यलया गोदावरी लागाय् न्ह्यक्वःगु हलिं नेवाः दिवस नापं नेवाः देय् दबू महालक्ष्मी नगर समितिया प्यक्वःगु बुसादँ हंगु दु।

देय् दबूया केन्द्रीय नायः पवित्र बज्राचार्यया मूपाहांसुइ जूगु उगु ज्याझ्वलय् प्यम्हेसित हनेज्या याःगु खः। बागमती प्रदेशय् नेपालभाषायात सरकारी कामकाजि भाषाया रुपय् लागू याकेगु नितिं ऐन निर्माणया नितिं जनस्तरपाखें भूमिका म्हितादीम्ह दबूया स्वनिगः विशेष प्रदेशया नायः नापं पत्रकार श्रीकृष्ण महर्जन, नेपाल स्वयंसेवी रक्तदाता समाजया केन्द्रीय नायः नापं आः तकया दुने दक्ले अप्वः १७७ क्वः हि दान यानादीम्ह प्रेमसागर कर्माचार्य, समाजसेवी चन्द्रबहादुर/सुभद्र श्रेष्ठ नापं समाजसेवी रविन्द्रप्रसाद नेमकुलयात हनापौ लःल्हाःगु खः।

देय् दबू महालक्ष्मी नगर समितिया नायः विजय महर्जनया सभाध्यक्षताय् जूगु उगु ज्याझ्वलय् देय् दबू स्वनिगः विशेष प्रदेशया नायः श्रीकृष्ण महर्जन, हि दान यानादीम्ह प्रेमसागर प्रजापति, कानुन व्यवसायी नरेश श्रेष्ठ लगायतपिन्सं नेवाः तय्गु समस्यानिसें नेवाः तय्गु थीथी सवालयात कया नुगः खः तयादीगु खः।

बाग्मती प्रदेशया मुख्यमन्त्री शालिकराम जम्कट्टेलं मन्त्रिपरिषद् विस्तार याःगु दु।

मुख्यमन्त्री जम्कट्टेलं एमाले संसदीय दलया नेता जगन्नाथ थपलियायात आर्थिक मामिला लिसे योजनामन्त्रीइ नियुक्त याःगु दु। नवनियुक्त मन्त्री थपलियां म्हिगः बहनि प्रदेश प्रमुख यादव शर्मापाखे पद व गोपनियताया शपथ ग्रहण याःगु खः।

थ्व स्वया न्ह्यः बिहीवाः मुख्यमन्त्री जम्कट्टेलं हाम्रो नेपाली पार्टी (हानेपा)या नेता शैलेन्द्र बज्राचार्ययात संस्कृति, पर्यटन लिसे सहकारीमन्त्रीइ नियुक्त याःगु खः। मुख्यमन्त्री जम्कट्टेलं कन्ह्यः विश्वासया मत काइगु जूगु दु।

शिक्षा, विज्ञान लिसे प्रविधिमन्त्री सुमना श्रेष्ठं मन्त्रालयया कार्यभार कःघागु स्ववाः दुन् हे चर्चाय् वयेगु निति थीथी ज्यायायेगु ज्या न्ह्याकूगु दु।

चर्चाय् वयेगु निति शिक्षक, कर्मचारी व स्थानीय सरकारया अधिकार हस्तक्षेप जुइगु कथं ज्या न्ह्याकूगु दु। उगु ज्याया कारण मन्त्रालयया मातहतय् च्वपि दक्को कर्मचारीपि आतंकित जूगु दु। सक्षम व देश हाँक्कय् याइपि कर्मचारी दय्क दय्क करिब १३ म्ह कर्मचारीपि प्रशिक्षार्थी तयेगु कार्यविधि तयार याःगु खः।

मन्त्रालयय् सूचना प्रविधि शाखाय् माःपि यक्को हे कर्मचारीपिन्स ज्यायाना च्वंगु दु। मन्त्रालयं उमित मन्त्रालयया वेबसाइट अपडेट स्वयेगु बाहेक बालाक्क ज्या बिइफुगु मदुनि। थःके दुगु कर्मचारीयात मछ्यसं थःया नापं दुपिन्त तयेत स्वंगु मन्त्रीया गलत आशय खनेदु।

सरकारया शासकीय प्रबन्ध व व्यवस्था अःखः ज्यायेगु यायेत स्वंगु खने दु धका स्रोतं धाःगु दु। मन्त्रीया उगु निर्णय कानुनीय् न्ह्यसः वयेफु, कर्मचारीया मनोबल तक कुहावयेफु। कार्यविधिइ अप्पो न स्वला तक प्रशिक्षार्थी कायेगु तयारीइ दु। उच्चस्रोतय कथं ज्या यायेगु निति करिब १७ हजार उपलब्ध यायेगु व्यवस्था मिले यायेत्यःगु दु।

तर, मन्त्रालयं मन्त्रालय व मातहतया कार्यालयय् मिलेजु कथं हे प्रशिक्षार्थी ज्यायापि तयेत्यःगु धका स्रोतं दाबी याःग दु।

केन्द्रीय मानन्धर संघया देयन्यक च्वंगु मानन्धर समुदाययात दुथ्याका स्वयम्भू भ्वय् क्वचागु दु। देयन्यक च्वपि मानन्धरपिन्त भ्वय्या नकेगु जिम्मा थुगु दँय् वःघःया वाका देय् वटु सनाः खलः काःगु खः।

अथेहे मेगु दँय्या लागि न्यूरोड पाक्व पुखूद्यां मानन्धर सनाः खलःयात परम्परागत भ्वय्यात व्यवस्थापन यायेगु  जिम्मेवारी लागु दु। ‘स्वयम्भू भ्वय् ग्वसाः ग्वयेगु उलि अपूगु ज्या मखु। जिमिसं भुइख्यलय् भ्वय्या व्यवस्थापन यायेगु लागि जक सच्छि मल्याक स्वयंसेवी परिचालन यानागु दु।’ वटु त्वाःया विजय कुमार मानन्धरं धयादीगु दु।

ज्याझ्वःया कजि नाप संघया सहायक सचिव कृष्ण बहादुर मानन्धरं  ‘जिमिसं नेपाल रेडक्रस सोसाइटी गणबहाः शाखानाप समन्वय याना हिदान न यानागु खः। ज्याझ्वलय् यक्को हे आकस्मिक हिदाना न याये धुकुगु दु।’ धका वयलं धयादीगु दु। ज्याझ्वलय् १०५ क्वःतक हिदानयाम्ह उदेन न्हूसायमियात हना ज्याझ्वः न याःगु खः। थुगु स्वयम्भू भ्वय् २०१० माघ १० गते देवीदास मानन्धरया संयोजकत्वय् गठन जूगु केन्द्रीय मानन्धर संघया ७१ क्वःगु स्थापना दिवस हंगु खः।स्वयम्भुइ जुगु उगु ज्याझ्वलय् समुदाय दुने राजनीतिक नेतृत्वय् थ्यपि जनप्रतिनिधि, ज्या जक्वः याये धुकुपि जेष्ठ नागरिक, उत्कृष्ट कासामि, न्हुगु ब्याहायापि व शिक्षा ख्यलय् थीथी विद्यावारिधीयापिन्त न हंगु खः।

बनेपाया मोहनलाल खिं मानन्धरया लुमन्तिइ स्थापना याःगु कोषं थुगु दँय् डा. भगवानदास मानन्धरयात नगद ५० हजार नाप सिरपा देछागु खः। नेपाल संवतयात अन्तर्राष्ट्रियकरण यायेगु कथं कम्प्युटर प्रविधिनाप स्वागुलि उगु सम्मानयागु खः। । फर्पिङया हरिशंखर जात्रा सञ्चालन याना वयाच्वंगु दक्षिणकाली नगरपालिकाया सुरेन्द्र मानन्धरयात नगद २५ नाप हनापौ देछागु खः। अथेहे, प्रा. डा. जगदीश नारायण मानन्धरं स्थापना यानातःगु बेखा नारायण देव कुमारी राष्ट्रिय प्रतिभा पुरस्कार खुगु दशकनिसे स्वास्थ्य सेवा प्रदान याना वयाच्वंगु क्षेत्रपाटी निःशुल्क चिकित्सालययात नगद ५० हजारनाप हनापौ लःल्हागु खः।

ईमेज च्यानल टेलिभिजनया महाप्रबन्धक लिसे समाजसेवी रघुवर भक्त मानन्धरं प्रा. रामभक्त–सानुनानी मानन्धरया नामय् स्थापना यानातःगु सिरपा डा. राजु, डा. राजभाइ व डा. विनिता मानन्धरयात लःल्हागु दु। ज्याझ्वलय् द्वारिका नारायण–हिरादेवीया नामय् मातृभाषा प्रवद्र्धनार्थ स्थापना जूगु सलिंचा मचा नेवाः सिरपा संवीद व रोनिमा मानन्धरयात लःल्हागु खः। मानविकी संकायय् स्नातकोत्तर तह नेपालभाषा विषयय् अप्पो ल्याःहम्ह अनिल स्थापितयात सत्यतारा सम्मानपाखे हंगु खः। एमबीबीएस, एमडी, प्लस टु, एमए, कम्प्युटर साइन्स, बीई, बीबीए, एसईईइ अप्पो ल्याः हपिन्त हनेज्या यागु खः।

ज्याझ्वलय् बागमती प्रदेशया सांसद लिसे पूर्वमन्त्री माननीय बसन्त मानन्धर, येँ महानगरपालिकाया प्रवक्ता नवीन मानन्धर, रामेछापया सुनापाती गाउँपालिका, काभ्रेया बनेपा नगरपालिका, दक्षिणकाली नगरपालिका, येँ महानगरपालिकाया जनप्रतिनिधि, बाँकेया नेपालगञ्ज, सुनसरीया इटहरी, मकवानपुरको हेटौंडा, पर्साया वीरगन्ज, चितवनया रत्ननगर, स्याङ्जाया क्याक्मेया जनप्रनिधिपिनिगु न ब्बति दुगु खः।

नागरिक उन्मुक्ति पार्टीया अध्यक्ष रञ्जिता श्रेष्ठ चौधरीं सुदूरपश्चिम प्रदेश सरकार त्वःत्यत संसदीय दलया नेतायात निर्देशन बिःगु दु।

श्रेष्ठं थौ शुक्रवाः प्रदेश संसदीय दलया नेता घनश्याम चौधरीयात लिखित निर्देशन बिःगु दु।

वंगु चैत १४ गते टीकापुरय् च्वंगु पार्टी बैठकय् समर्थन लित कायेगु निर्णय जूगु धासे श्रेष्ठं पत्रय् च्वंगु दु, ‘उगु बमोजिम सरकारं पिहावनेत निर्देशन बियाच्वना, मखुसा पार्टीया विधान आकषण जुइ।’