नेपालभाषाया लोकंह्वाःग वाःपौ देसय्मरुझ्याःया प्रकाशकलिसें सम्पादक प्रदिपमान श्रेष्ठ म्हिगः सनिलय् थःगु हे छेँय् दयाः छ्यनय् घाःपाः जुयाः मन्त ।
पारिवारिक श्रोतं ब्यूगु जानकारीकथं सनिलया ६ बजेपाखे वयकः दयाः घाःपाः जुइवं एम्बुलेन्स सःताः अस्पताल यंकूगु जूसां अस्पताल थ्यंबलय् वय्कः मदये धुंकूगु धाःगु खः ।
२०१३ साल फागुन १० गते येँय् बूम्ह श्रेष्ठ २०४७ सालय् राजमति पत्रिकाया प्रधानसम्पादक जुयाः पत्रकारिता ख्यलय् न्ह्यज्यानादीम्ह खः । वय्कः २०५२ सालंनिसें ५३ सालतक राससया संचालक समिति दुजः जुयाः तकं ज्या यानादीगु खः ।
वय्कःया च्वसु मुना ‘सिंहवाद’ २०७१ सालय् पिदंगु दु ।
वय्कःयात ज्यापु संस्कृति विकास कोषपाखें हनापौ, त्रिवि नेपालभाषा विभाग पद्मकन्या क्याम्पसपाखें हनापौ, नेवाः गुथिपाखें निष्ठावान पत्रकार सम्मान–पत्र अभिनन्दन–२०५६” एभरेष्ट युवा क्लबपाखें २०५७ य् सार्वजनिक अभिनन्दन व हनापौ, २०६० सालय् वीर गणेशमान सिंह पत्रकारिता पुरस्कार, प्रवल गोरखा दक्षिणबाहुपाखें सम्मानित जुयादीगु दु ।
वय्कःया काय् छम्ह म्ह्याय् निम्ह व जहान दु ।