मेयर बालेन शाहयात चुनावी बचं लुमंकेगु कथं न्ह्यन्हुनिसे राष्ट्रिय सभागृह न्ह्यने दना वयाच्वंपि अभियन्ता ईः नाप येँ महानगरपालिकां सम्वाद आः तक याःगु मदुनि। निरन्तर दना च्वपि ईः या तुति मना वयाच्वंगु दु।

सोमवाः ईः दना वयाच्वंगु खः। येँ महानगरया छम्ह नगर प्रहरी वया, ‘मेयरसाबं माला च्वंगु दु, दुहा वयेमालं।’ ईः अज्जु चाःगु दु। यदि महानगरं सम्वाद याये चाहे जुगु खःसा सूचं बिया वार्ता यायेफइ। वार्ताय् च्वनेत अभियन्तापि तयार दुगु खः।

वयकलं धयादीगु दु, ‘वार्ता यायेगु खःसा म्हतिइ छ घौ बिइमाः। जिमिगु पक्षपाखे कानुनी जानकार, सहरी विकासया जानकार पासापि वयेमाः।’ नगर प्रहरीं ख्यायेत स्वंगु दु, ‘आः नापलायेगु खःसा नापलायेमाः मखुसा नापलाये थाकुइ।’

अभियन्ता ईः महानगरं वार्ता चाहे जूसा थःपि तयार दु धका धाःगु दु । तर महानगरं नेतृत्व वार्ता यायेगु स्वया वार्ता यायेत सःतागु खः, मवं धका प्रचार जक यायेत स्वंगु धका धाःगु दु।

राष्ट्रिय फोटो पत्रकार समूह (एनएफपीजे) या २६ क्वःगु दँ मुँज्या क्वचाःगु दु। उगु ज्याझ्वलय् हरिगोपाल प्रधान फोटो पत्रकारिता सम्मान याःगु दु।

ज्याझ्वलय् न्याःगु विधाय् उगु सम्मान लःल्हाःगु खः। साहसिक फोटो पत्रकारिता पुरस्कार कल्पना महर्जन, संस्कृति सम्पदा पत्रकारिता पुरस्कार राष्ट्रिय समाचार समितिया रत्न कृष्ण श्रेष्ठ, मनोरञ्जन फोटो पत्रकारिता पुरस्कार ह्याप्पी पोखरा डटकमया सुरेशकुमार श्रेष्ठ, खेल पत्रकारिता पुरस्कार नेपाल स्पोर्टस् डटकमया विजय महर्जन व पर्यटन फोटो पत्रकारिता पुरस्कार टुमेल डटकमया रिजम अम्बी तोलाङयात लःल्हाःगु खः।

पूर्व सशस्त्र प्रहरी नायब महानिरीक्षक माधव थापां स्थापना याःगु ‘माधव थापा जोखिमपूर्ण फोटो पत्रकारिता सम्मान’ मुकुन्द कालिकाटेयात लःल्हाःगु खः।

सरकार होडिङ बोर्ड वा मेमेगु प्रचार सामग्रीइ विदेशी कलाकार तयेगु फोटो मछ्यलेत निर्देशन बिःगु दु। होडिङ बोर्ड, सवारी साधन वा मेगु छु न माध्यमय् विज्ञापन यायेगु इलय् स्वदेशी कलाकार वा मनू तयोगु किपा विज्ञापन बोर्डं सूचना जारी याःगु दु।

विज्ञापन नियमावली (न्हापागु संशोधन) २०८० या नियम ९ (क) या उपनियम (३) कथं विदेशी कलाकार वा मनू तयेगु किपा छ्यले मदइगु व्यवस्था याःगु दु।

विज्ञापनदाता, विज्ञापन एजेन्सी व सञ्चार माध्यमयात सम्बोधन यासे बोर्डं अज्यागु किपा छ्यला तःगु दु सा चिइकेत न धाःगु दु।

नेवाः न्ह्यलुवाः नापं वरिष्ठ उपन्यासकार मल्ल के. सुन्दरया न्हूगु उपन्यास ‘कुमारी’ पिहां वइगु जूगु दु । थ्व हे वइगु यँयाः पुन्हि कुन्हु कुमारी सालीगु न्हि कुन्हु हे थुकिया विमोचन याइगु ज्याझ्वः दु।

उपन्यासकार मल्लया थ्व खुगूगु उपन्यास खः । नेवाः समाजय् प्रचलित कुमारी द्यःलिसे स्वानाच्वंगु किंवदन्तीया लिधंसाय् थ्व उपन्यास च्वयातःगु दु ।

थःगु देशया अस्तित्व बचे यायेगु लागिं थम्हं ययेका तयाम्ह प्रेमि चण्डासुरयात स्यानाः राष्ट्रभक्तिया दसु ब्वयादीम्ह कुमारीया गौरवमय गाथा थ्व उपन्यासय् चित्रित जुयाच्वंगु दु । च्वमि मल्ल के. सुन्दरया कथं थुगु उपन्यासं नेवाः संस्कृति व नेवाः मिसापिनि साहसया किपा ब्वयेगु कुतः जुयाच्वंगु दु ।

थ्वहे वइगु यँयाः क्वःनेयाः (असोज ११ गते) थुकिया विमोचन जुइगु ज्याझ्वः दु । ‘कुमारी’ उपन्यासया विमोचन येँया न्याम्ह पुलांपिं लाय्कू कुमारीपिनिगु हे ल्हातिं जुइगु ग्वसाः जुयाच्वंगु दु ।

काया अष्टमि कुन्हु सक्वय् चच्छि देबि प्याखं पिकाःगु दु। सक्वय् देबी, चण्डि व भैरब धका स्वम्हः देबीपिन्त मालश्री राग म्येः हालां खिं, ताः, पँय्ता, नायखिं, छुस्या व माय्लिं पुना प्याखँ ल्हुकिगु याइ।

देवगणपिन्त वसः तिसा, ख्वापाः, मतु किकिंपाः खड्ग, पात्रां छायपिइक देबी व चण्डिपिन्त ह्याउगु वसः व ह्याउगु हे ख्वाःपाः छायपिकिसा भैरब छम्हेसित हाकु वसः व हाकु ख्वाःपाः छायपिकिगु खः।

थुगु काया अष्टमि कुन्हु नासःपुजा याना न्ह्याकिगु देबी प्याखँ पिदनेत सक्वया गुँ बिहारय् बिराजमान जुयादिम्हः ह्याँउख्वाःमाःजु द्यःयाथय् (बज्रयोगिनि) कलः पुजा याना द्यःयाःगु किकिंपाः स्वपाः व स्वाँ हया देबी जुइपिन्त छ्यनय् छुकिगु याइ।