नेपालभाषाया साहित्यख्यलय् ज्वःमदुगु योगदानदुपिं साहित्यकारया जीवन व सिर्जना पक्षयात न्ह्यब्वयेगु तातुना नेपालभाषा एकेडेमिं न्ह्याकुगु स्रष्टा व सिर्जनाया निुगुगु संस्करण कथं नांजाम्ह आख्यानकार मथुरा सायमिलिसे छगू तःजिगु ज्याझ्वः जूगु खः ।

जनकवि दुर्गालाल श्रेष्ठ मूपाहाँ कथं झायादीगु उगु ज्याझ्वलय् नेपालभाषा एकेडेमीया चान्सलर यज्ञरत्न धाख्वाःया सभाध्यक्षताय् जूगु खः। ज्याझ्वलय् एकेडेमीया सदस्य सचिव डा पुष्पराज राजकर्णिकारं लसकुस नुगःखँ तयादीगु खःसा भाइस चान्सलर मल्ल के सुन्दरं ज्याझ्वःया मू आज्जुया बारे खँ न्ह्यथनादीगु खः ।

आख्यानकार सायमि नं बाखं न्यंकुगु उगु ज्याझ्वलय् शाक्य सुरेन, शरद कसाः व प्रतिसरा सायमि पिन्सं मथुरा सायमिया बाखं ब्वना न्यंकुगु खः । ज्याझ्वलय् समालोचक प्रा प्रेमशान्ति तुलाधरं आख्यानकार सायमिया जीवनी न्ह्यब्वया दिगुलि साहित्यकार रीना बाँनिया तुलाधरं च्वमि सायमिया उपन्यास कृतियात कया चर्चा यानादीगु खः ।

अथेतुं उपन्यासकार राज सायमिं मथुरा सायमिया जीवनया थीथी पक्ष न्ह्यब्वया दीगु खः । नेपालभाषा एकेडेमीया साहित्य कवःया ग्वसालय् जूगु उगु ज्याझ्वलय् कवः कजि त्रिरत्न शाक्यं सुभाय् देछानादीगु खः।

थौं संसदय् बजेटय् छलफल सुरु जुइत्यःगु दु। संसद भवन न्हुगु बानेश्वरय् थौं ११ बजेया लागि बैठक सःतूगु दु।

बैठकय् अर्थमन्त्री प्रकाश शरण महतं आर्थिक वर्ष २०८०÷०८१ राजस्व व व्ययया वार्षिक अनुमानय् सामान्य छलफल यायेगु निति प्रस्ताव प्रस्तुत याइ। अर्थमन्त्री महतं जेठ १५ गते संसदय् बजेट पेश याःगु खः।

अथेहे उगु बैठकय् शोक प्रस्ताव प्रस्तुत याइगु सम्भावित कार्यसूची न तयातःगु दु। पूर्वमन्त्री मीना पाण्डे मदुगुलि शोक प्रस्ताव पारित यायेगु कार्यसूची तयातःगु दु धका संसद सचिवालयं धाःगु दु।

उपेश महर्जन गोरखापत्र संस्थानय् सल्लाहकार सम्पादकय् नियुक्त जुयादीगुलि नेवाः पत्रकार राष्ट्रिय दबुलिं भिंतुना देछागु दु ।

वय्कःया कार्यकक्ष वनाः पत्रकार दबूया पदाधकारीपिंसं खादा न्ययेकाः भिंतुना देछाःगु खः । दबूया पत्रकारतलिसे खँ ल्हासें नवनियुक्त सल्लाहकार सम्पादक महर्जनं आदिवासी जनजातिया कायमचा गोरखापत्रय् थुगु पदतक थ्यंकेफुगु धयागु थम्हं तःधंगु उपलब्धी तायेकागु धयादिसें थःम्ह संस्थानय् खनेदइकथं परिवर्तन वइगु ज्या यायेगु खँ धयादिल ।

अथेहे वय्कलं गोरखापत्रपाखें पिथना वयाच्वंगु थीथी मातृभाषाया पृष्ठयात अझ परिष्टकृत यायेगु निंतिं छु गज्याःगु ज्या यायेमाली उकिया सुझाव बीत दबूया पदाधिकारीपंत इनाप यानादिल ।

नवनियुक्त सम्पादक सल्लाहकार महर्जनयात भिंतुना देछासें दबूया केन्द्रीय अध्यक्ष नृपेन्द्रलाल श्रेष्ठं मातृभाषा पत्रकारिता सुरु जूगु सछिदँ क्यनेत्यंगु लसताय् दबूपाखें शताब्दी दँ हनेत्यंगु खँ न्ह्यथँसें थुकी गोरखापत्र संस्थानपाखें ग्वाहालि जुइगु आशा प्वंकादिगु खः।

भिंतुना देछायेगु निति दबू बरिष्ठ उपाध्यक्ष सुनिल महर्जन, उपाध्यक्ष सुरेन्द्रभक्त श्रेष्ठ, सह सचिवपि प्रजित शाक्य व सुनिता महर्जन व दुजः रबि महर्जनपिन्त महर्जनया सफल कार्यकालया भिंतुना देछानादीगु खः।

अथेतु, येँ जिल्लाया अध्यक्ष अरर्बिन्द्रमान सिं, सचिव मनोजरत्न शाही व सह सचिव सुष्मा महर्जनया न उपस्थिति दुगु खः।

प्रशिक्षार्थी पत्रकारपिन्त स्वरोजगार दयकेगु आज्जु कथं ख्वपय् न्यू मिडिया तालिम क्वचाःगु दु।

स्वनिगःया स्वंगू हे जिल्लापाखे सहभागी दुगु उगु प्रशिक्षार्थी पत्रकारपिन्त लक्ष्यित याना मध्यपुर थिमि नगरपालिका व मध्यपुर सञ्चार समाजया मंका कथं तालिम क्वचाःगु दु । तालिम ज्याझ्वः कथं रोजगारीमूलक न्यू मिडिया, खोज पत्रकारिता नाप फोटो पत्रकारिता अध्यापन यानागु धका ग्वसाः खलः संस्थाया अध्यक्ष बाबुकाजी श्रेष्ठं धाःगु दु। ’स्वदेशय् रोजगारीयात म्हसिका ल्याय्म्हपि विदेश पलायन जुया वनाच्वंगू दु। उकिए विदेशय् वःनिपि ल्याय्म्हपि न्यूनीकरण यायेत नेपालय् हे न्यू मिडियापाखे स्वरोजगार दयकेफू धका सन्देश बिइत थुगु तालिम यानागु खः।’ धका श्रेष्ठं धाःगु खः।

न्यू मिडिया अन्तर्गत युट्यूब, फेसबुक, टिकटक लगायतया सामाजिक सञ्जालयात बालाक्क सदुपयोग यायेफत धाःसा ध्यवा कमे यायेफइ। लिपागु इलय् पोडकास्ट, ब्लगस्पट वर भ्लग दयका ध्यवा कमेयाःपि न दु। उगु विषयया प्राविधिक व सैद्धान्तिक ज्ञानयात तालिमय् सहजिकरण याःगु खः। ज्याझ्वलय् मध्यपुर थिमि नगरपालिकाया मेयर सुरेन्द्र श्रेष्ठं न्ववायेगु झ्वलय् वइगु आर्थिक दँय् सञ्चार सम्बन्धिया नीति हे दयका न्ह्यावनेगु जुइ धका धयादीगु खः।

स्थानिय सरकारया सूचं नगरबासीपिन्त याउक थ्यकेत, विकास निर्माण सम्बन्धिया जानकारी बिइत मिडिया मदयक माः धका वयकल धयादीगु खः। स्वीम्ह प्रशिक्षार्थी पत्रकारपि सहभागी दुगु उगु तालिम ज्याझ्वलय् सञ्चारकःमि केके मानन्धर, सागर गुरागाइँ, सुमन श्रेष्ठ व विकेन रंजितं प्रशिक्षण बियादीगु खः।

अमेरिकाया भिसा आवेदन शुल्क थकाःगु दु। थ्व हे जुन १७ तारिखनिसे लागू जुइगु कथं आवेदन शुल्क थकाःगु खः।

भ्रमण भिसा व पेटिसन आधारित मखुसे मेगु गैरआप्रवासी भिसाया आवेदन शुल्क १६० डलरं थकया १८५ डलर कायम जूगु दु धका नेपालस्थित अमेरिकी दूतावासं धाःगु दु। पेटिसनया आधारित भिसा शुल्क १९० डलरं थकाया २०५ डलर कायम याःगु दु।

दूतावासया कथं ई–भिसा आवेदन शुल्कय् २०५ डलरं थकाया ३१५ डलर कायम याःगु दु।

भिसा शुल्कय् सेवाया लागतसम्बन्धी वार्षिक अध्ययनया लिच्वलय् आधारय् निर्धारण याःगु दु धका दूतावासं जानकारी बिःगु दु।