वंगु २४ घण्टाया दुने देयन्यक ७८ म्ह कोरोना भाइरस संक्रमण पुष्टि जूगु दु।

स्वास्थ्य नाप जनसंख्या मन्त्रालयया कथं २२४ म्हेसिगु पीसीआर परीक्षण याःगुलि २० म्ह व ९२४ म्हेसिगु एन्टिजेन परीक्षण यागुलि ५८ म्ह याना ७८ म्हेसित संक्रमण पुष्टि जूगु दु।

कोरोना संक्रमणं थौं छम्ह सीउगु दु धका मन्त्रालयं धाःगु दु।

पहिचानया आधारय् प्रदेशया नां हाकन नामकरण माग यासे थौं न विराटनगरय् आन्दोलन जूगु दु।

आन्दोलन यानाच्वपि व प्रहरी दथुइ थौं न झडप जूगु दु। मुख्यमन्त्री नाप मन्त्रिपरिषद कार्यालय न्ह्यने लँय् निषेधित क्षेत्र यानातंसा प्रहरीं उखेपाखे वनेस्वयेवं झडप जूगु खः।

मुख्यमन्त्री कार्यालयनिसे २०० मिटर उत्तरपाखे याःगु सतकय् झडप जुगुलि प्रहरीं अश्रुग्यास व लाठी चार्ज याःगु खः ।

मुस्लिम समुदायपिन्स थौं इदुलफित्र (ईद) तःजिक हःगु दु। ईदया लसताय् येँया घण्टाघर जामे मस्जिदय् प्रार्थना यासे भिंतुना बिःगु खः।

हिजरी संवतया रमदान लच्छियकं रोजा (व्रत) च्वना इस्लाम धर्मावलम्बी सौव्वाल ला कथं न्हापागु तारिखय् ईद हनिइगु याइ।

ईद नखः अल्लाह (भगवान) या नामय् विशेष नमाज (प्रार्थना) यायेगु इस्लाम परम्परा दु ।

टोखा नगरपालिका वडा नं ८ मिलन त्वालय् न्यागु पसलय् मिँ न्वया १ करोड रुपैयाँ बराबरया क्षति जूगु दु।

श्याम श्रेष्ठं निर्माण याःगु उगु मिलन बजारय् धर्मराज डंगोलं सञ्चालन याःगु ला पसलय् ग्यास लिक जूया म्हिगः न्यागु पसः च्यागु खः । जिल्ला प्रहरी परिसर येँया प्रवक्ता, प्रहरी उपरीक्षक सीताराम रिजालं बिगु जानकारी कथं न्यागु पसलय् मिँ न्वया छगु करोड बराबरया क्षति जूगु धका धाःगु दु।

उगु थासय् कमला तामाङं सञ्चाल यानातःगु लाकां पसलय् १६ लाख, मुना थापाया पसलय् ३५ लाख, प्रदीप लम्सालया पसलय् निगु लाख, विकास श्रेष्ठया सिलाइ पसलय् २ लाख, मधु न्यौपानेया मोबाइल पसलय् २० लाख व धर्मराज डङ्गोलया ला पसलय् २५ लाख रुपैयाँ बराबरया क्षति जूगु धका प्रहरीं धाःगु दु।

नेपाःया संकिपा ख्यःया वरिष्ठ ध्वनि प्राविधिक राजकृष्ण श्रेष्ठ मन्त । मदुम्ह श्रेष्ठ जण्डिस जुयाः वीर अस्पतालय् वासः यायेगु झ्वलय् मदुगु खः।

वयकलं नेपाली भाय्या संकिपातय् न ध्वनि प्राविधिक जुयाः ज्या यानादी धुकगु खः।