगु नेवाः भाय्या बुखँ बुलेटिन पिथने त्यंगु खः।”