हिसी मिडिया प्रा.लि.पाखे न्ह्याकाच्वंगु नेपालभाषाया अनलाइन पत्रिका लहनान्युज डट् कम थौ न्ह्यय् फुना च्यादँ क्यःगु दु।

नेपाल संवत ११३६ कुन्हु छगु ज्याझ्वः दथुइ बरिष्ठ पत्रकार पुष्कर माथेमा व सुरेशकिरण मानन्धरपि पाखे उलेज्या याना मदिक्क न्ह्यानाच्वंगु खः।

नेपालभाषां नेवाः तयेगु मुद्दा, तजिलजि नाप थीथी गतिबिधि वंगु न्ह्यय् दँनिसे मदिक्क प्रकाशन याना वयाच्वंगु खः। मदिक्क ग्वहालि याना वयाच्वपि बिज्ञापनदाता व शुभच्छेकपिन्त हिसी मिडियापाखे सुभाय् देछाउगु दु।

शेयर बजाःया थौ न्हापागु दिं बजाःया सूचक थहावंगु दु। नेप्से परिसूचक ५६.०९ ल्याखं थहावंना नेप्से २६५३ य् थ्यःगु दु।

सेन्सिटिभ सूचक २ प्रतिशतं थहावंगु दु।कारोबार रकम धाःसा कुहावःगु दु। वंगु बुधवाः ६ अर्ब ७७ करोडया कारोबार जूगुलि थौ ६ अर्ब १३ करोडय् सीमित जूगु दु।

कुल २१९ गु कम्पनीया थहावंगुलि २३ गु कम्पनीया भाः कुहावःगु दु सा निगु कम्पनीया भाः स्थिर जूगु दु। थौ फाइनान्स सेक्टरय् लगानीकर्तात आकषित जूगु दु। फाइनान्स सूचक दकलय् अप्पो ६.३० प्रतिशतं थहावंगु दु।

बैंकिङ २.२०, विकास बैंक २.२२, होटल लिसे पर्यटन १.७१, हाइड्रोपावर २.७३, लगानी १.९९, जीवन बीमा १.३४, उत्पादन ३.१२, माइक्रोफाइनान्स १.४७, निर्जीवन बीमा १.४९, मेमेगु १.६२ व व्यापार ०.९० प्रतिशतं थहावंगु दु।न्यादी हाइड्रोपावरया भाः १० प्रतिशत, मध्यभोटेकोशीया ९.७, इस्टर्न हाइड्रोपावरया ९.६, गुडविल फाइनान्सया ९.२७, सिनर्जी पावरया ८.१ प्रतिशतं भाः थहावःगु दु।

विन नेपाल लघुवित्तया १०, स्वरोजगार लघुवित्तयया ५.३, उपकार लघुवित्तया ४.४ प्रतिशतं भाः थहावंगु दु। कारोबार रकमया आधारय् साहस ऊर्जा, एनआरएन इन्फ्रास्ट्रक्चर, नेपाल फाइनान्स, गुडविल फाइनान्स व एसियन लाइफ इन्स्योरेन्स प्रमोटर सेयर न्ह्यने खनेदुगु दु।

प्रधानन्यायाधीश प्रकाशमानसिंह राउतं शपथ काउगु दु। राष्ट्रपति भवन शीतल निवासय् राष्ट्रपति रामचन्द्र पौडेलं न्हुम्ह प्रधानन्यायाधीश राउतयात पद व गोपनीयताया शपथ याकूगु खः।

न्हापाम्ह प्रधानन्यायाधीश विश्वम्भर प्रसाद श्रेष्ठ १८ असोजय् अवकास कायेवं राउत प्रधानन्यायाधीश जुयादीगु खः। संवैधानिक परिषदया बैठकं भदौ ३१ गते राउतयात प्रधानन्यायाधीशय् नियुक्त यायेगु सिफारिस याःगू खः।

संसदीय सुनुवाइ समितिं असोज १६ गते राउतया नां अनुमोदन याःगु खः। राउत दँछित्याः प्रधानन्यायाधीश जुयादी।

खोनाय् समाजसेवी देवबहादुर डंगोलया प्यक्वःगु पुण्य तिथिया झ्वलय् छगू ज्याझ्वः जूुगु दु।

देवबहादुर डंगोल स्मृति कोषया ग्वसालय् जूगु उगु ज्याझ्वलय् खोनाया धार्मिक व सामाजिक ख्यलय् थीथी कथं योगदान बिउपिन्त सम्मान नं देछाःगु खः। कोषया नायः पद्म बहादुर डंगोलया सभाध्यक्षताय् जूगु उगु ज्याझ्वलय् बागमति प्रदेशया श्रम, रोजगार व यातायातमन्त्री प्रेमभक्त महर्जन मूपाहाँ कथं झायादीगु खः।

ज्याझ्वलय् भन्ते सुधिरों च्वयाः बिज्याःगु “त्रिरत्न वन्दना परित सुत्त र असल सम्पत्ति पहिचान” सफूया नं पितब्वज्या जूगु खः। खोनाया कान्छा कृष्ण डंगोल, लःमुना पुचः लगायतयात सम्मान याःगु उगु ज्याझ्वलय् सांस्कृतिक सम्पदाया बारे छगू वक्तृत्व कला कासा नं जूगु खः। उगु कासाय् सुभा श्रेष्ठं सर्वोत्कृष्ट सिरपाः त्याकुगु खःसा सुबि मल्ल व सरल दुलालपिन्त हःपाः सिरपाः बिउगु खः।

ज्याझ्वलय् मूपाहाँ प्रेमभक्त महर्जन व पाहाँपिं सांसद रघुनाथ महर्जन व लोककवि राजभाई जकःमि, संस्कृतिकःमि बदन लाल ङ्याछ्योंपिन्सं खोनाया सांस्कृतिक पक्ष व समाजसेवी देवबहादुर डंगोलया योगदानयात कया नुगःखँ तयादीगु खः।

नेपालभाषा एकेदेमिया ग्वसालय् नेपालभाषा वाङ्गमय, संगीत व विज्ञान ख्यःया प्रतिष्ठित सिरपाः दान्यहिरा सिरपाःया साहित्य विधाय् थुगुसिइ नांजाःम्ह साहित्यकार राजा शाक्ययात लःल्हाइगु जूगु दु।

एकेदेमिया दान्यहिरा क्वछिना कवःया शनिवाः च्वंगु मुँज्यां क्वःछिउगु खः। दँय् दसं बियाः वयाच्वंगु दान्यहिरा सिरपाः दाता यज्ञरत्न धाख्वाः न नीस्वनादीगु कोषपाखें नेपालभाषा एकेदेमिया ग्वसालय् लःल्हाइगु जूगु दु सा संगीत विधाय् मीरा राणा व विज्ञान प्रविधि विधाय् बालसुन्दर मल्लयात दान्यहिरा सिरपाः नाप म्हतिं न्येयद्वः तका लःल्हाइगु जुगु दु।