बज्रयान अध्ययन केन्द्रया कार्यक्षेत्र विषयक विचार गोष्ठि व बज्रयान पुस्तिकाया बिमोचन अक्षेश्वर महाविहारय पुल्चोकय् छगु ज्याझ्वः दथुइ जुगु दु ।

उगु गोष्ठीइ लुम्विनी विश्व विद्यालयया निवर्तमान उपकुलपति ह्रदयरत्न बज्राचार्यं बज्रयान अध्ययन केन्द्रया परियोजनायात कयाः थःगु खँ तयादिगु खः । अध्ययन केन्द्रया नायः प्रा.डा.नरेशमान बज्राचार्यया सभाध्यक्षताय् जुगु उगु गोष्ठीइ लुम्विनी विश्व विद्यालयया डीन मानिक रत्न शाक्य, वागमति प्रदेश सांसद शैलेन्द्ररत्न बज्राचार्य पिन्सं थःथःगु बिचाःत प्वंकादिगु खः।

ज्याझ्वलय् यलया उपमेयर मञ्जली बज्राचार्य, प्रा.डा.नरेशमान बज्राचार्य, माणिक रत्न शाक्य, सांसद शैलेन्द्रमान बज्राचार्य, भिक्षु बोधिज्ञान, लामा भन्तेपिन्सं मंकाः रुपं बज्रयान सफू उलेज्या यानादीगु खः ।

बज्रयान अध्ययन केन्द्रया कार्यकारी निेर्देशक सुरेन्द्रमान बज्राचार्यजुं लसकुस न्वचु बियाः न्ह्याःगु थुगु गोष्ठीस ब्वति कयादीपिं बौद्ध विद्धानपिंपाखें अध्ययन केन्द्रयात अझ क्वातुक न्ह्याज्याका यंकेत माःमाःकथंया दुग्यंगु सुुझाब बिइगु ज्या नं याःगु खः ।

नेवाः पत्रकार राष्ट्रिय दबूया निक्वःगु पुर्ण बैठक यलय् क्वचाःगु दु। उगु बैठकय् पत्रकार दबूया महासचिव केके मानन्धरं आःतक जुगु ज्याझ्वःया प्रतिवेदन व दांभरि बाबुकाजि श्रेष्ठं आर्थिक प्रतिबेदन न्ह्यब्वयादीगु खः।

निक्वःगु पुर्ण बैठकय् नायः नृपेन्द्रलाल श्रेष्ठ आःतक जुगु ज्याझ्वः भावि योजना न्ह्यब्बयादीगु खः। बैठकय् मातृभाषा शताब्दी दिवस तःजिक हनेगु कथं क्वछिगु दु।

अथेहे पत्रकार दबू न ६५ दँ दुपि व नीदँनिसे मातृभाषा पत्रिकाय् मदिक्क ज्या याना च्वपिन्त न सामाजिक भत्ता बिइगु बिषय सहलह न जूगु दु।

धर्मादित्य निसे थौं तक पत्रकारिता याना च्वपि पत्रकारपिनिगु म्हसिका पिकायगु सर्वसम्मत निर्णय जूगु दु।

नाप संगठन बिस्तार याना याकन हे प्रदेश कमिति दयेकगु निति ज्या जुयाच्वंगु दु धका संगठन बिभागया प्रमुख नाप न्वकु सुरेन्द्रभक्त श्रेष्ठं धयादीगु खः।

अथेहे थी थी बिभागय् ल्यःदुपि सदस्यपिन्त याकने हे पुर्णता बिइगु न क्वजिगु दु।

नेवाः पत्रकार राष्ट्रिय दबू प्रशिक्षण बिभागया ग्वसालय् व यल महनागरपालिका १६ वडाया ग्वाहालिं संस्कृति, सम्पदा व पर्यटन प्रर्बद्धनय् संचारया भुमिकाया बिषय छगु अन्तरक्रिया जूगु दु।

उगु अन्तरक्रिया ज्याझ्वलय् नेपाल आदीवासी जनजाति पत्रकार महासंघया न्वकु अमर ध्वज लामा, संस्कृतिविद जितेन्द्र बज्राचार्य व दबूया वरिष्ठ न्वकु सुनिल महर्जनपिसं प्रशिक्षण बियादिगु खः।

ज्याझ्वलय् मूपाहाँ कथं यल महानगरपालिका १६ वडा अध्यक्ष निर्मल रत्न शाक्य झायादीगु खः। पत्रकार दबूया नायः नृपेन्द्रलाल श्रेष्ठया सभाध्यक्षताय् उगु ज्याझ्वलय् मूपाहा शाक्य प्रशिक्षकपिन्त सुभाय् पौ लःल्हानादीगु खः।

उगु ज्याझ्वलय् दबूया संस्थापक नायः श्रीकृष्ण महर्जनं संस्कृति व सम्पदा यायेगु निति पत्रकार दबूपाखे न ग्वाहालि याना वयाच्वगु दु धका धयादीगु खः। 

उगु ज्याझ्वलय् प्रशिक्षण बिभागया प्रमुख सुनिल महर्जनं पत्रकार दबूपाखे यलय् निगु दँशकनिसे बन्द जुया च्वंगु पाःया जात्रा दबूया ग्वाहालि हाकन निरन्तर न्ह्याकेत ताःलागु खँ न्ह्यथनादिगु खः।

भारतया सिक्किमय् च्वंगु राष्ट्रिय भाषा नाप संस्कृति बिद्यालय, गान्तोकया ब्वनामिपिन्त वंगु येँय् लसकुस याःगु दु।

बिद्यालयया प्रमुख बिकास प्रधानया नेतृत्वय् वःपिं नीम्हेसित येँया तजिलजि गुथि, नेपाःपाखें लसकुस याःगु खः । तजिलजि गुथि नेपाःया नायः राजु नापित, न्वकू शान्तकुमार महर्जन, छ्याञ्जे सन्धिर महर्जन, दांभरि तुलसा श्रेष्ठ, दुजःपिं सुनिता महर्जन व प्रनिमा नापितं खादां न्ययेका ख्येँ सगं बिया नेवाः परम्परा कथं लसकुस याःगु खः।

उगु हे ज्याझ्वलय् जीवित कुमारी संस्कृति संरक्षण, संवद्धन नापं प्रचारप्रसार यानाच्वंगु ह्यूमत मिसा पुचःनाप म्हसिका कालबिल याःगु खः। पुचःया नायः मचानानी महर्जनं पदाधिकारीया म्हसिका बियां कुमारी संस्कृति संरक्षणय् यानावयाच्वंगु ज्याझ्वःया बारे जानकारी बियादीगु खः।

नेपाःया धार्मिक, सांस्कृतिक व ऐतिहासिक सम्पदा नापं नेवाः तजिलजि अध्ययनया नितिं शैक्षिक भ्रमणय् वःपिन्त लसकुस लिपा गुथिया नायः नापितं नेवाः भ्वय्या बारे जानकारी बिसें सकलसित भ्वय् नं नकूगु खः।

उपप्रधानमन्त्री लिसे गृहमन्त्री नारायणकाजी श्रेष्ठ न्यान्हु भ्रमण यायेगु झ्वलय् चीन प्रस्थान याःगु दु।

उपप्रधानमन्त्री श्रेष्ठ नाप न्ह्यम्ह सदस्यीय प्रतिनिधिमण्डलपि थौं चान्ह्यः चीनया सिचुवान प्रान्त भ्रमणया लागि प्रस्थान याःगु दु। श्रेष्ठ छेन्दु अन्तर्राष्ट्रिय विमानस्थय् अवतरण जूया थौं हे ‘पश्चिमी चीन अन्तर्राष्ट्रिय मेला’ या लसकुस भ्वँजय् ब्बति काइगु जुगु दु।

उपप्रधानमन्त्री श्रेष्ठ बिहीवाः ‘पश्चिमी चीन अन्तर्राष्ट्रिय मेला’ य् उलेज्या झ्वलय् ब्बति कायेगु निति विशेष अतिथिया कथं सम्बोधन याइगु ज्याझ्वः दु। अथेहे न्हिनय् छेन्दुइ योजना प्रदर्शनी हल व अन्तर्राष्ट्रिय मित्र शहर सिचुवानया भ्रमण लिसे प्रदर्शनी अवलोकन याइगु ज्याझ्वः दु ।

अथेहे उगु हे दिं बहनि चिनियाँ कम्युनिष्ट पार्टी, सिचुवान प्रान्तया नेतापि नाप बेलिया ज्याझ्वः न दु ।

परराष्ट्र मन्त्रालयया सहसचिव लोकबहादुर थापा, गृहमन्त्रालयया सहसचिव रुद्रदेवी शर्मा, उद्योग मन्त्रालयया सहसचिव महेश बराल, उपप्रधानमन्त्री श्रेष्ठया स्वकीय सचिव सुरेशकाजी श्रेष्ठ, राष्ट्रिय समाचार समितिया संवाददाता अशोक घिमिरे व अङ्गरक्षक बाबुराम खरेलपि प्रतिनिधिमण्डलय् दुथ्याःगु खः।