भीमसेन मन्दिर पुनःनिर्माण सरोकार समितिं पत्रकार सुनील महर्जनयात सम्मान याःगु दु।

यलया दरबार क्षेत्रय् दुगु उगु देगःया उपभोक्ता मोडेलपाखे पुनःनिर्माण यायेगु निति विसं २०७२ सालया भुखाय् लिपा पत्रकारिता पाखे महत्वपूर्ण योगदान याउगुलि महर्जनयात सम्मान याःगु खः।

महर्जन नेपाल समाचारपत्रया सहायक सम्पादक नाप नेवाः पत्रकार राष्ट्रिय दबूया वरिष्ठ उपाध्यक्ष न खः। २०७२ सालया भुखाचं क्षतिग्रस्त जूगु खः। ललितपुर उद्योग वाणिज्य संघया ग्वाहालिं निस्वंगु उगु समितिं पाटन संग्रहालय नाप मंगलबाः जूगु छगु ज्याझ्वः दथुइ यल महानगरपालिकाया मेयर चिरिबाबु महर्जनं सहायक सम्पादक महर्जनयात हनापौं लःल्हानादीगु खः।

उगु ज्याझ्वःया अध्यक्ष कृष्णलाल महर्जनं उगु देगः पुनःनिर्माण सम्पदा संरक्षणय् निजी क्षेत्र व स्थनीयपिनिगु भूमिकाया उदाहरण बियादीगु खः। उगु देगः पुनःनिर्माणया कूल लागत ४ करोड ९३ लाख रकम मध्ये अत्यधिक हिस्सा जनस्तरपाखे जूगु खः।

ज्याझ्वलय् देगः पुनःनिर्माणयाःपि ज्यामिपिन्त न सम्मान याःगु खः।

सेयर बजाः थौं बुधबाः १.६४ प्रतिशतं थहावःगु दु। बुधबाः बजाः परिसूचक नेप्से ३३.५७ अंकं थहावना २०८०.३८ अंकय् बन्द जूगु दु।

बुधबाः लघुवित्त व म्युचुअल फण्ड बाहेक दक्को उपसूचक थहावसां बजाः लिड यायगु बैंकिङ उपसूचक १.२५ प्रतिशतं थहावःगु दु।

लघुवित्तं यःयः थे लगानी याना कर्जा असुल याये मफुगु समाचार वयेवं बुधबाः दक्को उपसूचक थःवसां लघुवित्त उपसूचक कुहावःगु खः। लघुवित्त उपसूचक १.४ प्रतिशतं कुहवःगु दु।

बुधबाः नेप्से थहावना कारोबार रकम धाःसा १ अर्ब ८० करोडय् सिमित जूगु दु। सोमबाः नेप्से १ अर्ब ९४ करोडया कारोबार भएको बजारमा बुधबाः कारोबार रकम घटे जुगु दु। बुधबाः नेप्सेय् हिमालयन डिस्टिलरीया १३ करोडया कारोबार जुगुलि जीवन विकास लघुवित्तया ४ करोड ९२ लाख व ग्लोबल आईएमई बैंकया ४ करोड ६१ लाख रुपैयाँया सेयर कारोबार जुगु दु।

नेप्सय् बुधबाः २१७ कम्पनीया सेयर कारोबार जूगुलि १६५ कम्पनीया सेयर भाः थहावःगु दु। अथे हे ४९ कम्पनीया सेयर भाः कुहावःगु दु सा स्वंगु कम्पनीया सेयर भाः स्थिर जूगु दु । उकि मध्ये लिवर्टी इनर्जीया सेयर भाः ९.८० प्रतिशतं थहावःगु दु सा छ्याङ्दी हाइड्रोपावरया सेयर भाः ९.५६ प्रतिशत व दोर्दी हाइड्रोपावरया सेयर भाः ९ प्रतिशतं थहावःगु दु।

अथेतु आदर्श लघुवित्तया सेयर भाः १० प्रतिशतं कुहावया नकारात्मक सर्किटय् बन्द जुगुलि खप्तड लघुवित्तया सेयर भाः ७.८५ प्रतिशत व उपकार लघुवित्तया सेयर भाः ६.९९ प्रतिशतं कुहावःगु दु।

प्रधानमन्त्री पुष्पकमल दाहाल प्रचण्ड फागुन १९ गते कतारया राजधानी दोहा वनेगु तयारीइ दु।

थ्व हे फागुन २१ गतेनिसे सुरु जुइगु अल्पविकसित राष्ट्रपिनिगु सम्मेलनय् ब्बतिइ कायेगु निति प्रधानमन्त्री प्रचण्ड दोहा वनेगु तयारीइ दु धका वयकःया सचिवालयं जानकारी बिःगु दु।

अल्पविकसित राष्ट्रपिनिगु सम्मेलन मार्च ५ निसे ९ तारिख (फागुन २१ निसे २५ गते) तक उगु ज्याझ्वः जुइत्यःगु खः।

दोहाय् जुइगु सम्मेलनय् अल्पविकसित राष्ट्रया सरकारपि नाप राष्ट्र प्रमुखपिनिगु सहभागी दइगु खः।

बागमती प्रदेश सभाया बैठक थौं च्वनिइगु जुगु दु। बैठकय् प्रदेश सरकारपाखे जारी जूगु अध्यादेशया प्रतिस्थापन विधेयक पेस जुइगु सम्भावित कार्यसूचीइ दु।

अय्न सुथय् च्वनिइगु कार्यव्यवस्था परामर्श समितिया बैठकं बैठकया कार्यसूची क्वछिइ। राजेन्द्र पाण्डे नेतृत्वया न्हापागु सरकारं न्यागु अध्यादेश जारी याःगु खः ।

उगु अध्यादेश शालिकराम जम्मकट्टेल नेतृत्वय् वर्तमान सरकारं वंगु पुस १८ गते सदनमा पेस याःगु खः।

अध्यादेश पेस जूगु ६० दिं दुने प्रतिस्थापन विधेयकपाखे पारित याना प्रमाणित यायेमाःगु प्रदेश सभा नियमावलीया व्यवस्था कथं थौं प्रदेश सभा बैठक च्वनेत्यःगु खः ।

येँ महानगरपालिकाया उपप्रमुख सुनिता डंगोलं वडास्तरय् दुगु मेलमिलाप केन्द्रया स्थलगत अनुगमन व निरीक्षण यानादीगु दु ।

वडास्तरय् दुगु केन्द्रया अवस्था बारे जानकारी कायेगु ल्याखं वय्कलं सक्रिय रुपं अनुगमन व निरीक्षण यानादीगु खः । वय्कलं ११, १३, १४, १५, १६ व २६ वडाय् च्वंगु केन्द्रया निरीक्षण यानादीगु खःसा १६ वडाय् मेलमिलाप कक्षया उलेज्या नं यानादीगु खः । निरीक्षण लिपा महानगर उपप्रमुख डंगोलं सम्भव दत्तले वडा ज्याकुथिइ हे मदुसा मेगु गुगुं थासय् बालं कयाः जूसां मेलमिलाप कक्ष तयार यायेत इनाप यानादिल ।उजुरीयात निर्णय प्रक्रियाय् यंकेबलय् विवाद निष्कर्षय् पिहां मवइगु, निर्णय जूसां छगू पक्ष असन्तुष्ट जुइगु तर मेलमिलाप दिगो जुइगुलिं थुकियात प्राथमिकता बिया वयाच्वनागु वय्कलं कनादिल ।

केन्द्रयात प्रभावकारी यायेत उपप्रमुख डंगोलं वडाअध्यक्ष, वडासदस्य लगायतया जनप्रतिनिधिलिसें महिला संजालया संयोजक, वडा सचिवलिसें सहलह यानादीगु खः । त्वालय् वनाः विवाद निरुपण यानागु अनुभव कनादिसें १५ वडाअध्यक्ष ईश्वरमान डंगोलं सैद्धान्तिक ज्ञानयात व्यवहारिक सीपपाखें कार्यान्वयन यायेमाः धासें जनप्रतिनिधि व कर्मचारीया क्षमता विकास जुल धाःसा जक अपेक्षित लिच्वः बी फइ धयादिल ।

थ्व झ्वलय् ११ वडाअध्यक्ष हिरालाल तण्डुकारं दर्ता मयासे नं उजुरीया सुनुवाई यानाः क्वचायेकागु अनुभव कनादिसें थाय्या अभाव जूगुलिं आः लिक्कं बालं कयाः कक्ष संचालन यायेगु योजना दुगु खँ कनादिल । १४ वडाअध्यक्ष सुमन श्रेष्ठं अदालतय् वनेबलय् ध्यबा दुम्हं मुद्दा त्याकी धइगु मानसिकता दयाच्वंगु व थुकथां केन्द्र संचालन लिपा निगुलिं पक्ष त्याइगु जुइ । विवादया निरुपण त्वालय् हे वनाः समाधान यायेगु कुतः याये धयादिल ।

थीथी न्हय्गू चरणय् जुइगु मेलमिलापय् गुगुं नं उजुरी वा मुद्दायात मेलमिलाप यायेत पक्ष वा विपक्ष थःपिंसं हे मेलमिलापकर्ता ल्यये दइगु व्यवस्था दुुसा थुकथं छम्हेसिनं ल्यःम्ह मेलमिलापकर्तायात मेम्हेसिनं सहमति प्वंकेमाःगु जुइ । यदि अथे जुइ मफुत धाःसा स्रम्बन्धित अधिकारीं क्वःछिउम्ह मेलामिलापकर्ता विवाद निरुपण यायेगु ज्या याइ ।