सांस्कृतिक संरक्षित क्षेत्र घोषणाया निति सहलह किपू नगर सांस्कृतिक संरक्षित क्षेत्र घोषणा याना ऐन तकं जारी याये धुंकूगु किपुलिइ ऐन कार्यान्वयया सवालयात कया सहलह यायेगु ज्या थौं जूगु दु ।

नेवाः देय् दबू किपू नगर समिति, ज्यापु महागुथि किपू नगर समिति, आदिवासी नेवाः राजनीतिक अभियान किपू नगर समिति, हलिं नेवाः गुथि किपू लगायत थीथी खलः पुचः जाना मंकाः कथं उगु सहलह मुँज्या ग्वसाः ग्वःगु खः ।

पुलिइ दुगु परम्परागत प्रथाजन्य संस्था सी गुथि, दाफा गुथि, जात्रा गुथि, बाजं गुथि नापं थीथी गुथिपाखें सच्छिम्हं मल्याक प्रतिनिधिपिनिगु सहभागीता दुगु खः । 

दबू किपू नगर समितिया नायः बुद्धिलाल ज्यापुया सभाध्यक्षताय् जूगु उगु ज्याझ्वलय् ज्यापु महागुथिया कमला महर्जनं लसकुस न्वचू बियादीगु खः । ऐन व नियमावली निर्माणया नितिं कार्यदलया दुजः उज्ज्ल महर्जनं किपू नगरपालिकापाखें प्रथाजन्य संस्थायात सुचकिरणया नितिं फारम भरेयाकूगु बारे खँ कनादीगु खः ।

अथे हे कार्यदलया मेम्ह दुजः अधिवक्ता नरेश श्रेष्ठं सांस्कृतिक संरक्षित क्षेत्र ऐन व नियमावलीया कानुनी खँ कनादीगु खः । अनं लिपा ब्वति कयादीपिं गुथिया प्रतिनिधिपिन्सं न्ह्यसः तयादीगु खः । अन वःगु न्ह्यसःया लिसः सांस्कृतिक संरक्षित क्षेत्र घोषणाया ऐन व नियमावली निर्माण कार्यदलया कजि श्रीकृष्ण महर्जनं लिसः बियादीगु खः ।

आःया अवस्थाय् नियमावली दुथ्याःगु कथंया फारम भरेयायेगु ज्या सकलें छप्पँ जुया यायेमाःगु नापं ऐन कार्यान्वयनया नितिं नं मंकाः कथं पहल यायेमाःगु खँ तयादिल ।

प्रस्तावित प्रधानन्यायाधीश विश्वम्भर प्रसाद श्रेष्ठयाःगु संसदीय सुनुवाइ कन्ह्यः सोमवाः निसे सुरु जुइगु दु।

संसदीय सुनुवाइ समितिं सोमवाः उजुरीकर्तापि नाप सहलह याना व वयालिपा श्रेष्ठनाप सहलह याइगु जुगु दु।

समितिया थौ च्वंग बैठकं प्रस्तावित प्रधानन्यायाधीश श्रेष्ठविरुद्ध उजुरी बिइपिन्त कन्ह्य सोमवाः सुथय् १०ः३० बजे सहलह याइ व ११ः३० बजे प्रस्तावित प्रधानन्यायाधीशनाप सहलह यायेगु निर्णय जूगु दु धका समितिया ज्येष्ठ सदस्य पशुपति शमशेर जबरां जानकारी बिःगु दु।

प्रस्तावित प्रधानन्यायाधीश श्रेष्ठविरुद्ध इमेलपाखे निगु व पौपाखे छगु उजुरी वःगु खः। इमेलपाखे वःगु उजुरी याःम्ह मनू सम्पर्कय् मवगुलि छम्ह उजुरीकर्तानाप जक सहहल यायेगु समितिं तयारी याःगु दु ।

संसद अवरोधबारे सहलह यायेत प्रधानमन्त्री पुष्पकमल दाहाल प्रचण्डं राष्ट्रिय मान्यताप्राप्त दलया नेतापिन्त सःतूगु दु। सहलह यायेगु निति थौ सिंहदरबारस्थित प्रधानमन्त्री कार्यालयय् सःतूगु खः।

संसदया पंगः चिइकेगु निति प्रधानमन्त्री प्रचण्डं राष्ट्रिय मान्यताप्राप्त दलया शीर्ष नेतापि नाप सहलह याइगु धका प्रधानमन्त्रीया प्रेस सल्लाहकार गोविन्द आचार्यं जानकारी बिःगु दु।

वंगु निर्वाचनय् नेकपा एमाले, नेपाली कांग्रेस, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी व जनमत पार्टीं थ्रेसहोल्ड कटे याना राष्ट्रिय मान्यताप्राप्त पार्टी जूगु खः।

लुँ तस्करी प्रकरणयात उच्चस्तरीय छानबिन समिति गठन याये माःगु माग यासे प्रमुख प्रतिपक्षी दल नेकपा एमालें साउन १० गतेनिसे संसद अवरुद्ध याना वयाच्वंगु खः।

सभामुख देवराज घिमिरं सदन जूयाच्वंगु पंगः चिइकेगु विषय सहलह यायेगु निति प्रमुख सचेतकपिनिगु बैठक सःतूगु दु।

थौं सिथय् ११ बजे सभामुखं सिंहदरबारय् थःगु हे सचिवालयय् बैठक सःतूगु खः। सत्तापक्ष व प्रतिपक्षय् याना न्यागू राजनीतिक दलया प्रमुख सचेतकपिन्त सहलहया निति सःतूगु खः।

वंगू साउन १० गतेनिसे अवरुद्ध जूयाच्वंगु सदन आः तक न न्ह्याके मफयाच्वंगु खः।

भारतीय धर्मगुरु बागेश्वर बाबा ‘धीरेन्द्रकृष्ण शास्त्री’ यात नापालायेगु निति गृहमन्त्री नारायणकाजी श्रेष्ठ व परराष्ट्रमन्त्री एनपी साउद वंगु दु।

म्हिगः चान्ह्यः सानेपास्थित होटल भिवान्ताय् वना निम्हं मन्त्रीपि बागेश्वर बाबायात नापलावंगु खः। स्रोतं बिःगु जानकारी कथं होटलया छगू कोठाय् शास्त्रीं मन्त्रीपिन्त गोप्यरूपं नापलाःगु खः। गृहमन्त्रीं बहिन ९ बजे नापलाःगु खः।

अथेहे शास्त्रीं थौं हे प्रधानमन्त्री पुष्पकमल दाहाल प्रचण्डयात नापलाइगु ज्याझ्वः दु। प्रधानमन्त्रीयात नापलाये धुका थौं हे नवलपरासीस्थित शाश्वत धामय् हनुमान प्रवचन बिइगु निति उखेपाखे वनेगु ज्याझ्वः दु।