येँ महानगरपालिकाया पूर्व मेयर नाप नेकपा एमालेया केन्द्रिय सदस्य विद्यासुन्दर शाक्ययात निगु नगरपालिकया जिम्मेवारी बिःगु दु। शाक्ययात तारकेश्वर नगरपालिका व टोखा नगरपालिकाया इन्चार्ज याःगु जिम्मेवारी बिःगु दु।

एमालेया केन्द्रिय सचिवालयं वंगु साउन २९ व असार ३० गते च्वंगु बैठकया निर्णय कथं अन्तरपार्टी निर्देशन– ८ बमोजिम या जिम्मेवारी बिःगु खः।

अथेहे, पार्टीया केन्द्रिय सदस्य अजय क्रान्ति शाक्ययात स्वास्थ्यया कारण आः बियाच्वंगु जिम्मेवारीपाखे विदा बिःगु दु।

शाक्यनापं जुनेली श्रेष्ठ (मकवानपुर), पार्वती रावल (चितवन), परनसिंह दयाल (बैतडी) लगायतपिन्त विदा बिःगु दु।

स्युचाटार सबस्टेसनपाखे थीथी फिडरं बिया वयाच्वंगु मत कन्ह्यः शनिवाः भदौ २ गते न्याघौ मत मवइगु जुइ धका नेपाल विद्युत प्राधिकरणं धाःगु दु।

सितापाइला, बाफल, बलम्बु, खड्कागाउँ (थानकोटसहित), हसनटार, कालिमाटी, कलंंकी व रोपवे फिडरपाखें आपूर्ति जुयाच्वंगु मत कन्ह्यः शनिवाः सुथय् १० बजेनिसे न्हिनय् ३ बजेतक मत मवइगु धका धाःगु दु।

स्युचाटार सबस्टेसनय् आः बिया वयाच्वंगु १३२ केभी मुख्य बसावार विस्तार याना न्हुगु दयका १३२ केभी वेमा जडान यायेगुलि मत आपूर्ति बन्द जुइ धका छगू सूचं पिकाःगु दु।

आः लप्सीफेंदी नाप चाँगुनारायण सबस्टेसन निर्माण आयोजनां विद्यमान टेकु सबस्टेसन स्तरोन्नती याना टेकु–स्युचाटार ६६ केभी लाइनयात ३२ केभीइ चार्ज यायेगु ज्याभ जुयाच्वंगु दु।

उगु कारण १३२ केभी बसबार बन्द जुइगुलि टेकु, बालाजु, के टु, के थ्री सबस्टेसनपाखे आपूर्ति जुइगु थासय् मत मवइगु धका प्राधिकरणं धाःगु दु।

संसदय् जुयाच्वंगु पंगः चिइकेगु निति प्रधानमन्त्री पुष्पकमल दाहाल प्रचण्ड व सभामुख देवराज घिमिरे दथुइ सहलह जूगु दु।

थौं सुथय् बालुवाटारय् जूगु सहलहय् सभामुख घिमिरे न संसद् मचागुलि प्राकृतिक प्रकोप संम्वन्धि विषय बहस यायेमखगु धका धयादीगु खः।

सत्तापक्ष व प्रतिपक्षं गम्भीरतापूर्वक सहलह याना सहमति याना संसद् न्ह्याकेमाः धका सभामुखं प्रधानमन्त्री प्रचण्ड याःगु ध्यानाकर्षण याकूगु खः।

लिसः बिइगु झ्वलय् प्रधानमन्त्री प्रचण्डं संसद् न्ह्याकेगु विषय प्रमुख प्रतिपक्षी दल एमालेया अध्यक्ष केपी शर्मा ओलीनाप न खँ ल्ह्यायेगु जुइ धका सभामुखया निजी सचिवालयं धाःगु दु।

एमाले न तस्करी जूगु लुँ उच्चस्तरीय समिति दयका छानबिन याये माःगु माग यासे १० गतेनिसे संसद् अवरूद्ध याना वयाच्वंगु खः। सरकारं धाःसा अनुसन्धानया लागि उच्चस्तरीय समिति म्वाः धका धयावया च्वंगु खः।

येँ महानगरपालिकाया कार्यपालिका वैठकय् विवाद जूगु दु। कार्यपालिकाया वैठकय् पेश जूगुलि २१ प्रस्तावमध्ये लिपागु विविध शीर्षकय् सहलह जूगुलि विवाद जुगु खः।

वडाध्यक्षपिन्स विविध शिर्षकय् सहलह जुइवं विभागीय समितिं फ्वंगु योजना बजेटय् मलागु, वडां मफ्वनागु बजेट वडाय् बिःगुलि न्ह्यसः तःगु खः । कार्यपालिका सदस्यपिन्स महानगरया उपप्रमुख सुनिता डंगोलं बजेट निर्माण यायेगु झ्वलय् वयकःया भूमिकाबारे न्ह्यसः तःगु खः।

उपप्रमुख डंगोलं बजेट थः याकचां दयकाःगु मखु धासे बजेट तर्जुमा समितिं दयकागु धका लिसः बिःगु खः। विवाद अप्पोया वनेवं म्हिगः जुयाच्वंगु लाइभ न बन्द जुगु दु। कार्यपालिका बैठकया लिपागु इलय् विवाद जुयावनेवं कार्यपालिका सदस्यपिन्स न्ववाना च्वंगु इलय् लाइभ बन्द जुगु खः।

कार्यपालिका सदस्यपिन्स प्रशासन प्रमुखयात जिम्मेवार मदुगु धका धया च्वंगु इलय् लाइभ बन्द जुगु खः।

बझाङया खिराताडी केन्द्रविन्दू जूया भुखाय् ब्बःगु दु।

राष्ट्रिय भूकम्प मापन तथा अनुसन्धान केन्द्र लैनचौरया कथं बिहीवाः बहनि ९ बजे जूया १३ मिनेटय् बझाङया खिराताडी जःखः केन्द्रविन्दू जूया ३ दशमलव ९ रेक्टरस्केलया भुखाय् ब्बःगु खः।