नेवाः पत्रकार राष्ट्रिय दबूया अध्यक्षय् नृपेन्द्रलाल श्रेष्ठ निर्वाचित जूगु दु । दबूया शनिवाः यलय् जूगु प्यक्वःगु महाधिवेशनं श्रेष्ठयात अध्यक्ष निर्वाचित याःगु खः।

उगु न्हूगु ज्यासना पुचलय् वरिष्ठ उपाध्यक्ष सुनिल महर्जन, उपाध्यक्ष (खुल्ला) सुरेन्द्रभक्त श्रेष्ठ, उपाध्यक्ष (मिसा) रचना श्रेष्ठ, उपाध्यक्ष (स्वनिगः पिनें) संदिप श्रेष्ठयात ल्यःगु दु ।

अथेहे महासचिवय् कृष्णकुमार मानन्धर (केके), सचिवय् राजु नापित, कोषाध्यक्षय् बाबुकाजी साँछे श्रेष्ठ, सहसचिव (खुल्ला)य् प्रजित शाक्य, सहसचिव (मिसा) सुनिता महर्जन, सहसचिव (स्वनिगः पिने) विजयराम कर्माचार्य व सह कोषाध्यक्षय् तेजनारायण महर्जनयात ल्यःगु खः।अथेतु, दुजलय् रत्नकृष्ण श्रेष्ठ, अनुप श्रेष्ठ, मीना वज्राचार्य, दानदास श्रेष्ठ, अनिता डंगोल व पूर्ण दुवालयात ल्यःगु दु ।

अथेहे गण्डकी प्रदेश संयोजकय् उत्तम श्रेष्ठ, लेखा समिति संयोजकय् विगेन तुलाधरयात ल्यःगु खः । ज्यासना पुचःया सकलें निर्विरोध निर्वाचित जूगु खः । दबूया नायः सुरजवीर वज्राचार्यया सभाध्यक्षताय् जूगु ज्याझ्वलय् पत्रकार दबूपाखें नीस्वनातःगु थीथी सिरपाः नं लःल्हाःगु खः ।

मू उपप्रधान व भौतिक निर्माण तथा यातायात मन्त्री नारायणकाजी श्रेष्ठं पुरस्कृतपिंत सिरपाः लःल्हायेगुलिसें दबूया लुमन्ति पौ व काभ्रे जिल्ला शाखापाखें पिदनीगु स्वलापौ सुकुन्दाया विमोचन नं यानादीगु खः । ज्याझ्वलय् वरिष्ठ पत्रकार नरेशवीर शाक्ययात ज्ञानदेवी–मणिरत्न स्मृति पत्रकारिता पुरस्कार, काभ्रेया सूर्यप्रसाद लाकोेजुयात वाङमय शताब्दी पुरुष सत्यमोहन जोशी पत्रकारिता पुरस्कार, सरस्वती कर्माचार्ययात ज्ञानज्योति–लक्ष्मीप्रभा पुरस्कार, अनुशा बज्राचार्ययात भिक्षु कुमार काश्यप स्मृति पत्रकारिता पुरस्कार, सुरेश ख्वाखः श्रेष्ठयात बाबुराजा ज्यापु फोटो पत्रकारिता पुरस्कार, हेटौंडाया सुरेश श्रेष्ठयात श्रीराम स्मृति पत्रकारिता पुरस्कार लःल्हाःगु खः ।

अथेहे ज्याझ्वलय् दबूया संस्थापक व न्हापांगु व निक्वःगु ज्यासुना पुचःया दुजःपिंत नं सम्मान याःगु खः ।

गैरसरकारी संस्था महासंघ व प्रतिष्ठानया मंकाः ग्वासलय् समाजसेवी मनु मोक्तानयात रुद्रलाल समाजसेवा पुरस्कार लःल्हाःगु दु ।

प्रदेश नं. १ या पहाडी क्षेत्रय् शिक्षा, स्वास्थ्य व त्वनेगु लःया निंतिं निःस्वास्र्थ रुपं ज्या याना वयाच्वंम्ह ८० दँया मोक्तानयात छत्रलक्ष्मी–रुद्रलाल प्रतिष्ठानं बिइगु याना वयाच्वंगु थुगु सिरपाः लःल्हाःगु खः । सर्वोच्च अदालतया पुलांम्ह प्रधानन्यायाधीश व राष्ट्रिय मानव अधिकार आयोगया पुलांम्ह अध्यक्ष अनुपराज शर्मां उगु पुरस्कार लःल्हानादीगु खः ।

मोक्तान म्हं मफगुलं नेपाल तामाङ घेदुङ संघया अध्यक्ष मोहन गोलें पुरस्कार लःल्हाना कयादीगु खः । ज्याझ्वलय् गैरसरकारी संस्था महासंघया सल्लाहकार व प्रतिष्ठानया अध्यक्ष शान्तलाल मुल्मीं च्वयादीगु सफू ‘रिलेन्टलेस जर्नी’या विमोचन नं जूगु खः । ज्याझ्वलय् न्ववासें मूपाहाँ शर्मां समाजसेवी रुद्रलाल मुल्मीं व वय्कःया काय शान्तलाल मुल्मीं यानाच्वंगु समाजसेवाया अनुकरण यायेमाः धाःसा समाजसेवाया सिद्धान्त व क्रियाकलाप थुइकेत विमोचित सफू ब्वनेमाःगु खँ धयादिल ।

ज्याझ्वलय् वरिष्ठ मानवाधिकारकर्मी प्रा. कपिल श्रेष्ठ, राष्ट्रिय योजना आयोगया दुजः सलोनी सिंह, नेपाल मानव अधिकार आयोगया पुलांम्ह दुजः गौरी प्रधान, अमेरिकाया निंतिं पुलांम्ह राजदूत डा. अर्जुन कार्कीं समाजसेवी रुद्रलाल मुल्मी व विमोचित सफूयात कयाः न्ववानादीगु खः ।

ऐतिहासिक बौद्ध ग्रन्थ ललितविस्तरयात कयाः शोधग्रन्थ याःगु सफू ‘ललितविस्तर शोधग्रन्थ’ छगू ज्याझ्वःया दथुइ पितब्वज्या जुगु दु ।

ईलोहं प्रकाशनपाखे प्रकाशित जुगु खःसा नरेशवीर शाक्यं च्वयादीगु खः । आनन्दकुटी विहारय् जूगु छगू ज्याझ्वःया दथुइ ललितविस्तरयात कयाः शोधग्रन्थ याःगु सफूया विहारया प्रमुख भिक्षु धम्ममूर्ति महास्थविर, भिक्षु पञ्ञामूर्ति, भिक्षु पियदस्सी, लोट्स रिसर्च सेन्टरया अध्यक्ष प्रा. डा. सुरेन्द्रमान वज्राचार्य, प्रकाशनया संरक्षक धर्मवीर शाक्य, सफूया दाता पद्मादेवी शाक्य व च्वमि शाक्यं मंकाःकथं विमोचन यानादीगु खः ।

ज्याझ्वलय् विहार प्रमुख भिक्षु धम्ममूर्ति महास्थविरं बुद्ध धर्म सम्बन्धी हरेक सफुतिं बियाच्वनीगु ज्ञानयात थःगु जीवनय् नं व्यावहारिक रुपं छ्यले फयेकेमाः धयाबिज्यासे ललितविस्तर ग्रन्थया शोधया महत्वयाया विषययात चर्चा यानाबिज्यात । च्वमि शाक्यं बुद्ध धर्मय् स्नातकोत्तर अध्ययनया झ्वलय् ‘ललितविस्तर एक तुलनात्मक अ्रध्ययन’ विषयय् शोध च्वयागु व उकियात हे सफूया आकार बियागु खँ कनादिल ।

लिसें वय्कलं बौद्ध ग्रन्थत भारतया नालान्दा विश्वविद्यालयय् मिं नयेधुंकाः नेपालय् जक ल्यनाच्वंगु खँ कनादिसें थुगु ग्रन्थयात हाकनं विश्वय् प्रचारय् हयेगु ल्याखं शोध च्वयागु खः धयादिल । ज्याझ्वलय् दाता शाक्य, सेन्टरया अध्यक्ष प्रा. डा. वज्राचार्य लगायतं सफूया थीथी पक्षयात कयाः नुगःखँ तयादीगु खः । नेपाःया बौद्ध ख्यलय् बिस्कं महत्व जाःगु ललितविस्तर छम्ह हे मनुखं छक्वलं च्वःगु मखु, थ्व थीथी इलय् थीथी व्यक्तिपिंसं च्वःगु ग्रन्थ खः ।

अथे हे सिद्धार्थ गौतम बुद्ध जगत उद्धार व प्राणी हितया निंतिं तुसिताभुवनं पृथ्वीलोकय् दिव्योपयदेश बीत तुयुम्ह किसिम्हय् च्वनाः कुहां बिज्याःगु व वनारसय् न्हाापांगु धर्मचक्र प्रवर्तन बियातःगु थेंज्याःगु खँ न्ह्यथनातःगु दु ।

किपू नगरपालिकाय् वंगु मंसिर १५ गते बुगंद्यःया मूर्ति व याकःमिसाया मूर्ति स्थापना यायेगुलि पानेजुुपिन्स विरोध याना वयाच्वंगु दु। बुगंद्यःया नित्य पूजा याइपि पुजारीपिन्स राष्ट्रपति, पुरातत्व विभाग, यल महानगरपालिका, गुठी संस्थानय् म्हिगः मंगलबाः ज्ञापन पौं लःल्हागु दु।

अथेहे किपू नगरपालिकाया उगु ज्याया विरोध याःगु दु। मूर्ति स्थापना यासे ह्यगृव भैरवनाथव ३२ पानेजु (पुजारी) संघं मंसिर १९ गते असहमति क्यसे विज्ञप्ति पिकागु खः। संघं २१ गते गुठी संस्थानया ज्याकूथिइ वना ध्यानाकर्षण पौं बिःगु खः। विरोधया बाबजुद न किपू नगरपालिकां वंगु पुस ३ गते मेगु विज्ञप्ति पिकया संघं बुगंद्यःया मूर्ति व याकःमिसाया मूर्ति हटे मयातले प्रसाद ग्रहण मयायेगु घोषणा याःगु खः ।

वयालिपा गुठी संस्थानया कुतलय् बुगंद्यःया जात्रानाप सम्बन्धित सरोकारवाला ज्योतिष, पुजारी, बाराही, ञवाल, घकु, मलिनी, भैरब पुजारीपिन्स न विरोध याःगु खः। विवादया दथुइ पानेजुपिन्स म्हिगः मंगलबाः यल महानगरपालिकानाप छलफल याःगु खः।

उगु छलफलय् मेयर चिरिबाबु महर्जनं औपचारिक रुपं विरोधया जानकारी नकतिनि वंगुलि आः समस्या समाधानया निति थःम्हेसिया कुतः यायेगु धका धयादीगु खः।