तिंख्यःया चकं दबुली भूमिगत पार्किङ दयेकेगु धकाः येँ महानगरपालिकां याःगु तयारी विरुद्ध सम्पदा अभियन्ता व येँया स्था–नीय जनतापिन्स येँ मनपाय् ज्ञापनपौ बिःगु दु ।

महानगरपालिका ज्याकू पिने करिब घौत्या धर्ना बियाःलि वयां लिपा मनपा ज्याकुथी वनाः ज्ञापनपौ बिःगु खः ।उगु ज्ञापनपौ मनपाया मेयर बालेन साहयात बीगु धकाः ज्याझ्वः दुगु खःसां मेयर साह ज्ञापनपौ कायेत मवःगुलिं उपमेयर सुनिता डंगोलयात लःल्हाःगु खः । ज्ञापनपौ लःल्हाना कासें उपमेयर डंगोलं जनचाहना अःखः तिंख्यलय् भूमिगत पार्किङ मदयेकेगु खँ धयादिल । वय्कलं स्थानीयवासीया सुझाव मदयेक गुगुं नं कथंया ज्या मन्ह्याकेगु प्रतिवद्धता नं प्वकादीगु खः ।

‘अकुपाई टुँडिखेल’पाखें ब्यानर सहित प्रदर्शन यासें मनपा ज्याकू घेराउ याःगु खः । उपमेयर डंगोलं आः काठमाडौं प्लाजा, धरहराय् दयेकाच्वंगु भूमिगत पार्किङं फुक्कं समस्या ज्यंकीगु जूगुलिं थप संरचना आवश्यक मजू धासें तिंख्यः ऐतिहासिक लिसे सांस्कृतिक ल्याखं नं महत्वपूर्ण जूगुलिं थुकिया संरक्षण यायेमाःगु बिचाः नं प्वंकादिल ।

नगर विकास कोषयात थुकिया सम्भाव्यता अध्ययन यायेगु जिम्मेवारी महानगरं बियागु धासें वय्कलं उगु अध्ययन लिपा डीपीआर यायेमाः कि म्वाः धइगु खँया निर्णय जुइगु जानकारी नं बियादिल । थुकिया प्रि–फिजि बिलिटी अध्ययनया नितिं महानगरं टाउन डेभलपमेन्ट फन्डयात जिम्मेवारी बियागु खँ कँसें वयां लिपा जक डीपीआर यायेगु वा मयायेगु धइगु निर्णय जुइगु व डीपीआर लिपा नं दयेकेगु कि मदयेकेगु धइगु निर्णय जुइगु खँ कनादिल ।

वंगु कार्तिकय् येँ मनपाया कार्य पालिका बैठकं तिंख्यलय् ‘ट्रिपल बेसमेन्ट’ पार्किङ व लः हाकनं रिचार्ज जुइगु विस्तृत परियोजना प्रतिवेदन (डीपीआर) दयेकेगु निर्णय याःगु खः । येँ मनपाया उगु निर्णययात कयाः विवाद ब्वलनाच्वंगु दु । सूत्रतय्सं धाःकथं अन पार्किङ दयेके मजिउ धकाः तःगू हे थासं दबाब वःसां नं मेयर साह धाःसा अझ नं लिचिउगु मदुनि ।

यलया दरवार क्षेत्रय् सवारी साधन प्रवेशलिसें पार्किङ निषेध जूगु दु । आवंलि यल दरवार क्षेत्र दुने छुं नं कथंया सवारी दुहांवनेगु लिसें पार्किङ याय् मदइगु जूगु खः ।

यल दरवार क्षेत्रयात व्यवस्थित व मर्यादित दय्केत धासें वंगु आइतबाःनिसें लागू जुककथं यल महानगरं थ्व नियम लागू याःगु खः । वंगु आइतबाः नगर प्रहरी प्रमुख सिताराम हाछेथुलिसें नगर प्रहरीया टोलीं पर्चा वितरणलिसें सरसफाइ ज्याझ्वः यानाः कार्यक्रम सुरुवातया जानकारी स्थानीय सर्वसाधारणयात ब्यूगु खः । महानगरया वैठकं दश बुँद निर्णय यासें थ्व कार्यक्रम लागू याःगु नगर प्रहरी प्रमुख हाछेथुं जानकारी बियादिल ।

कार्यक्रम अन्तर्गत विश्व सम्पदाय् सूचिकृत यल दरबार क्षेत्रय् मोटर साईकललिसें चार पाङग्रे सवारी प्रवेश निषेध लिसें सवारी पार्किङ नं याय् दइमखु । स्थानीय वासिन्दाया सवारी साधन दुतयंके दइगु जूसां पार्किङ धाःसा याय् मदइगु हाछेथुं धयादिल । लिसें उगु क्षेत्रय् धुम्रपान, मद्यपान, साईकल स्टन्ट याय्गु, चिया, कःनि आदि मीगु, तौल मेसिन तय्गुलिइ नं पंगु दु ।

धार्मिक महत्वया आकृति, वस्तु अले चिन्हय्, धार्मिक आस्थाय् ध्वइगु कथं गय्गु आदि नं आवंलि याय् मदइगु जूगु दु । उच्छृङ्खल तरिकां टिकटक वा मेगु भिडियो दय्के, अनुमति बिना फोटो सुट, म्यूजिक भिडियो वा छुं नं कथंया भिडियो सुटिङ व ज्याझ्वः याय्त नं महानगरपालिदकां रोक तःगु दु ।

थुगु नियमय् अटेर याःसा सुरुइ चेतावनी कथं न्यासः दां पुइकेगु वा लिपा १५ सय तक्क पुइकेगु हाछेथुं धयादिल । स्थानीय सम्पदाया संरक्षण व सम्वध्र्दनया लागिं सकलें जाय्त आम नागरिकयात नं हाछेथुं आह्वान यानादिल ।

नेपाल टेलिकमं पूर्वनिर्धारित तालिका कथं पुस १७ गतेनिसे सुरू जुइ धका धाःगुसा ‘फाइभ–जी सेवा’या ट्रायल स्थगित याःगु दु।

टेलिकमं न्ह्याकूगु प्रणाली कथं फाइभजी चले जुइगु मोबइलया ल्याः म्हो जुगुलि ट्रायल स्थगित याःगु खः । टेलिकमं फाइभ–जीको परीक्षणया लागि आन्तरिक रुपं तयारी अन्तिम चरणय् थ्यकूगु दु सा छु भचा प्राविधिक विषयया कारण फाइभ–जीया ट्रायक स्थगन जुगु दु धका प्रवक्ता शोभन अधिकारीं धाःगु दु। टेलिकमं १ जनवरीनिसे फाइभ–जी परीक्षण यायेगु धासे तयारी यानावःगु खः।

आः टेलिकमं थप तयारी यायेगु फाइभ–जीया परीक्षणकाल सुरु यायेगु तयारी याःगु खः। परीक्षणया लागि टेलिकमं उपकरण, प्रविधि जडाननाप जनशक्तियात तालिमनाप बिइ धुकुगु खः। सामान्य मोबाइल इन्टरनेट स्वया याकन फाइभजी इन्टरनेट औद्योगिक, सेवामूलक, नवप्रवर्तनात्मक व उच्च व्यवसायिक क्षेत्रय् छ्यलिइगु डाटा सुविधा दु ।

फाइभ–जीया परीक्षण याये न्ह्यः टेलिकमं थुकिया व्यवसायिक प्रयोगया सम्भावनाबारे न थप अध्ययन व छलफल याइ।

सरकार साझा न्यूनतम कार्यक्रम तय यायेत गठन याःगु कार्यदलं थौंनिसे प्रारिम्भक मस्यौदा च्वयेगु ज्या याःगु दु।

उपप्रधान नाप अर्थमन्त्री विष्णु पौडेल नेतृत्वया कार्यदलं सरकारय् दुथ्यागु दलया नेतापिनिगु समावेश यासे मस्यौदा तयार याइगु जुगु दु। राष्ट्रिय स्वतन्त्र पार्टी (रास्वपा)या महामन्त्री नाप कार्यदल सदस्य मुकुल ढकालं प्रारम्भिक चरणको छलफल क्वचाय् धुकुगु धका धयादीसे थौं आइतबाः निसे प्रारम्भिक मस्यौदा च्वयेगु ज्या सुरु जुगु दु धका धयादीगु दु ।

छु न दलयात आपत्ती जुइ मखु व याये मफइगु कथं साझा न्यूनतम ज्याझ्वलय् दथ्याइ धका धाःगु दु। पुस १४ गते च्वंगु सत्ता साझेदार दलपिनिगु बैठकं सरकारया साझा न्यूनतम कार्यक्रम तय यायेगु निर्णययासे उकिया संयोजकय् उपप्रधान नाप अर्थमन्त्री विष्णु पौडेलयात क्वछिगु खः। कार्यदलयात न्यान्हुया दुने शीर्ष नेतापिन्त मस्यौदा लःल्हाःगु दु।

कार्यदलं प्रारम्भिक मस्यौदायात शीर्ष नेतापिन्त अन्तिम रुप बिइ। अर्थतन्त्र सुधार, विकास निर्माण, याकन सरकारी सेवा, रोजगारी सिर्जना, सर्वसुलभ स्वास्थ्य सेवा, भ्रष्टाचार न्यूनीकरण लगायतया विषययात साझा कार्यक्रमय् दुथ्याकूगु दु धका नेतापिन्स धाःगु दु।

झिंस्वक्वःगु नेवाः एकता दिवस बलम्वुइ तःजिक हःगु याःगु दु ।

नेवाः देय् दबूया नायः पवित्र बज्राचार्यया सभाध्यक्षताय् जुग उगु ज्याझ्वलय् उमेश स्थापितं नेवाः एकता दिवसया औचित्ययात कयाः थःगु नुगः खँ तयादीगु खः।

उगु ज्याझ्वलय् चन्द्रागिरी नगरपालिकाया उपप्रमुख बसन्ती श्रेष्ठ आदिवासी जनजाति महासंघया नायः क्याम्सेर शेर्पा, नेपाल आदिवासी आयोगया नायः राम बहादुर थापामगर, वागमती प्रदेशया सभासद रमा आले मगर लगायत वक्तापिन्सं थःथःगु नुगः खँ तयादीगु खःसा लोककवि राजभाई जकःमिं नेवाः एकता दिवसया विषयवस्तुयात कःघाना च्वयातःगु चिनाखँ नं ब्वना न्यंकादीगु खः।

बलम्वुया थीथी सांस्कृतिक व संगीतकःमिपिन्सं म्ये हाला व हुलाप्याखँ ल्हुला क्यनेगु नं याःगु खः ।