थ्व हे वइगु वैशाख १५ गते इलाम–२ य् जुइगु उपनिर्वाचनय् नेकपा एमालेपाखे उम्मेदवार जूम्ह सुहाङ नेम्वाङयात माओवादी केन्द्र व विप्लव नेतृत्वया नेपाल कम्युनिस्ट पार्टी न समर्थन याःगु दु।

एमालेनापं स्वंगु दलया इलाम जिल्ला समितिं छगु इनाप पौ प्रकाशित यासे एमाले उम्मेदवार सुहाङ नेम्वाङया लागि मत फ्वनिइगु जुगु दु।

एमाले अध्यक्ष केपी शर्मा ओली, माओवादी केन्द्रया अध्यक्ष पुष्पकमल दाहाल व नेपाल कम्युनिस्ट पार्टीया महासचिव विप्लव दथुइ चुनावी तालमेल यायेगु समझदारी यासे सुहाङया लागि मत फ्वनिइगु जुगु खः।

उगु इनापय् एमालेया जिल्ला अध्यक्ष महेश बस्नेत, माओवादी जिल्ला संयोजक विजय खम्बु व नेकपाया इन्चार्ज मौसमं ल्हाःचिं तःगु खः।

जनकवि दुर्गालाल श्रेष्ठ व वयकःया तिरिमयजुया स्वक्वःगु जंक्व क्वचाःगु दु। वंगु चैत्र १८ गते आइतवाः जनकवि श्रेष्ठ ९० दँ क्यंगु लसताया दिं स्वक्वःगु जंक्व धार्मिक परम्पराकथं क्वचाःगु खः।

वय्कःया जंक्व ज्याझ्वः जनकवि श्रेष्ठया थँबहिलय् थःगु हे छेँय् जूगु खः।

सुदूरपश्चिम प्रदेशया मुख्यमन्त्री कमलबहादुर शाह न राजीनामा बिउगु दु। मुख्यमन्त्री शाह न थौ बिहीवाः बहनि प्रदेश प्रमुख नजिर मियाँया निवासय् वना राजीनामा लःल्हागु खः।

मुख्यमन्त्रीं विश्वासया मत कायेगु निति न्हिनय् बैठक सःतूगु खः। मुख्यमन्त्रीया हे इनापय् बहनि ५ बजे तक बैठक लिछाउगु खः। विश्वासया मत वइगु म्हो जुइवं बैठक च्वनेगु न्ह्यः राजीनामा लःल्हागु खः।

शेयर बजाः लगातार थौ नाप न्यान्हु तक कुहावना च्वंगु दु।

वंगु आइतवाः निसे कुहावया च्वंगु शेयर बजाः परिसूचक नेप्से थौ २ दशमलव ७३ अङ्कं कुहावया २ हजार ४ दशमलव शून्य ५ विन्दुइ कुहावःगु दु।थौ फाइनान्स, होटल लिसे पर्यटन, माइक्रोफाइनान्स, निर्जीवन व व्यापारबाहेक दक्को समूहया शेयर कुहावःगु दु।

उत्पादन व प्रशोधन समूहया शेयर दकलय् अप्पो १ सय १० अङ्कं कुहावःगु दु। अथेहे पिपुल्स पावर कम्पनीया शेयर ९ प्रतिशत स्वया अप्पो कुहावःगु दु। समग्र बजाः कुहावःसा मानुषी लघुवित्त व मनकामना स्मार्ट लघुवित्त कम्पनीया शेयर १० प्रतिशतं थहावःगु दु। बजाः कुहावःसा थौ कारोबार रकम धाःसा सुधार जूगु दु।

स्वसः व निगु कम्पनीया ६९ लाख ६३ हजार कित्ता शेयर ३ अर्ब ३ करोड रुपैयाँया कारोबार जूगु दु। दकलय् अप्पो गुर्खाज फाइनान्स कम्पनीया २३ करोड ३२ लाख रुपैयाँया शेयर कारोवार जुगु दु।

गायक राजेश पायल राई प्रहरी ज्वंगु दु। अय्ला त्वःना हल्ला याःगु द्धपनय् राईयात वंगु चान्ह्यः प्रहरी ज्वंगु खः।

राजेश पायल राई नाप स्वम्हेसित मदन भण्डारी कलेज न्ह्यने ज्वना प्रहरी वृत्त नयाँबानेश्वरय् तयातःगु दु धका काठमाडौं उपत्यकाया प्रहरी कार्यालयया एआईजी दीपक थापां जानकारी बिःगु दु।

वंगु चान्ह्यः जक स्वनिगलय् १७२ म्हेसित प्रहरीं नियन्त्रणय् काःगु दु।