दोलखा केन्द्रविन्दु जूया थौं सुथय् भुखाय् ब्बःगु दु।

थौ सुथय् ४ बजे जूया ५८ मिनेतय् दोलखाया हाटडाँडा केन्द्र जूया ४.१ म्याग्निच्युडया भुखाय् ब्बःगु दु धका राष्ट्रिय भूकम्प मापन नाप अनुसन्धान केन्द्रं धाःगु दु।

भुखाय् धक्का दोलखा नाप जःखः जिल्लाय् तक महसुस जुगु धका धाःगु दु।

आदिवासी जनजाति उत्थान राष्ट्रिय प्रतिष्ठानं दँय् दसं बियावया च्वंगु मातृभाषा राष्ट्रिय सेवा पुरस्कार थुगु दँय् जनकवि दुर्गालाल श्रेष्ठयात लःल्हाइगु जूगु दु।

अन्तर्राष्ट्रिय मातृभाषा दिवसया लसताय् थ्वहे वइगु फागुन ९ गते बुधवाः वय्कःयात छगु ज्याझ्वः दथुइ थुगु पुरस्कार लःल्हाइगु धका प्रतिष्ठानं विज्ञप्ति पितबियाः जानकारी बिउगु दु ।

वय्कःयात छगु ज्याझ्वः दथुइ संघीय मामिला लिसे सामान्य प्रशासन मन्त्री अनिता देवीपाखें छगु लखं नगद नाप सिरपा लःल्हाइगुु जानकारी बिगु खः। वय्कलं नेपाली साहित्यया नापं नेपाल भाषाया साहित्य उत्थान व विकासय् अतुलनीय योगदानयागु उच्च मूल्याङ्कन यासें उगु पुरस्कार बिइ त्यंगु खः।

थ्व पुरस्कार थ्व सिवे न्ह्यः साहित्यकार तिलक विक्रम नेम्वाङ व वाङ्गमय शताब्दी पुरुष संस्कृतिविद् डा.सत्यमोहन जोशीयात लःल्हाय् धुंकुगु दु।

मेलम्ची खानेपानी आयोजनाय् भ्रष्टाचार जूगु दाबी यासे खानेपानी मन्त्रालयया तत्कालीन स्वम्ह सचिव नापं झिन्याम्ह विरुद्ध भ्रष्टाचार मुद्दा दायर याःगु दु ।

अख्तियारं भ्रष्टाचारय् संलग्न जूगु द्धपनय् परामर्शदाता व निर्माण कम्पनी विरुद्ध न मुद्दा दायर याःगु दु। अख्तियारं मेलम्ची खानेपानी आयोजनाया ठेकेदारयात न रकम भुक्तानी याःगु इलय् अनियमितता याःगु द्धपनय् उमिगु विरुद्ध मुद्दा दायर याःगु खः।

अख्तियारं मेलम्ची खानेपानी विकास समितिया तत्कालिन बोर्ड अध्यक्षपि डा. सञ्जय शर्मा, भीमप्रसाद उपाध्याय, गजेन्द्रकुमार ठाकुरयात प्रतिवादी दयका मुद्दा दायर याःगु दु । उपि स्वम्ह खानेपानी मन्त्रालयया सचिवया हैसियतं मेलम्ची खानेपानी विकास समितिया बोर्ड अध्यक्ष जूगु खः। अख्तियारं अर्थ मन्त्रालयया तत्कालिन सहसचिव नाप मेलम्ची खानेपानी आयोजनाया बोर्ड सदस्य मुकुन्दप्रसाद पौडेल विरुद्ध न मुद्दा दायर याःगु दु ।

खानेपानी मन्त्रालयया तत्कालिन सचिव सञ्जय शर्मा व पौडेलनाप अख्तियारं ६ करोड ९७ लाख रुपैयाँ विगो माग याःगु खः। तत्कालीन सचिव भीमप्रसाद उपाध्याय विरुद्ध ४ करोड ११ लाख बिगो मागदावी याःगु दु।

अथेहे मेम्ह सचिव गजेन्द्रकुमार ठाकुरविरुद्ध ६० करोड ४९ लाख रुपैयाँ विगो मागदावी याःगु धका अख्तियार दुरुपयोग अनुसन्धान आयोगं धाःगु दु । अख्तियारं मेलम्ची खानेपानी आयोजनाया तत्कालीन् बोर्ड सदस्य रुद्रसिंह तामाङ, चन्द्रबहादुर थापाविरुद्ध न भ्रष्टाचार मुद्दा दायर याःगु दु।

येँ महानगरपालिकाया तत्कालिन कार्यकारी अधिकृतया हैसियतं बोर्ड सदस्य जूम्ह तामाङ थौकन्ह्यः अध्यागमन विभागया महानिर्देशक जूयाच्वंगु दु। अख्तियारं ११ करोड ९ लाख रुपैयाँ बिगो मागयासे भ्रष्टाचार मुद्दा दायर यायेवं आः निलम्बनय् लागू दु। अख्तियारया प्रवक्ता नरहरि घिमिरेया कथं ठेकेदारयाके गैरकानुनी रकम भुक्तानी यासे राज्यकोषपाखे ८९ करोड ८ लाख रुपैयाँ हानीनोक्सानी याःगु द्धपनय् मुद्दा दायर यानागु धका धाःगु दु।

एनजीओ फेडरेशन नेपाल व ट्रेड यूनियनया मंकाः ग्वसालय् “वर्ल्ड शोशल फोरम” या ज्याझ्वः मेगु बिश्व संम्भव दु धइगु मू नारा ज्वना छगु ज्याझ्वः याःगु दु

येँया भृकुटीमण्डप, सभागृह, टूरिज्यम बोर्ड, रत्न राज्य क्याम्पस, होटल पेसिफिक व ल क्याम्पसय् ज्याझ्वः कन्ह्यः तक न्ह्याइ । राष्ट्रिय नाप अंन्तर्राष्ट्रिय संघ सस्था तयेगु ब्बति दुगु खः।

उगु ज्याझ्वलय् भारत, बंग्लादेश, पाकिस्तान, श्रीलंका, इरान, फ्रान्स, टर्की, रुस नापं ८३ देशं ब्बति दुगु खः। नेपालय् थीथी ख्यलय् ज्या यानाच्वंगु संघ संस्था एनजीओ, आईएनजीओपाखे थःपिन्स बियागु तालीमपाखे उत्पादन याःगु सामान दुगु स्टल न तयातगु खः।

नेवाः पत्रकार राष्ट्रिय दबूया भिनिक्वःगु दँमुज्याय् खुम्ह पत्रकारयात सिरपा नापं स्वम्हेसित नेपालभाषा, संस्कृति प्रवद्र्धन नाप समावेशीकरण मुद्दाय् मदिक्क ज्या यानाच्वपिन्त सम्मान याःगु खः।

दबूया नायः नृपेन्द्रलाल श्रेष्ठया सभाध्यक्षताय् जूगु उगु ज्याझ्वलय् नेपालभाषा मंका खलःया भवनय् जूगु उगु ज्याझ्वलय् माउन्टेन टेलिभिजनया विश्वन्तर शाक्ययात नीद्धः ज्ञानज्योति लक्ष्मीप्रभा सिरपा, झंकार एफएम रामेछापया युवराज श्रेष्ठयात झिन्याद्धः नगद नापं ज्ञानदेवी मणि पत्रकारिता सिरपा, बुद्ध धर्मया सन्देश प्रचार प्रसार याःगु योगदानयात मेट्रो एफएमया उदेन न्हूसायमियात नीद्धः नगद नाप भिक्षु कुमार कश्यप स्मृति पत्रकारिता सिरपा ज्याझ्वःया मूपाहाँ बागमती प्रदेशया उद्योग वाणिज्य भूमि लिसे प्रशासनमन्त्री रामकृष्ण चित्रकारं लःल्हानादीगु खः।

अथेहे नेपाल मण्डलया सिल्भिया राजोपाध्याययात वाङमय शताब्दी पुरुष सत्यमोहन जोशी पत्रकारिता सिरपा, अनलाइन डबलीया बुद्धशरण शाहीयात बाबुराजा ज्यापु फोटो पत्रकारिता सिरपा व अनलाइन खबरया रेणु त्वानाबासुयात श्रीराम स्मृति पत्रकारिता सिरपा नापं स्वम्हसित झिद्धः नगद सिरपा न लःल्हाःगु खः।

दबूया झिनिक्वःगु दँमुज्याय् गुठी संस्थानया केन्द्रीय प्रशासक प्रमुख किरण शाक्य, गोरखापत्र दैनिकया सम्पादक सल्लाहकार उपेश महर्जन व नेपाल आदिवासी जनजाति पत्रकार महासंघया पूर्व अध्यक्ष दण्ड गुरुङयात विशेष सम्मान याःगु खः।