नेपाल आदिवासी जनजाति पत्रकार महासङ्घ (फोनिज) न नेपाल पत्रकार महासङ्घं गलत इतिहास भिंकेत ताः ईनिसे संघर्ष यानावच्वंगु खः।

तथ्य व प्रमाणया आधारय् नेपाल पत्रकार महासङ्घ (तत्कालीन नेपाल पत्रकार संघ) या संस्थापक अध्यक्ष सत्यनारायण बहादुर श्रेष्ठ हे खः धका धया वयाच्वंगु खः।आः सत्यनारायण बहादुर श्रेष्ठयात नेपाल पत्रकार महासङ्घया संस्थापक अध्यक्ष तत्काल कायम यायेत माग यासे आन्दोलनया ज्याझ्वः सार्वजनिक याःगु दु।

आन्दोलनया ज्याझ्वः थुकथं दु

१) २०८० फागुन १४ गते सोमवाः सुथय् ७ बजे फोनिजया दक्को समितिया नेतृत्वनाप आन्दोलन बारे भर्चुअल सम्वाद यायेगु ।

२) २०८० फागुन १५ गते सुथय् ११ बजेय् नेपाल पत्रकार महासङ्घया दक्को समितिइ फोनिजया दक्को समितिपाखे न्ह्यय् न्हु अल्टिमेटमनापं ‘सत्यनारायण बहादुर श्रेष्ठयात नेपाल पत्रकार महासङ्घया संस्थापक अध्यक्ष कायम या’ धइगु मागनाप स्मरणपौ लःल्हायेगु ।

३) २०८० फागुन १६ गते सुथय् ११ बजे सरोकारवाला पत्रकारजन्य संघसंस्था व व्यक्तिपि नाप सहलह याइगु ।

४) फागुन १७ गते ‘सत्यनारायण बहादुर श्रेष्ठयात नेपाल पत्रकार महासङ्घया संस्थापक अध्यक्ष कायम याः’ धइगु सन्देश फोनिजया दक्को सदस्यतय्थ नेपाल पत्रकार महासङ्घया अध्यक्ष विपुल पोखरेल, वरिष्ठ उपाध्यक्ष रमेश विष्ट व महासचिव रोशन पुरीयात मोबाइलय् छ्वइगु।

५) फागुन १९ गते फोनिजया दक्को सदस्य तय्त ‘सत्यनारायण बहादुर श्रेष्ठयात नेपाल पत्रकार महासङ्घया संस्थापक अध्यक्ष कायम याः’ धइगु मागनापं सन्देश छ्वंगू एसएमएसया स्कृनसट व संस्थापक अध्यक्ष सत्यनारायण बहादुर श्रेष्ठया किपा फेसबुकलगायत सामाजिक सञ्जालय् पोष्ट याइगु।

६) स्मरणपौ लःल्हागु तिथिया न्ह्य् न्हु दुने माग पूरा मजूसा फागुन २१ गते नेपाल पत्रकार महासङ्घया केन्द्र, प्रदेश व दक्को जिल्ला शाखाय् अनिश्चितकालीन तालाबन्दी यायेगु।

त्रिभुवन विश्वविद्यालया उपकुलपतिइ प्रा. डा. केशरजंग बराल नियुक्त जूगु दु।

त्रिविया कुलपति लिसे प्रधानमन्त्री पुष्पकमल दाहाल प्रचण्डं थौ बिहीवाः बरालयात उपकुलपति नियुक्त याःगु खः। प्रधानमन्त्री प्रचण्डं उपकुलपति सिफारिसया लागि शिक्षा, विज्ञान लिसे प्रविधिमन्त्री अशोक राई नेतृत्वय् समिति गठन याःगु खः।

समितिं चित्रबहादुर बुढाथोकी, बराल व टंकनाथ धमलाया नां सिफारिस याःगु खः।

प्रधानमन्त्रीं न्हापागु थासय् लाम्ह बुढाथोकीयात त्वःता बरालयात उपकुलपतिइ नियुक्त याःगु खः। सिफारिस समिति स्रोतया कथं थीथी मापदण्डया आधारय् बिःगु ल्याखं बुढाथोकी २ अंकं न्ह्यने खनेदुगु खः।

अन्तर्राष्ट्रिय मातृभाषा दिवसया लसताय् नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबुलिं ‘मातृभाषा पत्रकारिताया महत्व’ विषयस अन्तरक्रिया ज्याझ्वः जूगु दु।

दबूया नायः नृपेन्द्रलाल श्रेष्ठया सभाध्यक्षताय् जुगु उगु ज्याझ्वलय् नेपालभाषं पिहावयाच्वंगु अनलाइन, पत्रिका, टेलिभिजन नाप रेडियोय् ज्या यानाच्वपि पत्रकारपिन्स ब्बति कयादीगु खः।

ज्याझ्वःया मूवक्ता कथं नेपालभाषा टाईम्सया सम्पादक सुरेशकिरण मानन्धरं मातृभाषा पत्रकारिताया महत्वया बिषय न्ववानादीगु खः।

ज्याझ्वःया कजि दबूया ल्युदांभरि तेजनारायण महर्जनं न्ह्याकादिगु उगु ज्याझ्वलय् दबूया पदाधिकारी नापं थीथी मिडियाय् ज्या यानाच्वपिन्स ब्बति कयादीगु खः।

येँ महानगरपालिका २४ वडाया निवर्तमान वडाध्यक्ष बालकृष्ण श्रेष्ठ मन्त।

म्हिगः बहनि ८ बजेय् नर्भिक अस्पातलय् ७९ दँय् मदुगु खः। वयकःया काय् स्वम्ह व म्ह्याय् छम्ह दी।

राष्ट्रिय योजना आयोगया उपाध्यक्ष डा. मीनबहादुर श्रेष्ठ नेतृत्वय् नेपाली प्रतिनिधि मण्डल थाइल्याण्डया बैंकय् प्रस्थान याःगु दु। एशिया प्यासिफिक फोरम अन सस्टेनेवल डेभलपमेन्ट ज्याझ्वलय् ब्बति कायेगु निति उपाध्यक्ष श्रेष्ठ नेतृत्वया बैंककय् वःगु ख।

उपाध्यक्ष श्रेष्ठ नेतृत्वया प्रतिनिधिमण्डलय् आयोगया सदस्य डा. रामकुमार फुयाल, सचिव डा. तोय नारायण ज्ञवाली, सहसचिव महेश भट्टराईपि वःगु खः। बैंकय् संयुक्त राष्ट्र संघया सम्मेलन केन्दय् मंगलवाःनिसे शुक्रवाःतक न्ह्याइगु जुगु दु।