नेवाः पत्रकार राष्ट्रिय दबू न थौं स्वम्ह मिसा पत्रकारपिन्त साधना पत्रकारिता सम्मान लःल्हागु दु।

थौं ११३ क्वःगु अन्तर्राष्ट्रिय नारी दिवसया लसताय् एफएमया पत्रकार सञ्चुकुमारी लामा, नेपाल टेलिभिजनया अञ्जना शिल्पकार व गोर्खापत्रया फोटोपत्रकार कविता थापायात छगु ज्याझ्वः दथुइ साधना पत्रकारिता सम्मान लःल्हाःगु खः। यलया पुल्वया अक्षेयश्वर महाविहारय् जुगु उगु ज्याझ्वःया संयोजक रचना श्रेष्ठं स्वामा, नेपाल आदिवासी जनजाति पत्रकार महासंघया अध्यक्ष गजुरधन राई न दोसल्ला न्यकूगु खःसा यल महानगरपालिकाया उपमेयर मञ्जरी (आस्था) शाक्यं हनापौं लःल्हाना सम्मान यानादीगु खः।

नेपाःया न्हापाम्ह पत्रकार साधना प्रधानया नामय् पत्रकारिता ख्यलय् महत्वपूर्ण योगदान यानादीपि पत्रकारपिन्त थुगु सम्मान लःल्हायेगु ज्या जुगु खः धका दबूया उपाध्यक्ष नापं ज्याझ्वःया कजि रचना श्रेष्ठं जानकारी बिःगु खः।

ज्याझ्वःया मूपाहाँ उपमेयर शाक्यं पत्रकारिता ख्यलय् आदिवासी जनजाति मिसापिनिगु उपस्थितिया लागि महानगरपालिका नापं ज्या यायेगु प्रतिबद्धता व्यक्त यानादीगु खः। वयकलं मिसापिन्त जुइगु विभेद, सामाजिक रूपान्तरण व आदिवासी जनजातिया मुद्दा ल्ह्वनेगु निति पत्रकारपिनिगु तधःगु भूमिका दु धका धयादीगु खः।

उगु ज्याझ्वलय् नेपाल प्रज्ञा प्रतिष्ठानया पूर्व सदस्य नाप वरिष्ठ मिसा साहित्यकार सुलोचना मानन्धर धितालं नेपाःया न्हापाम्ह मिसा पत्रकार साधना प्रधान अधिकारीया संघर्षपूर्ण जीवनगाथा, सामाजिक ख्यलय् ह्यूपाः हयेगु कुतःया विषय केन्द्रीत जुया थःगु बिचाः तयादीगु खः । वयकलं थीथी भाषाभाषीया साहित्य ख्यलय् न तधःगु  योगदान दुगु खँ सञ्चारमाध्यमं तधःगु थाय् बिया न्ह्यने हयेमाः धका धयादीगु खः। नेपाल आदिवासी जनजाति पत्रकार महासंघ (फोनिज)या अध्यक्ष गजुरधन राई न सञ्चारमाध्यमय् आदिवासी जनजाति मिसापिनिगु, बुँखय् लैङ्गिकया बिषय ल्ह्वनेगु ज्या फोनिज याना वयाच्वनागु दु धका धयादीगु खः।

अध्यक्ष राई न नेपाःया सञ्चारमाध्यमयात समावेशी दयकेगु, मातृभाषाया पत्रकारिता विकास यायेत राज्य व स्थानीय तहं बालाक्क ज्यायायेमाःगु धका न्ह्यथनादीगु खः। क्रियाशील महिला पत्रकार मञ्चया अध्यक्ष संगीता लामां आदिवासी जनजाति मिसापिन्त त तधःगु सञ्चारमाध्यमय् ज्या यायेगु हैसियत दयकेगु निति ज्ञान, सीप व तालिम बिइगु ज्या यायेमाः धका धयादीगु खः।

अथे हे पत्रकार राष्ट्रिय दबूया अध्यक्ष नृपेन्द्रलाल श्रेष्ठं पत्रकारिता ख्यलय् न्ह्यने यकूपि नामय् नेपाल पत्रकार महासंघ व नेपाल प्रेस काउन्सिल नुगः स्याना च्वंगु दु धका धयादीगु खः। नेपालय् मिसा पत्रकारपि साधना प्रधान व कामक्ष्यदेबी २००८ सालय् महिला नांया पत्रिकाया सुरुवात यागु खःसा थौं तक नेपाःया न्हापाम्ह मिसा पत्रकारपि सू धइगु आःतक इतिहास पिकाये मफू दुःखया खँ खः धका धयादीगु खः। अथेतु पत्रकारपिन्त संगठित यायेगु ज्यायाम्ह सत्यनारायण बहादुर श्रेष्ठ नाप नेपाःया न्हापाम्ह मातृभाषाया पत्रकार धर्मादित्या धर्माचार्यया तक गन पत्रकारिता ख्यलय् हयाच्वंगु मदु धका धयादीसे आः याकन हे नेपाःया न्हापाम्ह मिसा पत्रकार सू धइगु याकन हे छगु राष्ट्रिय गोष्ठि यायेगु जुइ धका धयादीगु खः।

उगु ज्याझ्वलय् पत्रकार दबूया महासचिव केके मानन्धर, सहसचिव सुनीता महर्जन व सम्मानित जुयादीम्ह सन्चु लामा न न थःथःगु खँ तयादीगु खः।

राष्ट्रिय प्रजातन्त्र पार्टी (राप्रपा) राष्ट्रपति निर्वाचनय् तटस्थ च्वनिइगु जुगु दु।

थौं च्वंगु कार्यसम्पादन समितिया बैठकं निम्ह उम्मेदवारपिन्त भोट मतयेगु व तठस्थ च्वनिइगु निर्णय जुगु दु धका पार्टी प्रवक्ता मोहन श्रेष्ठं जानकारी बिःगु दु।

राष्ट्रपतिया निर्वाचन कन्ह्य जुइत्यःगु दु। राष्ट्रपतिइ कांग्रेसया रामचन्द्र पौडैल व एमालेया सुवास नेम्वाङ प्रतिस्पधाय् यायेत्यःगु दु।

नेकपा एमाले न राष्ट्रपति निर्वाचनबारे थःपिनिगु सांसदपिन्त अभिमुखीकरण याःगु दु। यलया च्यासलय् पार्टी मुख्यालय एमाले न प्रतिनिधिसभा, राष्ट्रियसभा व प्रदेशसभाया सांसदपिन्त अभिमुखीकरण याकूगु खः।

अभिमुखीकरण ज्याझ्वलय् एमाले अध्यक्ष केपी शर्मा ओलीं एमालेपाखे राष्ट्रपतिया उम्मेदवार जुयादीम्ह सुवासचन्द्र नेम्वाङयात त्याकेगु निति पार्टीं काइगु रणनीति, विपक्षी पार्टीया मतदाता सालेगु रणनीति व वर्तमान राजनीतिक अवस्थाया बारेय् जानकारी याकूगु खः।

वयकलं राष्ट्रपतिया निर्वाचनय् एमालेपाखे उम्मेदवार जूम्ह सुवासचन्द्र नेम्वाङया त्याकेगु लागि ज्याझ्वः जुगु खः धका धयादीसे वयकलं लोकतन्त्रया रक्षा यायेत दक्को राजनीतिक दलनाप एमाले न सहकार्य यायेगु धका धयादीगु खः।

राष्ट्रपतिया उम्मेदवार नेम्वाङं थः राष्ट्रपतिइ निर्वाचित जुलकि न्हापागु दायित्व संविधानया रक्षा यायेगु धका धयादीगु खः।

क्षत्रपाति निःशुल्क चिकित्सालयया ग्वसालय् धुम्रपान व सुर्तीजन्य पदार्थ सेवन विरुद्ध छगू सचेतना ¥याली जुगु दु।

चिकित्सालयया ग्वसालय् धुम्रपान व सुर्तीजन्य पदार्थया उपभोगपाखें ब्वलनीगु ल्वय्या रोकथाम व नियन्त्रण सम्बन्धय् उगु सचेतना ¥याली जूगु खः ।

स्वास्थ्य मन्त्रालय, स्वास्थ्य कर कोष सचिवाल व येँ महानगरपालिका १७ वडाया ग्वाहालिइ फागुन २० गते जूगु सचेतना ¥याली लिपा निःशुल्क स्वास्थ्य शिविर नं जूगु खः ।

स्वास्थ्य शिविरय् ७१ म्हेसिया हिया परीक्षण यायेगु नापं निःशुल्क रुपं ईसीजी व एक्स–रे सेवा नं उपलब्ध याकूगु खः ।

उगु स्वास्थ्य शिविरय् वरिष्ठ छाती ल्वय् विशेषज्ञ डा.कोमल किरण प्रधान, फिजिसिन डा.सन्तोष मानन्धर, मेडिकल अफिसर डा.रोशन तामाङ्ग र डा.प्रज्ञात सिंहया पुचलं ल्वगितय् स्वास्थ्य परीक्षण यानादीगु खः ।

थौं होली नखः देय् थीथी थासय् तजिक हना च्वंगु दु।

थीथी थासय् ज्याझ्वः याना होली म्हिता च्वंगु दु। येँया बसन्तपुरय् होली विशेष ज्याझ्वः यानाच्वंगु दु।

बसन्तपुरय् जुयाच्वंगु होलीइ विदेशी पर्यटकपिनिगु न यक्को सहभागिता दु।