नेपाल पञ्चाङ्ग निर्णायक विकास समितिं थ्व हे वइगु वैशाख ७ गते जुइत्यःगु सूर्यग्रहण नेपालं खनेदइ मखुगु धका धाःगु दु।

वैशाख कृष्ण औँसीया दिं वैशाख ७ गते जुइगु सूर्यग्रहण नेपालं खनेमदइगुलि थुकिया दोष नेपाःमिपिन्त लाइमखु व बारे नं यायेम्वाः धका समितिया अध्यक्ष प्रा श्रीकृष्ण अधिकारीं धाःगु दु।

थुगु दँया वैशाख ७, असोज २७ व चैत २६ गते जुइगु सूर्यग्रहण नेपालं खनेदइमखु स्वगुलि सूर्यग्रहण बारे यायेम्वाः धका धाःगु दु। स्वगुलि सूर्यग्रहणया दोष नेपाःमिपिन्त लाइमखु धका धाल्गु दु।

कात्तिक ११ गते जुइगु चन्द्रग्रहण धाःसा नेपालं खनेदइ जुगुलि उगु ग्रहणय् धासा बारे यायेमाः धका धाःगु दु। वैशाख ७ गते जुइगु सूर्यग्रहण चीन, मङ्गोलिया लगायत देशं खने दइधका धाःगु दु।

आइतवाः सामान्य कुहावंगु शेयर बजाः थौं सोमवाः तधःगु अङ्कं कुहावंगु दु। शेयर बजाः परिसूचक नेप्से थौं २३ दशमलव ६३ अङ्कं कुहावया १ हजार ९ सय ८ दशमलव शून्य ५ विन्दुइ कुहावंगु दु।

दक्को समूहया शेयर कुहावंगु दु सा कारोबार रकम न कम जुगु दु। २६७ गु कम्पनीया ३१ लाख ४४ हजार कित्ता शेयर ९२ करोड ७८ हजार रुपैयाँया कारोबार जूगु दु। दकलय् अप्पो अरुण भ्याली हाइड्राया ७ करोड रुपैयाँया शेयर किनबेच जूगु दु।

दकलय् अप्पो उन्नति लघुवित्त, उपकार लघुवित्त व कालिका लघुवित्त कम्पनीया शेयर ४ प्रतिशत स्वया अप्पो कुहावःगु दु। समग्र बजाः कुहावसा थौं आदर्श लघुवित्त, कालिञ्चोक दर्शन लिमिटेड व मोलुङ हाइड्रोपावर कम्पनीया शेयर १० प्रतिशतं थहावःगु दु। 

कोरोना संक्रमणं थौं छम्हेसिगु ज्यान वंगु दु। वंगु २४ घण्टाय् देयन्यक थप १०४ म्ह कोरोना संक्रमण पुष्टि जूगु दु।

स्वास्थ्य मन्त्रालयया कथं १ हजार ६३२ म्हेसिगु नमुनामध्ये ५७१ म्ह पीसीआर परीक्षण यागुलि ६३ म्ह व १ हजार ६१ म्हेसित एन्टीजेन परीक्षण यागुलि ४१ म्ह याना १०४ म्ह कोरोना संक्रमण खनेदुगु खः।

थ्व नाप कोरोना संक्रमितपि ३७९ म्ह थ्यःगु दु।

प्रधानमन्त्री पुष्पकमल दाहाल प्रचण्ड, सभामुख देवराज घिमिरे व नेपाली कांग्रेसया सभापति शेरबहादुर देउवा नेकपा एमालेया अध्यक्ष केपी शर्मा ओलीयात नापलायेगु निति बालकोटय् वंगु दु।

भाइरल ज्वरोया कारण बिरामी जूया आराम कयाच्वंम्ह ओलीयात नापलायेगु निति थौं बालकोटय् ओली निवासय् वःगु खः।

नापलाना संवैधानिक परिषद सम्बन्धी विधेयक, सत्य निरुपण नाप मेलमिलाप व बेपत्ता जूयाच्वपि नागरिक छानबिन सम्बन्धी विधेयकयात न्ह्यने यकिइगु निति छलफल न यायेत्यःगु खः।

टोखा नगरपालिकां बिस्केट जात्राया लसताय् थौं सोमबाः सार्वजनिक बिदा बिःगु दु।

टोखा नगरपालिकाया झीक्वःगु कार्यपालिका बैठकं दँय् दँसं हनाच्वंगु टोखाया ऐतिहासिक नखः बिस्का जात्राया लसताय् थौं सोमबाः सार्वजनिक बिदा बिइगु निर्णय याःगु दु धका नगरपालिकाया प्रमुख प्रकाश अधिकारीं जानकारी बिःगु दु।

बिस्केट जात्राया लसताय् टोखा नगरपालिका दुने वडा कार्यालय नाप स्वास्थ्य संस्था, विद्यालय न बन्द जुइ धका प्रमुख अधिकारीं धयादीगु दु। टोखाय् बिस्का जात्राय् गणद्यः, कुमारी, सपनतीर्थ, मसानकाली व चण्डेश्वरी लगायतया द्यः नारायण पूखली यकां जात्रा यायेगु याइ।