शेयर बजाः थौं न कुहावःगु दु। शेयर बजाः परिसूचक नेप्से थौं मङ्गलवाः कुन्हु २८ दशमलव ४० अङ्कं कुहावया २ हजार १९ दशमलव ८५ विन्दुइ कुहावःगु दु।

थौं दक्को समूहया शेयर कुहावगुलि विकास बैंक, फाइनान्स, होटल, बीमा व उत्पादन समूहया शेयर तसकं कुहावःगु दु। दकलय् अप्पो थौं गुराँस फाइनान्सया शेयर ८ प्रतिशत व विजय लघुवित्तया शेयर ७ प्रतिशतं कुहावःगु दु।

समग्र बजाः कुहावःगु दु सा दकलय् अप्पो स्वरोजगार लघुवित्त व नेपाल रिपब्लिक मिडियाया शेयर १० प्रतिशतं थहावःगु दु। थौं ४८ लाख ६० हजार कित्ता शेयर १ अर्ब ७३ करोड ७० लाख रुपैयाँया कारोबार जूगु दु।

दकलय् अप्पो आईएमई लाइफ इन्सुरेन्सया १७ करोड ८९ लाख रुपैयाँया शेयर कारोबार जूगु दु।

ख्वप नगरपालिका ४ स्थित राम मन्दिरय् प्यम्ह फसे जुयाच्वपिन्त स्थानीयपिनिगु ग्वाहालिं प्रहरीं उद्धार याःगु दु ।

देगलय् च्वनाच्वपि ८२ दँ दुम्ह भोजराज खरेल (महाराज हरिदाष), ५५ दँ दुम्ह दुर्गा गुरुङ, ११ दँ दुम्ह मेघना गुरुङ व ६० दँ दुम्ह सीता राईयात उद्धार याःगु दु धका जिल्ला प्रहरी परिसर ख्वपया प्रवक्ता बसन्त पाठकं धाःगु दु।

वंगु चान्ह्यः वाः वया हनुमन्ते खुसि सिथय् च्वःगु उगु देगलय् लः दुहावःगु खः।

म्हिगः मदिक्क वयाच्वंगु वाःया कारणं येँ थीथी थासय् लः छेँ छेँय् दुहावःगु दु। अथेहे येँया भेडासिहय् छेँ छखाः दुगु दु।

पुलागु छेँय् थौं सुथय् ११ः१५ बजेति दुगु खः। आः आः लँय् पाखे कुतुवःगु खः।

येँया न्हुगु बसपार्कय् लः मुना छेँ छेँय् दुहावःगु दु। म्हिगः निसे मदिक्क वाः वया च्वंगुलि बसपार्क नापा च्वंगु खुसि दुहावःगु दु।

विष्णुमती खुसिइ थहावया लँ तक थ्यःगु दु। उगु लः दुहावया मनू तयेगु छेँ छेँय् दुहावःगु खः।

म्हिगः चान्ह्यः निसे मदिकं वाः वयाच्वंगु कारण स्वनिगःया थीथी थासय् प्रभावित जूगु दु।

मदिक्क वाः वयाच्वंगुलि येँया सामाखुसी न प्रभावित जूगु दु। निजी छेँ, विद्यालयय् लः दुवा वःगु दु। लः दुहावया एसईबी स्कुलय् पम्प सेटया ग्वाहालि लः सालां वाः छ्वये माःगु दु।