येँ महानगरपालिकाया प्रवक्ता लिसें १७ वडा अध्यक्ष नविन मानन्धरया अबु भगवान मानन्धर मन्त ।

वयकः ८० दँय् मधुमेह लिसें थीथी ल्वया हुनिं थौं चान्हय् ३ बजे मनमोहन अस्पतालय् मदुगु खः। मदुम्ह मानन्धरया अन्तिम संस्कार येँया लुँतिइ यागु खः।

वयकःया छम्ह काय् व स्वम्ह म्ह्याय् व जहान दी।

नेपालभाषा नापं खस नेपाली भाषा मचा साहित्यया च्वमि शान्तदास मानन्धर मंन्त ।

वयकः ९० दँय् येँया वयोधा अस्पतालय् वासः यायेगु झ्वलय् मदुगु खः।

मदुम्ह मानन्धरं न्यागू दशक तक मचा साहित्यया विकास, विस्तार व प्रवर्धनय् योगदान याना वयाच्वम्ह खः।

प्रधानमन्त्री पुष्पकमल दाहाल ‘प्रचण्ड’ नेपाल संवत् नेपाःया मौलिक संवत खः, उकि थुगु संवत सकसिगु मंकाः सवत जुगु खँ धका धयादिगु दु ।

नेपाल संवत् ११४४ या लसताय् न्हूुदँ राष्ट्रिय समारोह समिति थौं मंगलवा वसन्तपुरय् जुगु भिंतुना सभाय् नेपाल संवत हनेगु खँय् सङ्कीर्णता मक्यनेत इनाप यानादिगु दु । “नेपाल संवतयात राष्ट्रिय संवतया मान्यता बिइगुलिं नेवाः समुदायया बुद्धिजीवी, जनतां ताः ई सङ्घर्ष याःगु इतिहास दु।”, प्रधानमन्त्री दाहाल धयादिगु दु, “छुं दँ न्ह्यः तक भ्रमय् दु, नेपाल संवत् धइगु नेवाःतय्गु जक खः। अझ नं प्रष्ट मदु।

” नेपाल संवतयात राष्ट्रिय संवतया मान्यता बिइगुलिं नेवाः समुदय् नं याःगु सङ्घर्षयात उच्च सम्मान यासें प्रधानमन्त्री दाहालं थःगु नेतृत्वया सरकारं २०६५ सालय् नेपाल संवतयात राष्ट्रिय संवत् घोषणा यायेगु निर्णय यानाःगु खः लुँमकादीसे गणतन्त्र नेपाःया न्हापाम्ह प्रधानमन्त्रीया रुपय् थःपिन्सं नेपाल संवतयात राष्ट्रिय संवतया मान्यता बियाःगु स्मरण यानादिल ।

वयकलं निक्वःगु कार्यकालय् नेपाल संवतयात कार्यान्वयन यायेगु प्रक्रिया न्ह्याकागु खँ कनादिगु खः। “राष्ट्रिय संवत् जक धयाः मगाः, राष्ट्रिय संवतया रुपय् नेपाल सरकारया ‘माइन्यूट’ व फुक्क दस्तावेजय् नेपाल संवतयात प्रयोग यायेगु निर्णय यानाः”, प्रधानमन्त्री दाहालं धयादिल, “जित लसता व गर्व दु, सिङ्गो मन्त्रिपरिषदं सर्वसम्मत कथं पारित यानाःगु दु, फुक्क सरकारी दस्तावेजय् नेपाल संवतया उल्लेख यायेगु अनिवार्य यायेगु निर्णय जुगु दु ।”

साहित्यकार नाप संस्कृतिकर्मी सूर्यप्रसाद लाकोजूया “पनौतीका केही जात्रापर्वहरू”या निगुगु संस्करण पितब्बज्या जुगु दु।

उगु सफू छगु ज्याझ्वः दथुइ संस्कृतिकर्मी लिसे इतिहासकार प्रा.डा. पुरुषोत्तमलोचन श्रेष्ठ, पनौती नगरपालिकाया नगरप्रमुख रामशरण भण्डारी, निवर्तमान नगर प्रमुख भीम न्यौपाने व च्वमि सूर्य लाकोजूपिन्स मंकाः कथं विमोचन यानादीगु खः।

उगु ज्याझ्वलय् विशिष्ट अतिथि डा.पुरुषोत्तमलोचन श्रेष्ठं नेपाःया इतिहासय् पनतिया थाय् दकलय् च्वय् दु व पनति ऐतिहासिक  थाय् या बारेय् मालिइगु ज्याय् थुगु सफूति च्वयातःगु पनतिया जात्रापर्व सान्दर्भिक सफू जुगु धका धयादीगु खः। मेम्ह विशिष्ट पाहाँ पनौती नगरपालिकाया नगरप्रमुख रामशरण भण्डारीं पनति म्हसिकेगु निति थुगु सफूति यक्को ग्वाहालि जुइ धका धयादीगु खः।

निवर्तमान नगर प्रमुख भीम न्यौपानें देय् या तिसा कथं लाकोजूया सफू पनतिइ च्वपिनिगु जक मखु सकसित खल् धका धयादीगु खः। टिप्पणीकार तुयुकाजी ताम्राकार, समाजसेवी लिसे पनौती पर्यटन विकास केन्द्रया अध्यक्ष पुरुषेत्तम कर्माचार्य, वडा अध्यक्ष सविन ताम्राकार, पुरुषोत्तम अधिकारी, शम्भुलाल श्रेष्ठ लगायतपिन्स सफू सकसिया ब्बनेमाःगु धका बिचाः तयादीगु खः।

पहिचानया आन्दोलनयात न्ह्यःने यंकेगु नितिं नेवाः सरोकार मञ्च नांया संस्था घोषणा याःगु दु।

येँया नेपाः ब्यांक्वेटय् न्हूदँया लसताय् वंगु शनिवाः जूगु छगू ज्याझ्वलय् थथे सरोकार मञ्चया घोषणा याःगु खः। थुगु सरोकार मञ्चया संयोजक कथं डा. केशवमान शाक्ययात ल्यःगु दु।

संयोजक शाक्यं शनिवाःया ज्याझ्वलय् मञ्चया ज्याखँयात कयाः कार्यपत्र न्ह्यब्वयादीगु खः। उगु कार्यपत्रयात कयाः पहिचानवादी नेता कथं म्हसीका दुपिं मुक्ति प्रधान, दिलीप महर्जनलिसें थीथी व्यक्तिपिन्सं न्वःवानादीगु खः।

ज्याझ्वलय् न्हूदँ समारोह समितिया नायः प्रा.डा.नरेशमान बज्राचार्यं न्हूदँया लसताय् सकलसित भिंतुना देछानादीगु खःसा नेवाः अभियन्ता सुजीव बज्राचार्यं सकलसित कःघानाः नेवाः सरोकार मञ्च न्ह्याकेमाःगु विचाः तयादीगु खः।

ज्याझ्वःरुपा महर्जनं न्ह्याकादीगु खः।