येँ न ६८ म्ह यात्रु व चालक दलया प्यम्ह सदस्य ज्वना पोखराय् वंपि यती एयरलाइन्सया ९ एन एएनसी एटीआर ७२ जहाज पोखराय् दुर्घटनाग्रस्त जूगु दु।

उगु जहाज क्याप्टेन कमल केसीं ब्बकूगु खः। पोखराया सेती खोंचय् दुर्घटनाग्रस्त जूगु उगु जहाजय् मिँच्याःगु खः।

आदिवासी नेवाः राजनीतिक अभियानया ग्वसालय् नेपालभाषाया च्वमि डा. बालगोपाल श्रेष्ठया सफू ‘नेपालय् जातीय पहिचान व भाषिक समान अधिकारया न्ह्यसः’यात कयाः परिचर्चा यायेगु ज्या जुगु दु ।

ज्याझ्वलय् नेवाः न्ह्यलुवा नापं नेपालभाषा ऐकेदेमिया भाइस चान्सलर मल्ल के. सुन्दरं २०४३÷४४ सालपाखे डा. बालगोपाल श्रेष्ठं नेवाः जातिया पहिचान व भाषिक समान अधिकारया सवालयात कयाः जनचेतना थनेगु ज्या यानादीगु खँ न्ह्यथनादिसें वय्कःया उगु ज्या धाथें च्वछायेबहगु ज्या जूगु विचाः तयादिल । लिसें वय्कलं नेवाः ख्यःया शीर्षस्थ व्यक्तिपिंसं हे विचालन हयेगु ज्या यानाच्वंगु इलय् वय्कलं कडारुपं उकिया प्रतिवाद यानादीगु नापं थःगु सही खँ तयाः जनतायात सचेत यायेगु ज्या यानादीगु धयादिल ।

उगु इलय् हे वय्कलं भाषिक समानताया खँ पित हयाः नेवाः ख्यःयात तरंगित यायेगु ज्या गुगु यानादीगु खः, व वास्तवय् सही जूगु विचाः वय्कलं धयादिल ।अथेहे नेवाः न्ह्यलुवा व समालोचक डा. पुष्पराज राजकर्णिकारं नेवाःतय्सं छगू पहिचान, भाषिक समानता व अधिकारया निंतिं थौंया इलय् छुं यानाच्वंगु मदु धकाः धाये मछिं धासें नेवाः आन्दोलन उखेलाः थुखेलाः नं जुयाच्वंगु मदु धयादिल ।

डा. राजकर्णिकारं थौं झी दथुइ पद्मरत्न तुलाधर मदुसां नेवाः जाति व पहिचानया आन्दोलन न्ह्याना हे च्वंगु दु धासें पहिचान व भाषिक समान अधिकारया सवालय् न्हू न्हूपिं नेवाःतय्सं थःत समर्पित याना नेवाः आन्दोलनयात अझ च्वन्ह्याकेगु ज्या यानाच्वंगु दु धयादिल । नेवाः न्ह्यलुवा पद्मरत्न तुलाधरं भाषिक समानताया निंतिं आपालं विषय उत्थान यानादीगु खँ न्ह्यथनादिसें थौंया इलय् नेवाः आन्दोलनया नेतृत्व हे याइपिं मदु धायेमाःगु अवस्था वःगु मदुनि धयादिल । गैर नेवाःतय्सं नेवाःतय्त क्वत्यलेत अनेकथंया रणनीति छ्यला वयाच्वंगु धासें नेवाःत विचलित मजुसे सचेत जुयाः अझ न्ह्याः वनेमाःगु दु धयादिल ।

राजनीतिक विश्लेषक नापं च्वमि राजेन्द्र महर्जनं सफू अतिकं महत्वं जाःगु खँ कनादिसें थुकथंया सफूयात क्वय्या तहतक थ्यंकाः सकल नेवाःतय्त ब्वंकेगु वातावरण दयेकेमाःगु खँय् बः बियादिल । राज्य भाषिक अधिकारया सवालय् गुकथं बेक्व मिखां स्वयाच्वंगु दु धइगु बारे नं वय्कलं चर्चा यानादीगु खः । नेवाः देय् दबूया नायः पवित्र वज्राचार्यं झीसं थःगु भाषिक अधिकार, जातीय पहिचानया खँ ल्हाना च्वनागु थौंया इलय् नं छथ्वः नेवाःत नेवाःतय्गु हे विरोधय् कुहां वनाच्वंगु दु धासें थुकिं नेवाः एकताया सवालय् न्ह्यसः चिं थनेगु ज्या जुयाच्वंगु दु धयादिल । सपूmया च्वमि डा. श्रेष्ठं नेपालय् आपालं जातजातित दुगु व अप्वःसिया थःगु हे भाषा, लिपि, संस्कार, संस्कृति दु ।

राज्यं इमित नं समान अधिकार बीमाः धइगु खँय् व्यापक बहस, चर्चा, परिचर्चा जूसां थ्वपाखे ध्यान बिया मच्वंगुलिं थुकथंया खँय् ध्वाथुइका वनेत थःगु सफू ग्वाहालि जुइगु विश्वास प्वंकादिस । लिसें वय्कलं विश्वय् राष्ट्रपति शासनया व्यवस्था दुगु आपालं देय्या दसु न्ह्यब्वयादिसें नेपाःया निंतिं राष्ट्रपति प्रणाली पाय्छि मजूगु व समानुपातिक चुनाव प्रणाली नालेमाःगु आवश्यक जूगु खँ कुलादिल । अभियानया नायः श्रीकृष्ण मानन्धरया सभापतित्वय् जूगु ज्याझ्वलय् नेवाः न्ह्यलुवा डा. महेशमान श्रेष्ठं लसकुस यासें डा. श्रेष्ठया सफूयात कयाः छाय् परिचर्चा यायेमाःगु धइगु बारे जानकारी बियादीगु खः ।

श्री भाष्करदेव संस्कारित केशचन्द्रकृत पारावत महाविहार संरक्षण समाज, इतुंबहाःया झिंन्हय्क्वःगु साधारण सभा जुगु दु।

समाजया सल्लाहकार प्रा. स्वस्तिरत्न शाक्यया सभाध्यक्षताय् जूगु उगु ज्याझ्वलय् येँ क्षेत्र नं ८ या प्रतिनिधिसभा सदस्य विराजभक्त श्रेष्ठ मूपाहांकथं झायादीगु खः ।साधारणसभाय् समाजया नायः प्रज्ञारत्न शाक्यं वार्षिक प्रगति विवरण न्ह्यब्वयादीगु खःसा दांभरिं रुपकुमार शाक्यं आर्थिक विवरण न्ह्यब्वयादीगु खः ।

महाविहारया चक्रेश्वर, मूथाय्पा, थाय्पापिनिगु विशेष उपस्थितिइ जूगु ज्याझ्वलय् मूपाहां संघीय सांसद श्रेष्ठ व विशेष पाहां बागमति प्रदेशसभा सदस्य शैलेन्द्रमान वज्राचार्यं इतुंबहालय् महाविहारं न्ह्याका वयाच्वंगु व न्ह्यनाच्वंगु आवश्यक ज्याखँया निंतिं थःपिंसं फूचाःगु ग्वाहालि यायेगु जुइ धयादिल । झी नेवाःतय्गु कला, संस्कृति, सम्पदा, सभ्यता ल्यंका तयेत झी थः हे न्ह्याज्यायेमाःगु नापं झीगु थाय्बाय्या अस्तित्व नं ल्यंका तयेगु दायित्व झीगु हे जूगु वय्कःपिंसं धयादीगु दु ।

थौंकन्हय् थःगु त्वाः, थाय्बाय्, बहाः बही त्वःताः पिने च्वं वनेगु प्रवृत्तिं यानाः झीगु थासय् पिनेच्वंपिंसं हाली मुहाली यानाच्वंगु खँय् चिउताः प्वंकादिसें अज्याःगु थाय्बाय्यात नं पुस्तान्तरण याना वनेमाःगु खँय् वय्कःपिंसं बः बियादीगु दु ।

येँ मनपा २४ वडाध्यक्ष विनोदकुमार राजभण्डारीं भिंतुना न्वचु बियादीगु ज्याझ्वलय् महाविहारया चक्रेश्वर ओमरत्न वज्राचार्य, मूथायपा मणिरत्न शाक्य, थायपाजुपिं अमीररत्न शाक्य, बोधिरत्न शाक्य, सानुबावु शाक्य, विजेन्द्र शाक्य, रवि शाक्य, तेजरत्न शाक्यया नं उपस्थिति दुगु खः । साधारण सभां समाजया विधानया छुं छुं दफा संशोधनया निंतिं प्रस्ताव नं पारित याःगु खःसा थीथी व्यक्तिपिंसं आवश्यक सुझाव नं बियादीगु खः ।

सार्क देशया पत्रकारपिनिगु संगठन ‘सार्क जर्नलिस्ट फोरम’ (एसजेएफ) या प्रतिनिधिपि भारतीय जन संचार संस्थानय् अवलोकन याःगु दु।

आईआईएमसीया महानिदेशक प्रो. (डा‘.) संजय द्विवेदीें नेपाल, भूटान, श्रीलंका व बंगलादेशं वःपि पत्रकारपिन्त अंगवस्त्र व लुमन्ति चिं बिया सम्मान याःगु दु। उगु ज्याझ्वलय् संस्थानया डीन (अकादमिक) प्रो. गोविंद सिंह, डीन छात्र (कल्याण) प्रो. प्रमोद कुमार, प्रोफेसर डा. सिमता मिश्र, डा. मीता उज्जैन, डा. अनिरुद्ध सुधान्सू, डा. पवन कौंडल, डा. प्रतिभा शर्मा नाप सहायक कुलसचिव ऋतेश पाठकपिनिगु उपस्थिति दुगु खः।

आईआईएमसीया महानिदेशक स्वामी विवेकानंदया बुण्दिंया लसताय् वयकलं छगु एशियाया अवधारणा प्रस्तुत याःगु खः धका धयादीगु खः। प्रो. द्विवेदीं धाःगु दु ‘छगु एशिया’ जुइ, उवलय् जक शान्ति, अखंडता, विकास व समृद्धि न्ह्या वनइि। वयकलं धयादीगु दु, छगु इतिहास हे थौं न झीगु छगु हे संस्कृति, नसात्वँसा, रहन–सहन तक ज्वला। थ्व हे झीगु ताकत खः।

सांस्कृतिक रूप जुया छप्पं जूया झीसं पाश्चात्य संस्कृतिया अतिक्रमणयात रोक याये फइ। प्रो. द्विवेदीया कथं स्वामी विवेकानंदं न्हापा हे पश्चिमी देशयात धाःगु खः थुगु ई छिमिगु जुइ, आः वइगु ई भारतया जुइ। वयकलं धयादीगु दु ‘सार्क जर्नलिस्ट फोरम’ यात इनाप न याःगु दु पत्रकारपिन्त ‘छगु एशिया’ या विचाःयात साकार यायेगु झीगु सकसिगु जिम्मेदारी खः।

उगु ज्याझ्वलय् सार्क जनालिस्त फोरमया अध्यक्ष राजू लामां आईआईएमसी वया जिपि तसकं लयतागु दु। भारतया यक्को राजनेतापि स्वतंत्रता सेनानिया बारे जित जानकारी दु, तर न्हापागु पटक, थःम्हेसिया भारतय् दकलय् न्हापांहिंदी समाचार पत्र ‘उदंत मार्तंड’ या संस्थापक संपादक पंडित युगल किशोर शुक्लया बारे न्यनागु दु धका धयादीगु खः।

आईआईएमसीया थीथी विभाग, पुस्तकालय व संस्थानं संचालन यानाच्वंगु सामुदायिक रेडियो ‘अपना रेडियो ९६.९ एफएम’ य् अवलोकन याःगु खः।

सार्क जर्नालिस्ट फोरम व गौतम बुद्ध विश्वविद्यालयया मंकाः ग्वसालय् निन्हुयकं भारतया नोयडाय सार्क देशया पत्रकारपिनिगु अन्तर्राष्ट्रिय पत्रकार सम्मेलन पुष २६ मंगलवाः व २७ गते बुधवाः क्वचागु दु ।

उगु सम्मेलय् नेपाल, भारत, बंगलादेश व श्रीलंकाया पत्रकारपिनिगु उपस्थिति दुगु खः। उगु सम्मेलनया उलेज्या भारतीय जन संचार संस्थानया महानिर्देशक संजय द्धिवेदीं यानादीगु खः। मूपाहाँ द्धिवेदीं कन्युनिकेशनया ज्या धैगु हे जोडे यायगु् खः ।

थौंकन्हय् ग्वोवल सिटीजनया खँ जुयाच्वंगु दु । झीत ईश्वरं मानवीय गुण बियातःगु दु । ईश्वरया लँपु धैगु हे एकताया लँपुइ खः धका धयादीसे कम्युनिकेशनया धइगु हसम्वाद यायगु खः ।

ज्याझ्वलय् सार्क जर्नालिष्ट फोरमया नायः राजु् लामां बिश्व सभ्यताया आरम्भ भारतपाखें जूगु व सनातन धर्म पाखे जूगु खः धकाः धयादिसें सनातम धर्मया विचार फुक्क विचार सिवें आपालं प्राचानी खः धकाः धयादीगु दु । भारत एसियाया तधःगु देश खः । थौं २१ क्वःगु शताश्दीया युगय् न अफगानिस्तानय् मिसा पत्रकारपिन्स टेलिभिजनय् बुखँ ब्बनेत बुर्का तया बुखँ ब्बनेमाःगु अवस्था दु ।

थज्यागु खँय् झीसं विरोध याय्माः धका धयादीगु खः। सम्मेलनया मुख्य संरक्षक व गौतम बुद्ध विश्वविद्यालयया कुलपति प्रोफेसर रविन्द्र कुमार सिन्ह राष्ट्र निर्माण छगू निरन्तर न्ह्याः वनाच्वनीगु प्रकिया खः धका धयादिसें राष्ट्र निर्माणय् पत्रकारपि न्ह्यावनेमाः धका धयादीगु खः। अथेहे दकलय् लिपागु दिं भारतया उद्योग मन्त्री डा. रमेशनाथ पाण्डें सार्क जर्नालिस्ट फोरमय् सहभागी जुयादीपिन्त सुभाय् बियादीगु खः।