लुँ तोलां थौं सच्छि थहावंगु दु। लुँ तोलां सच्छि थहावना १ लाख १२ हजार २ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे, वहः तोलां न न्यातका थहावःगु दु। वहः तोलां न्यातका थहावनां १ हजार ४ सय ३० रुपैयाँ न कारोबार जूगु दु धका महासङ्घं धाःगु दु।

नेवाः देय् दबूया नीगुक्वःगु बुसादँया लसताय् छत्रपाटी प्यालेसय् छगू ज्याझ्वः जुगु दु।

देय् दबूया वरिष्ठ न्वकु नापं कार्यबहाक नायः चन्द्र लाल राजभण्डारीया सभाध्यक्षताय् जुगु उगु ज्याझ्वलय् गृह नापं उपप्रधानमन्त्री नारायणकाजी श्रेष्ठ मूपाहाँ कथं झायादीगु खः।

उगु ज्याझ्वलय् नारायणदेवी तीर्थ समाज सेवा सिरपा, नारायणदेवी तीर्थ व्यवसायी प्रोत्साहन सिरपा व गिरिधरलाल नेपालभाषा सेवा सिरपा नं थीथी व्यक्ति व संस्थायात लःल्हाःगु खः ।

नारायणदेवी तीर्थ समाज सेवा सिरपा डा. महेशमान श्रेष्ठ व नेवाः समाज भरतपुर चितवनयात लः ल्हाःगु खःसा नारायणदेवी तीर्थ व्यवसायी प्रोत्साहन सिरपा नेपालमण्डल टेयिलभिजन यलयात लःल्हाःगु खः। ज्याझ्वलय् समाजसेवि पञ्चवीरसिंह तुलाधरयात बेतालि चीका, दोसल्ला न्ययेका हनेज्या याःगु खः ।

प्रा. प्रेमशान्ति तुलाधर ल नेपाल लिपि गुथियात गिरिधरलाल नेपालभाषा सेवा सिरपा लःल्हाःगु खः । लिपि गुथिपाखें गुथिया नायः अनिल स्थापितं उगु सिरपा लःल्हाना कयादीगु खः।

ललितपुर उद्योग वाणिज्य संघया महासचिव रुपकमान महर्जनं ४४ क्वःगु साधारण सभा व अधिवेशनय् अध्यक्ष पदय् थःगु उम्मेवारी घोषणा यानादीगु दु।

शंखमूलय् च्वंगु यल दरबारय् छगू पत्रकार सम्मेलनयासे वयकलं ललितपुर उद्योग वाणिज्य संघया अध्यक्षय् थःगु उम्मेवारी घोषणा यानादीगु दु। संघया महासचिव जिम्मेवारी उत्कृष्ट रुपं निर्वाह यानागुलि वयकलं समाज कल्याणया निति अध्यक्ष पदया दाबी यानादीगु दु।

वंगु डेढ दशकनिसे संघया थीथी पदय् च्वना उद्योग व्यवसायीपिनिगु समस्याय् थःम्हेसिया ग्वाहालि याना वयाच्वनागु दु धका धयादीगु खः। वयकः ललितपुर खाद्य व्यापार संघया अध्यक्ष तक जुयादी । ‘समाजया सेवा यायेत व समस्या जुयाच्वपिन्त ग्वहालि यायेत जिं अध्यक्ष पदय् उम्मेदवारी बियागु खः’ अध्यक्ष पदय् उम्मेदवारी बियागु कारण धइगु, ‘वंगु संघया थीथी पदय् च्वना उद्योगी पासापि नाप ल्हाः मिले याना न्ह्या वनेगु जुइ धका धयादीगु खः।

वइग दिं न थथे वयकःपिनिगु ग्वाहालि दइ थःत दइगु भलसा कयाच्वना।’ ‘जित नापं मेपि पासापिन्त न पूरा भलसा दु कि जिमिसं जिमिसं उद्योगीपिनिगु समस्या समाधान याना न्ह्या वनेगु जुइ।

वंगु दिं मतदातापिन्स थःगु बहुमूल्य मत बिया जिमित त्याके बिइगु जुए व, थुगु पटक न वयकःपिन्स विश्वास याना जिमित त्याके बिइगु धइगु खँय् यानाच्वना’, धका उगु पत्रकार सम्मेलनय् वयकलं धयादीगु खः।

थ्व हे वइगु असोज १९ गते यलया शंखमूलस्थित यल दरबारय् संघया साधारणसभा व २० गते स्टाफ कलेज, जावलाख्यलय् निर्वाचन जुइ।

येँ महानगरपालिकाया उपप्रमुख सुनिता डंगोलं पूर्व श्रीकुमारी, पूर्व श्री गणेश व पूर्व श्री भैरवपिन्त भत्ता लःल्हागु दु।

येँ महानगरपालिकां श्री कुमारीयात मासिक १८ हजार रुपैयाँ, श्री गणेश व श्री भैरवयात मासिक १५ हजार रुपैयाँ लःल्हागु दु। आर्थिक दँ २०७०÷०७१ निसे पूर्व श्री कुमारी, श्री गणेश व श्री भैरवपिन्त श्रीपद भत्तावापत बिया वयाच्वंगु दु।

शुरुया इलय् पूर्वकुमारीपिन्त लच्छिया १० हजार रुपैयाँ, पूर्व गणेश व भैरवपिन्त लच्छिया ८ हजार रुपैयाँ बिया दच्छि छक्वलं बिया वयाच्वंगु खः । श्रीपद भत्ता कयादीपि पूर्व श्री कुमारीपि वि. सं. १९९९ सालय् जीवित द्यः कथं प्रतिस्थापित जुयादीम्ह नानीशोभा शाक्यनिसे २०७४ सालतक प्रतिस्थापित जुयादीम्ह मतिना शाक्यनापं गुम्ह कुमारीपि दु।

उगु ज्याझ्वलय् ज्येष्ठया कारण नानीशोभा (वि. सं. १९९९—२००६) उपस्थित जुयादीइ मफुगु खः। हर्षलक्ष्मी शाक्य (वि. सं. २०१२—२०१८) व प्रीति शाक्य (वि. सं. २०५८—२०६५) देय् पिने जुयादीगुलि उपस्थित जुयादी मफुगु खः। नानीमैयाँ शाक्य (वि. सं. २०१८—२०२६), सुनिना शाक्य (वि. सं. २०२६—२०३५), अनिता शाक्य (वि. सं. २०३५—२०४१), रश्मिला शाक्य (वि. सं. २०४१—२०४८), अमिता शाक्य (वि. सं. २०४८—२०५८) व मतिना शाक्य (वि. सं. २०६५—२०७४) उपस्थित जूया भत्ता कयादीगु खः।

अथेहे पूर्व श्री गणेशपि मध्ये कन्हैया शाक्य (वि. सं. २०३४—२०४२) उपस्थिति जुया मदीइसा गणेश शाक्य (वि. सं. २०१२—२०२४), पुरुषोत्तम शाक्य (वि. सं. २०२४—२०३४), सञ्जु शाक्य (वि. सं. २०४२—२०४६), प्रमनराज शाक्य (वि. सं. २०४६—२०५७), कपिलरत्न शाक्य (वि. सं. २०५७—२०६७), संवेग शाक्य (वि. सं. २०६७—२०७७) पिन्स भत्ता कयादीगु खः ।

भैरवपाखे इन्द्रबहादुर शाक्य (वि. सं. २००६—२०१४), शुभरत्न शाक्य (वि. सं. २०१४ — २०२४), बालपुरुषोत्तम शाक्य (वि. सं. २०२८ — २०३७), श्याम शाक्य (वि. सं. २०३७—२०४४), भैरव शाक्य (वि. सं. २०४४ — २०५६) व रुजन शाक्य (वि. सं. २०६५—२०७७) पि उपस्थित दुगु खः। राजु शाक्य (वि. सं. २०५६—२०६५) धाःसा देय् पिने जुगुलि उपस्थित जूया मदिइ।

एनसेलया १८ क्वःगु दँ मुज्याया लसताय् यलया कुपन्डोल वडा नम्बर १ य् सिमा पिइगु ज्या जूगु दु।

यल महानगरपालिका नापं सहकार्य याना निसः सिमा पिइगु ज्या जूगु दु। उगु ज्याझ्वःया निति एनसेलया सिईओ जाब्बोर कायुमोभं छेँ, परिवार व सिमा मदय्क मगाः धका धयादीसे वहे कारणं सिमा पिइगुलि महत्त्व बियागु खः धका धयादीगु खः ।

उगु ज्याझ्वलय् मेयर चिरीबाबु महर्जन व एनसेलका सिईओ कायुमोभ न वइगु दिं सहकार्य याना न्ह्या वनेगुलि निरन्तरता बिइगु जुइ धका धयादीगु खः।