सासनधज धम्माचरिय अग्गमहाग्थकवाचक धम्मवती गुरुमांया ९० दँ बुदिंया लसताय् धर्मकीर्ति विहारय् वाःयक अभिधम्म पाठ यायगु ज्याझ्वः थौं क्वचाःगु दु।

थुगु ज्याझ्वलय् थीथी विहारय् विराजमान जुया विज्यापिं भन्ते गुरुमाजुपिन्सं अभिधम्म पाठ याना बिज्यागु खः ।

लामा भिक्षुपिं व बज्राचार्य गुरुपिं गुरुमापिन्सं श्रद्धेय धम्मावति गुरुमांया ताःआयु, भिं उसाँय् या कामना यासें गुरु प्रा.डा. नरेशमान बज्राचार्यया नेतृत्वय् अपरिमित पाठ, भद्रचरी पाठ व गुरुपाखें धर्मदेशना याना बिज्यागु खः ।

नापं वसपोलं धर्मदेशना यायगु झ्वलय् छपु बाखं नं कना बिज्यागु खः । अथेहे अभिधम्म पाठ यायगु झ्वलय् आपालं उपासक उपासिकापिं नं उपस्थित जुया पाठ यानादीगु दु।

प्रतिनिधिसभा बैठक कन्ह्यः बिहीवाः तक या लागि स्थगित याःगु दु।

प्रमुख प्रतिपक्ष दल नेकपा एमाले न अवरोध याःगु कारणं प्रतिनिधिसभाया बैठक कन्ह्यः न्हिनय् २ बजेतकया लागि स्थगित याःगु खः।

थौं बैठक शुरु जुइवं हे एमालेया सांसदपिन्स प्रधानमन्त्री पुष्पकमल दाहाल प्रचण्डं ‘थःत प्रधानमन्त्री दयकेत व्यवसायी प्रितम सिंह दिल्ली ब्बाय् वःगु’ भन्ने अभिव्यक्तिइ आपत्ति यासे बैठक अवरोध याःगु खः।

वया लिपा सभामुख देवराज घिमिरे न बाघौया लागि बैठक स्थगित याःगु खः।

सरकारं मिटरब्याज पीडितया समस्या समाधानया लागि हःगु अध्यादेश निष्क्रिय जूगु दु।

वंगु वैशाख २० गते सरकारं हःगु मुलुकी संहितासम्बन्धी छु नेपाल ऐनयात संशोधन याना अध्यादेश २०८० या प्रतिस्थापन विधेयक संविधान कथं ६० दिं दुने संसदपाखे पारित यायेमाःगु जुगुलि निष्क्रिय जूगु दु।

अध्यादेशया प्रतिस्थापन विधेयक राष्ट्रियसभां असार १५ गते पारित याना प्रतिनिधिसभाय् छ्वंगु खः। प्रतिनिधिसभां बुधवाः तक पारित याना राष्ट्रियसभाय् छ्वये माःगु व राष्ट्रियसभां प्रमाणित याना राष्ट्रपतिया थाय् छ्वयेमाः।

तर प्रधानमन्त्री पुष्पकमल दाहाल प्रचण्डं थःत प्रधानमन्त्री दयकेत भारतीय नागरिक प्रितम सिंह पटक पटक दिल्ली वःगु धागु बिःगु अभिव्यक्तिं नेकपा एमाले न प्रतिनिधिसभा व राष्ट्रियसभा अवरुद्ध याःगु खः।

एमालेया अवरोध लिपा राष्ट्रियसभाया बैठक बिहीवाः न्हिनय् १ बजे तक या लागि स्थगित जूगु दु।

विपक्षी दलपिनिगु अवरोधया कारण प्रतिनिधिसभाया बैठक बाघौंया निति स्थगित जूगु दु ।

प्रधानमन्त्री दयकेत प्रितम सिंह पटक पटक दिल्ली वःगु धका धागु प्रधानमन्त्री प्रचण्डया अभिव्यक्तियात कया प्रमुख प्रतिक्षी दल एमाले, रास्वपा व राप्रापाया सांसदपिन्स विरोध यायेवं सभामुख देवराज घिमिरें बाघौंया निति स्थगित यानागु सूचं बिःगु खः।

एमाले सांसद रघुजी पन्तं थःत प्रधानमन्त्री दयकेत प्रितम सिंह पटक पटक दिल्ली वःगु प्रधानमन्त्री प्रचण्डया अभिव्यक्तिइ आपत्ति प्वकूगु खः ।

शेयर बजाः परिसूचक नेप्से थौं बुधवाः ३९ दशमलव २६ अङ्कं कुहावःगु दु। म्हिगः मङ्गलवाः सामान्य थहावःगु नेप्से थौं यक्को अङ्कं कुहावया २ हजार ४९ दशमलव ४४ विन्दुइ कुहावःगु खः।

थौं दकलय् अप्पो समूहया शेयर कुहावगुलि जीवन बिमा समूहया शेयर ४ सय ९ व निर्जीवन बिमा समूहया शेयर ३ सय १० अङ्कं स्वया अप्पो घटे जूगु दु। नेप्से उच्च अङ्कं घटे जूसा कारोबार रकम धाःसा म्हिगः स्वया अप्पो थहावःगु दु।

म्हिगः २ अर्ब ५७ करोड ६१ लाख रुपैयाँया शेयर कारोबार जूगुलि थौं ३ अर्ब ७ करोड रुपैयाँया शेयर कारोबार जूगु दु। दकलय् अप्पो थौं शिवम् सिमेन्टया १६ करोड ३९ लाख रुपैयाँया शेयर किनबेच जूगु खः। थौं २ सय ७७ गू कम्पनीया शेयर कारोबार जूगुलि १४ गु कम्पनीया भाः थहावःगु दु सा २ सय ८ गु कम्पनीया भाः कुहावःगु दु।

निगु कम्पनीया शेयर भाः धाःसा स्थिर जूगु दु। बीपीडब्ल्यू लघुवित्त व मोदी इनर्जीया शेयर १० प्रतिशतं कुहावःगु खः। मोदी इनर्जीया शेयर थौं न्हापागु कारोबारय् नकरात्मक सर्किट लाःगु दु।

समग्र बजाः घटे जूसा सिटी होटल व रावा इनर्जीया शेयर १० प्रतिशत स्वया अप्पो थहावःगु दु।