अदालतया अवहेलनासम्बन्धी मुद्दाय् सर्वोच्च अदालतं येँ महानगरपालिकाया मेयर बालेन शाहयात लिखित लिसः फ्वंगू दु।

अधिवक्ता वर्षाकुमारी झा न बिःगु निवेदनय् न्यायाधीश तिलप्रसाद श्रेष्ठया एकल इजलासं मंगलवाः लिखित लिसः फ्वंगू दु।

उच्च अदालत, यलं भारतीय चलचित्र प्रदर्शन रोके मयायेत बिःगु आदेश लिपा येँ महानगरपालिकाया मेयर बालेनं सार्वभौमिकता व स्वाधिताया सवालय् छु न कानुन व अदालतयात मानेमयागु धका धाःगु खः।

दँय् दँसं बियावया च्वंगु मदन भण्डारी राष्ट्रिय सिरपाः थुगुसि न बिइगु जुगु दु। मदन भण्डारी फाउण्डेशनं २०६८ सालनिसे मदन भण्डारी राष्ट्रिय सिरपाः व वंगु २०७८ सालनिसे अध्ययन, अनुसन्धान याना च्वंगु मनू वा संस्थायात सिरपाः लःल्हाना वयाच्वंगु खः।

थुगु दँया मदन भण्डारी राष्ट्रिय सिरपा सोलु दूधकुण्ड नगरपालिका–४, फाप्लु, सोलुखुम्बु च्वम्ह डा.मिङमार गेल्जेन शेर्पा व हेटौँडा उपमहानगरपालिका–४ प्रतिभानगर, मकवानपुरय् च्वम्ह निरु कुमारी मगरयात लःल्हाइगु जुगु दु।

उगु सिरपाः छगु ज्याझ्वः दथुइ थ्व हे वइगु असार १४ गते जननेता मदन भण्डारीया ७२ क्वःगु बुदिंया लसताय् लःल्हाइगु जुगु दु। हना पौं नाप १ लाख नगद न लःहाइगु ज्याझ्वः दु।

नेपालभाषाया संकिपाख्यःया कलाकार नाप निर्देशक स्वतन्त्र संसार महर्जन म्हंमफया थौं चान्ह्यः शहिद गंगालाल हस्पिटलय् भर्ना जुयादीगु दु।

वयकः छातिइ समस्या जुइवं थौं चान्ह्यः शहिद गंगालाल हस्पिटलय् भर्ना जुयादीगु दु। थौं सुथय् वयकःयात एनजीओ प्लास याःगु धका वयकःया जहान प्रेमा महर्जन जानकारी बियादीगु खः।

आः वयकःया स्वास्थ्य सुधार जुगु दु धका वयकःया जहानं धयादीगु दु।

नेपाः राष्ट्रिय पार्टीया न्हापाम्ह न्वकु डा. रमेश कुमार श्रेष्ठ आकाझाकां मन्त।

अमेरिकाय् च्वना च्वम्ह वयकः मदुगु धका धका वयकःया काय् शरलकुमार श्रेष्ठं थःगु सामाजिकं संजालपाखे जानकारी बियादीगु खः।

मदुम्ह श्रेष्ठया छम्ह काय्, छम्ह म्ह्याय् व जहान दी।

नेपाःया संविधानय् सांस्कृतिक संरक्षण क्षेत्रयात बियातःगु अधिकारयात ध्वाथुइकिगु नितिं नेवाः देय् दबू स्वनिगः विशेष प्रदेश व नेवाः मिसा दबूया मंकाः ग्वसालय् धौख्यलय् स्वन्हुयंकं प्रशिक्षण ज्याझ्वः जूगु दु।

नेवाः मिसा दबूया नायः कस्तुरी श्रेष्ठया सभाध्यक्षताय् जूगु उगु ज्याझ्वलय् प्रशिक्षणय् ब्बतिकाःपिन्त देय् दबूया नायः पवित्र बज्राचार्यं दसिपौ लःल्हानादीगु खः । देय् दबूया न्वकूपि उमेश स्थापित व रश्मिला प्रजापति नाप स्वनिगः विशेष प्रदेश समितिया नायः श्रीकृष्ण महर्जनं यूएनडीपी, आईएलओ १६९ या विषययात कयाः प्रशिक्षण बियादीगु खः ।

अथेहकानूनी प्रावधानयात कयाः अधिवक्ता नरेश श्रेष्ठ, तोखाया अनुभवयात कयाः गणेशमान श्रेष्ठपिन्सं प्रशिक्षण बियादीगु खः ।