सेयर बजाः थौ २८०० ल्याखं थहावंगु दु। बिहीवाः कारोबार जुयाच्वंगुलि आःतक नेप्से परिसूचक २८०२ ल्याखं थहावःगु दु।

आःतक ८ अर्ब ४४ करोडया कारोबार जुइ धुकुगु दु। १५८ कम्पनीया भाः थहावंगु दु सा ७८ कम्पनीया भाः कुहावःगु दु। अथेहे न्यागु कम्पनी स्थिर जूगु दु। बिहीवाः बीमा सेक्टरं बजाःया नेतृत्व याउगु दु।

जीवन बीमा समूह दकलय् अप्पा ५.८९ प्रतिशत थहावःगु दु। अथेहे लगानी समूह ४.२८ व निर्जीवन बीमा समूह ४.३१ प्रतिशत थहावंगु दु। हाइड्रोपावर समूह १ प्रतिशत क्वय् कुहावःगु दु।

सिटी होटल, कुथेली बुकरी स्मल हाइड्रोपावर, श्रीइन्भेस्टमेन्ट फाइनान्सया भाः १० प्रतिशत थहावःगु दु। कारोबार रकमया आधारय् हिमालयन रिइन्स्योरेन्स, एचआईडीसीएल, प्रोग्रेसिभ फाइनान्स, सीईडीबी हाइड्रोपावर व निफ्रा आःतक न्ह्यने खनेदुगु दु।

संगीत गुरु गुरुदेव कामत मन्त।

सिरहाय् थःगु हे छेँय् थौ सुथय् ८ बजे मदुगु धका वयकःया काय् समीर कामतं धाःगु दु। ६९ दँ दुम्ह कामतया अन्त्येष्टि थौ हे यायेगु तयारीइ दु।

तधीम्ह काय् कतारय् दुगुलि छेँ लिहावयेवं हे अन्त्येष्टि याइगु जुइ धका समीरं जानकारी बिउगु दु। शास्त्रीय संगीतय् नांजाम्ह गुरुदेव कामतया निगः जलास्येँ समस्या वःगु धका वंगु चैतय् जक सिउगु खः।

उपचारया लागि आर्थिक संकट वयेवं थःगु परिवारपि सिराहाया पोखरभिन्डाय् लिहावंगु खः।

नेकपा एमालेया केन्द्रीय सचिवालय बैठक थौ च्वनिइगु जुगु दु। बैठक येँ हनुमानस्थानस्थित होटेल बसेराय् सुथय् ११ बजे च्वनिइगु जुगु दु।

च्यासलय् च्वंगु केन्द्रीय कार्यालयय् खुसि बाः वया लः दुहावःगुलि होटेलय् बैठक च्वनिइगु जुगु दु धका एमालें धाःगु दु।

बैठक नेतापिनिगु कार्यविभाजन, समसामयिक राजनीतिक अवस्था व सरकारया ज्या प्रभावकारी दयकेगु विषय छलफल जुइ धका एमालें धाःगु दु।

शेयर बजारय् थौ कारोबार रकमय् न्हुगु रेकर्ड कायम जूगु दु।थौ छन्हु हे २१ अर्ब ९१ करोड ११ लाख रुपैयाँ बराबरया शेयर कारोबार जूया ऐतिहासिक रेकर्ड कायम जूगु दु।

थ्व स्वया न्ह्यः २०७८ साल साउन ३१ गते २१ अर्ब ६४ करोड ७६ लाख रुपैयाँ बराबरया शेयर कारोबार जूगु खः। हिमालयन रिइन्सुरेन्स कम्पनीया जक ८४ करोड ४९ लाख रुपैयाँ बराबरया शेयर कारोवार जूगु दु।

कारोबार रकम रेकर्ड जूगु थौ या दिं शेयर बजाः परिसूचक नेप्से ६४ दशमलव २५ ल्याखं थहावना २ हजार ७ सय ६० दशमलव ९० विन्दइ थ्यःगु दु। दक्को समूहया शेयर थहावःगुलि बीमा, फाइनान्स, होटल, विकास बैंक, उत्पादन, व्यापार समूहया शेयर यक्को ल्याखं थहावःगु दु। झीगु कम्पनीया शेयर १० प्रतिशतं थहावःगु दु।

अथेहे झींछगु कम्पनीया शेयर ९ प्रतिशत स्वया अप्पो कुहावःगु दु। समग्र बजाः थहावंगु दिं सिभिल बैंक डिबेन्चर २०८८ या शेयर धासा झन्डै ८ प्रतिशतं कुहावःगु दु।

धरान उपमहानगरया खानेपानी आपूर्ति बोर्डं लः जडान शुल्क व महसुल अप्वयेकूगु दु।

नगर प्रमुख हर्क साम्पाङया अध्यक्षताय् दूगु धरान खानेपानी व्यवस्थापन बोर्डं साउन १ गतेनिसें लागू जुइगु कथं लःया महसुल व शुल्क अप्वयेकूगु दु। राजनीतिक दल व जनप्रतिनिधिपिन्सं लःया महसुल थकाःगु सम्बन्धय् सहलह मजूगु खँ धका धाःगु दु।

मेयर हर्क साम्पाङं एकतर्फी कथं कर अप्वयगुलि जनप्रतिनिधिलिसें राजनीतिक दलत नं असन्तुष्ट जूगु दु। झीगु राजनीतिक दलं आइतवाःनिसें बोर्डया न्हूगु नियमावलीइ चरणबद्ध विरोध यायेगु घोषणा याःगु दु। महसुल म्हो यायेत सरोकारवाला पक्षलिसे सहलह यायेगु घोषणा याःगु पार्टीं वइगु १८ गते फुक्क वडाय् ध्यानाकर्षण पौ लःल्हायेगु व साउन २० गतेनिसें धर्ना सुरु यायेगु धका धाःगु दु।

पुलांगु शुल्क कायम यायेत दलतसें साउन ११ गते बोर्डयात ७२ घण्टाया अल्टिमेटम ब्यूगु खः। नेपाली कांग्रेसया नगर अध्यक्ष श्याम पोखरेलं मेयर हर्क साम्पाङयात जानकारी बिइधुंकाः बोर्डया अध्यक्ष तकं जुयाच्वंम्ह मेयर हर्क साम्पाङं खँ मन्यगुलि आन्दोलनया घोषणा याःगु खः।