गृह मन्त्रालयं बहालवाला व पूर्वकर्मचारी नाप सुरक्षाकःमिपिन्स नियम विपरीत व्यक्तिगत सुरक्षाकःमि व ग्वाहालिमि तयातःगु ४८ घौं दुने थःगु मातहतया सुरक्षा निकायपिन्त निर्देशन बिःगु दु।

मन्त्रालयं कन्ह्यः मंगलबाः छगु विज्ञप्ति जारीयासे ‘विशिष्ट मनूतयेगु सुरक्षा व्यवस्थापन कार्यविधि २०७७ या व्यवस्था स्वया अखः सेवा सुविधा कयातःगु व व्यक्तिगत सुरक्षाकःमि नाव ग्वाहालि तयातःगु दु सा ४८ घौं लिपा लितः बिइत निर्देशन बिःगु दु।

मन्त्रालयया प्रवक्ता फणिन्द्रमणि पोखरेलं विज्ञप्ति जारीयासे बहालवाला नाप पूर्व कर्मचारी÷सुरक्षाकपिन्स कार्यविधि क्वछिनातःगु जक व्यक्तिगत सुरक्षाकःमिया सुविधा काये धइ धका धाःगु दु।

नेपाली कांग्रेसया सभापति नाप पूर्व प्रधानमन्त्री शेरबहादुर देउवा छेँ बालाकया च्वनिइगु जुगु दु।

प्रधानमन्त्रीं पदमुक्त जुइवं धुम्बाराहीलय् छेँ बालंकया च्वनिइगु जुगु दु। बुढानीलकण्ठय् च्वंगु छेँय् दयकाच्वंगुलि मेथाय् बालं कया च्वनेत्यःगु खः धका वयकःया सचिवालयं धाःगु दु।

देउवाका सचिवालयया छम्ह दुजलं कन्ह्यः सुथय् सरकारी निवास त्वतिइ धका धाःगु दु।

येँया वघलय् च्वंगु मानन्धरपिनिगु बाका देय् सनाःगु खलःया २४ क्वःगु दँमुज्या क्वचाःगु दु।

गुथीं ऐतिहासिक व धार्मिक महत्व दुगु बाका भैरव खः उगु ज्याझ्वलय् शिक्षासेवी विजय कुमार मानन्धरं येँया जात्राय् थुगु आकास भैरव न प्रदर्शन जुइ धका धयादीगु खः। ‘आः बाका भैरवं तत्कालीन येँ देय् बच्छि भूभाग त्याकूगु खः। बछि व बाखा भैरव शब्द अपभ्रंस जुया बाका भैरव जुगु धका धयादीगु खः।

उगु ज्याझ्वलय् संघीय सांसद माननीय विराजभक्त श्रेष्ठं बाका भैरव गुथीयात व्यवस्थित याना यकेत ग्वाहाली यायेगु धका धयादीगु खः। सांसद श्रेष्ठं सामुदायिक रुपं संगठित जूपि संस्कृति संरक्षणय् योगदान यायेत इनाप यानादीगु खः ।

नागरिक उन्मुक्ति पार्टी सरकारय् सहभागी मजुइगु जुगु दु।

अध्यक्ष रञ्जिता श्रेष्ठया कथं राजनीतिक माग पुरा मजुतले पार्टी सरकारय् सहभागी मजूइगु दु।

श्रेष्ठं थौं डिल्लीबजारया कारागारय् वना रेशम चौधरीनाप छलफल याःगु खः। नागरिक उन्मुक्ति पार्टीपाखे प्रतिनिधि सभाय् प्यम्ह सांसदपि निर्वाचित जुगु खः।

रवि लामिछाने राष्ट्रिय स्वतन्त्र पार्टी (रास्वपा) चायेका राजनीतिइ वम्ह रवि लामिछाने न राजनीतिपाखे ‘बा’पिन्त विदा बिइमाः धका धाःगु खः ।

‘बा’पिं शेरबहादुर देउवा, केपी शर्मा ओली व पुष्पकमल दाहाल ‘प्रचण्ड’ मध्ये छम्हेसित थःम्हेसिया सांसद याके बिइ मखु धका धाःगु खः। रविं माओवादी अध्यक्ष प्रचण्डविरुद्ध चितवन–३ य् चुनाव ल्वाइ धका गोरखा–२ पाखे प्रचण्ड वःगु खः। म्हिगः नो नट अगेन धाःम्ह प्रचण्डयात प्रधानमन्त्री दयकेगुलि निर्णायक भूमिका निर्वाह याःगु खः।

नेपाली कांग्रेसं थःत प्रधानमन्त्री बिइत तयार मजुइवं माओवादी अध्यक्ष प्रचण्ड एमाले नाप मिले जुगु खः। माओवादी व एमाले मिले जुया जक सरकार दयके मफइगु अवस्थाय् प्रतिनिधिसभाय् २० सांसद दुम्ह रवि नाप राप्रपा व चिचि धःगु दल नाप १६९ म्हेसिगु समर्थनय् प्रचण्ड प्रधानमन्त्री जुगु खः। रवि प्रचण्ड नेतृत्वया सरकारय् उपप्रधानमन्त्री नाप गृहमन्त्री जुगु खः।

गृहय् माओवादी केन्द्रया वरिष्ठ उपाध्यक्ष नारायणकाजी श्रेष्ठं दाबी याःगु खः। तर श्रेष्ठयात रोकेयाना रविं गृह मन्त्रालय कायेत ताःलागु खः।

म्हिगः सुयात नो नट अगेन धाःगु खः, उमिगु हे सरकारय् वःगु विषययात कया रास्वपाय् असन्तुष्टि जुयाच्वंगु दु । केन्द्रीय सदस्य गणेश कार्की सरकारय् सहभागी जूगुलि असहमति यासे पार्टी कार्यालयय् छगु पौ दर्ता याःगु खः।