नागरिक उन्मुक्ति पार्टीया अध्यक्ष रञ्जिता श्रेष्ठयात उपराष्ट्रपतिया उम्मेदवार दयकिइगु जुगु दु।

नागरिक उन्मुक्ति पार्टीया शुक्रबाः सुथय् च्वंगु संसदीय दलया बैठकं श्रेष्ठयात उपराष्ट्रपतियाःगु उम्मेदवार दयकेगु निर्णय जूगु दु धका प्रमुख सचेतक गंगाराम थारुं जानकारी बिःगु दु।

नेपाली कांग्रेस व नेकपा माओवादी केन्द्रपिनिगु गठबन्धनं उपराष्ट्रपति जनता समाजवादी पार्टी जसपायात बिइगु सहमति जूगु खः। उगु कथं जसपां बारापाखे प्रतिनिधि सभाय् निर्वाचित रामसहायप्रसाद यादवयात उपराष्ट्रपति उम्मेदवार यायेगु निर्णय याःगु खः। तर गठबन्धनय् हे दुगु नाउपां उपराष्ट्रपति उम्मेदवारय् श्रेष्ठयात थनिइ निर्णय याःगु खः।

जसपां यादवयात थनिइगु निर्णय यागु खःसा निर्वाचन आयोगं उपराष्ट्रपतिइ मिजंम्हेसिगु मनोनयन दर्ता मयायेत निर्वाचन अधिकृतयात निर्देशन बिइ धुकुगु दु। आयोगया शुक्रबाः च्वंगु बैठकं मिजंम्ह रामचन्द्र पौडेल राष्ट्रपति निर्वाचित जुइ धुकुगुलि व स्वया मेम्ह –मिसा वा अन्य) लिङ्गपाखे उम्मेदवार दयकेगु निर्णय याःगु खः।

राष्ट्रपति पौडेल खस आर्य समुदाययाम्ह जूगुलि उपराष्ट्रपतिइ मिसा वा अन्य लिंगपाखे उम्मेदवार जुइत बिस्क समुदाय (दलित, आदिवासी जनजाति, मधेसी, थारु वा मुस्लिम) या मनोनयन जुइमाःगु आयोगं ठहर याःगु दु। ‘निर्वाचन आयोगं तक उपराष्ट्रपतिइ मिसा उम्मेदवार स्वंगुलि जिमिसं मिसाम्ह हे उपराष्ट्रपति उम्मेदवार दयकेगु निर्णय यानागु खः’,नाउपाया प्रमुख सचेतक चौधरीं धाःगु दु।

निर्वाचन आयोगं उपराष्ट्रपति पदय् मिजंम्ह उम्मेदवारी दर्ता मयायेगु संकेत क्यःगु दु।

आयोगया शुक्रबाः च्वंगु बैठकं राष्ट्रपतिया पदय् खासआर्य समुदायया मिजंम्ह (रामचन्द्र पौडेल) निर्वाचित जूगुलि उपराष्ट्रपतिइ फरक लिङ्ग वा फरक समुदायया जक उम्मेदवार जुइगु निर्णय याःगु खः।

बैठक लिपा आयोगया प्रवक्ता शालिग्राम शर्मा पौड्यालं जारी याःगुे विज्ञप्तिइ च्वयातःगु दु, ‘उपराष्ट्रपति पदय् निर्वाचनया लागि उम्मेदवारया मनोनयनपत्र दर्ताया सन्दर्भय् उम्मेदवारया योग्यताबारे थप स्पष्टतासहित नवनिर्वाचित सम्माननीय राष्ट्रपतिया लिङ्ग वा समुदाय स्वया बिस्कं जुइगु कथं उपराष्ट्रपति निर्वाचनया लागि उम्मेदवारपिनिगु मनोनयनपत्र दर्ता यायेत निर्वाचन अधिकृतयात निर्देशन बिइगु निर्णय याःगु दु।’

संविधानया धारा ७० य् ‘राष्ट्रपति व उपराष्ट्रपतिइ निर्वाचन बिस्कं बिस्कं लिङ्ग वा समुदायया प्रतिनिधित्व याये माः’ धइगु व्यवस्था दु । उपराष्ट्रपति पदया उम्मेदवारी दर्ता शनिबाः जुइत्यःगु दु। निर्वाचन चैत ३ गते जुइ।

लुँया भाः थौं तोलां च्यासः थहावन। नेपाल सुनचाँदी व्यवसायी महासङ्घं थौं लुँ तोलां च्यासः थहावनां १ लाख १ हजार ८ सय रुपैयाँ तोके याःगु दु।

अथे हे वहःया धाःसा स्थिर जूया म्हिगः थे तोलां १ हजार २ सय २० रुपैयाँ न कारोबार जुगु दु धका महासङ्घं धाःगु दु।

सभामुख देवराज घिमिरें न्हुम्ह राष्ट्रपति रामचन्द्र पौडेलयात नापलाःगु दु। पौडेलया निजी निवास बोहोराटारय् नापलाःगु खः।

नापलायेगु झ्वलय् सभामुख घिमिरें न्हुम्ह राष्ट्रपति पौडेलयात भिंतुना बियादीसे कार्यकाल सफलताय कामना न यानादीगु दु धका सभामुखया सचिवालयं धाःगु दु।

सभामुख घिमिरें अन्तरव्यवस्थापिका संघ (आईपीयू) या १४६ क्वःगु सम्मेलनय् ब्बति कायेगु निति थः बहराइन वनेत्यनागु जानकारी न पौडेल बियादीगु खः।

नवनिर्वाचित राष्ट्रपति रामचन्द्र पौडेलयात निर्वाचन आयोगं निर्वाचित जूगु दसिपौ लःल्हाःगु दु। न्हुगु बानेश्वरया सङ्घीय संसद् भवनय् पौडेलयात थौं बिहीवाः निर्वाचन आयोगया प्रमुख आयुक्त दिनेशकुमार थपलियां निर्वाचित जूगु दसिपौ लःल्हाःगु खः।

ज्याझ्वलय् निर्वाचन अधिकृत महेश शर्मा पौडेलं चुनावया लिच्वः घोषणायासे नेता रामचन्द्र पौडेल निर्वाचित जूगु जानकारी बिःगु खः। उगु ज्याझ्वलय् प्रधानमन्त्री पुष्पकमल दाहाल प्रचण्ड, नेपाली कांग्रेसया सभापति शेरबहादुर देउवा, नेकपा (एकीकृत समाजवादी) या अध्यक्ष माधवकुमार नेपाल, लोकतान्त्रिक समाजवादी पार्टीया अध्यक्ष महन्थ ठाकुर, नागरिक उन्मुक्ति पार्टीकी अध्यक्ष रञ्जिता श्रेष्ठ, जनमत पार्टीया अध्यक्ष डा.चन्द्रकान्त (सीके) राउत, निर्वाचन आयोगया आयुक्तपि नाप थीथी राजनीतिक दलया नेता व कार्यकर्तापिनिगु ब्बति दुगु खः।

थौं जुगु राष्ट्रपतिया निर्वाचनय् गुगू दलपाखे राष्ट्रपतिया उम्मेदवार जूम्ह नेपाली कांग्रेसया वरिष्ठ नेता पौडेलं ३३ हजार ८ सय २ व प्रतिस्पर्धी सुवासचन्द्र नेम्वाङं १५ हजार ५ सय १८ मतभार काःगु खः।