कोशी प्रदेशया मुख्यमन्त्री उद्धव थापां थौ प्रदेशसभा बैठकय् विश्वासया मत काइगु कार्यसूची दु । वंगु साउन १६ गते मुख्यमन्त्री नियुक्त जूम्ह थापां विश्वासया मत कायेगु लागि न्हिनसिया १ बजे प्रदेशसभा बैठक सःतूगु दु ।

तर दलपिनिगु दथुइ अन्योलताया कारण थौ बैठक हे जुइगु निश्चित जुयाच्वंगु मदुनि। सभामुख मदुगु कारण सत्तागठबन्धन उपसभामुख सृजना दनुवारया अध्यक्षताय् जक बैठक न्ह्याकेगु पक्षय् दु । उपसभामुख थः स्वयम हे बैठकय् मच्वनिइगु तयारी याना च्वंगु दु।

प्रदेशसभा बैठकय् नेकपा एमाले व राप्रपां थःपिनिगु ज्येष्ठ सदस्यपिन्त संसदय् उपस्थित मजुइत निर्देशन बिइ धुकुगु दु । अथे जुगुलि एमालेका न्ह्यम्ह व राप्रपाया छम्ह सांसदपिन्स छेँया ज्या क्यना बैठकय् उपस्थित जुइ फइ मखुगु सूचं बिइ धुकुगु दु।

प्रस्तावित प्रधानन्यायाधीश विश्वम्भरप्रसाद श्रेष्ठया संसदीय सुनुवाइ थौं जुइगु दु। संसदीय सुनुवाइ समितिं थौं श्रेष्ठविरुद्ध उजुरी बिउपि उजुरीकर्तापि नाप सहलह याइगु व वया लिपा श्रेष्ठनाप सहलह याइगु ज्याझ्वः दु।

प्रस्तावित प्रधानन्यायाधीश श्रेष्ठविरुद्ध उजुरी बिइपि नाप थौं सुथय् १०ः३० बजे सहलह याइगु व प्रस्तावित प्रधानन्यायाधीश श्रेष्ठनाप ११ः३० बजे सहलह याइगु ज्याझ्वः दु।

थौं नागपञ्चमी परम्परा कथं नागया थःथःगु छेँया मूलुखाय् नाग तिकां पूजा यायेगु याइ।

दँय् दँसं गुंलाथ्व पचमी (श्रावण शुक्ल पञ्चमी) कुन्हु हनिइगु याइ।

थथे नागया किपा तिकेगु यातकि दँच्छियकं छेँय् नाग, सर्प व बिच्छीलगायतया जीवं दुःख मबिइगु नापं मिँ व मलःया ग्याचिकूलि न ग्याये मालि मखु धइगु धार्मिक विश्वास याना तःगु दु।

पनौती नगरपालिकाया ग्वसालय् भदौ १ गते पन्तिइ जूगु ज्याझ्वलय् नगरपालिकाया मेयर रामशरण भण्डारीं पन्तिइ सांस्कृतिक संरक्षित क्षेत्र घोषणा यायेगु बचं बियादीगु दु ।

ज्याझ्वलय् प्रमुख वक्ताया हैसियतं श्रीकृष्ण महर्जनं स्थानीय सरकार संचालन ऐन कथं पन्तिइ सांस्कृतिक संरक्षित क्षेत्र घोषणा यायेत गुगु कथं वनेगु? उकिया निती ऐन दयेमेगु बारे न्वंवानादिगु खः।

हलिं नेवाः गुथि पनौती नगर समन्वय समितिया ब्यवस्थापनय् जूगु उगु ज्याझ्वलय् विश्व सम्पदा सुचिइ पन्तिइ न सुचिकृत यायेगु सन्दर्भय् समुदाय स्तरय् अन्तक्ररिया ज्याझ्वः जूगु खः ।

ज्याझ्वलय् विदुर कायष्ठं विश्व सम्पदा सुचिकृतया बारे न्वंवानादीगु खः ।

स्वनिगःया थीथी नेवाः वस्तीयात सांस्कृतिक संरक्षित क्षेत्र घोषणा याकेगु अभियान न्ह्याकेगु ज्या जुयाच्वंगु दु। नेवाः मिसा दबू व नेवाः देय् दबू स्वनिगः विशेष प्रदेश समितिया मंकाः ग्वसालय् शनिवाः अभिमुखिकरण ज्याझ्वः जुगु दु।\

जलय् थीथी गुथि नापं जात्रा व परम्पारगत संस्थाय् च्वना ज्या यानाच्वनादीपिंन्त सांस्कृतिक संरक्षित क्षेत्र घोषणाया सवलायात कया थुइकेगु ज्या जूगु खः ।

उगु इलय् देय दबूया केन्द्रीय न्वकू नापं नेवाः मिसा दबूया संस्थापक नायः रश्मीला प्रजापतिं आदिवासी नेवाःतय्गु अधिकारया बारे खँ कनादीगु खः । नेपाःया संविधानंनिसें अन्तर्राष्ट्रिय कानुनया खँ तकं कनादीगु खः ।

अथे हे देय् दबू स्वनिगः विशेष प्रदेशया नायः श्रीकृष्ण महर्जनं सांस्कृतिक संरक्षित क्षेत्र घोषणा यायेमाःगु खँ नापं उकिया नितिं वनेगु लँपु व कानुन दयेकेगु नापं कार्यान्वयनया बारे कनादीगु खः।