प्रधानन्यायाधीश चोलेन्द्रशम्शेर जबराविरुद्ध दर्ता जूगु महाअभियोग प्रस्ताव निष्क्रिय जूगु दु।

संसदया महासचिव डा. भरतराज गौतमं जबरायात महाअभियोग प्रस्ताव निष्क्रिय जूगु पौं बिःगु खः।

जबरां संसद सचिवालयय् निवेदन बिःगु खः। उकिया लिसः बिइगु झ्वलय् महासचिव गौतमं अथे लिसः बिःगु खः। थ्व नाप जबरायात निलम्बन हटे जूगु खः।

आः सर्वोच्च अदालत लिहावयेगु तयारीइ दु। थ्व नाप आः जबरां संसदया महासचिवपाखे महाअभियोग निश्क्रिय जूगु पौं वयेवं थौं सर्वोच्चय् वनिइगु जुगु दु।

मेलम्चीया मुहान अम्बाथानस्थित सुरुङ मार्गं वःगु लः छवाः लिपा येँ थ्यःगु दु।

मेगु वाः न्हि १७ करोड ५० लाख लिटर लः सुरुङं वइ धका आयोजनाया प्रवक्ता राजेन्द्र पन्तं धाःगु दु। मंसिर ११ गते आइतबाः बहनि लः त्वःता सुरुङ सफा याःगु खः।

सुरुङ सफा याये धुका जम्मा जूगु लः मेगु वाःनिसे हितिइ त्वःतिइगु जुगु दु। लः वितरणया लागि काठमाडौं उपत्यका खानेपानी लिमिटेड आयोजना कार्यान्वयन निर्देशनालयं वितरण सञ्जाल निर्माण याइगु खः।

थुगु सञ्जालपाखे मेगु वाःनिसे येँ मेलम्चीया लः वइगु जुगु दु।

सेयर बजाःया परिसूचक छगु अंकं सामान्य गिरावट जूगु दु। थौं मंगलबाः बजाः परिसूचक नेप्से ४.८७ अंक (०.२५ प्रतिशत) न गिरावट जूया १९३३.८८ अंकय् बन्द जूगु दु।

जीवन बीमा, लघुवित्त व मेमेगु बाहेक बजारय् लिड याइगु बैंकिङ नाप यक्को उपसूचक गिरावट वया बजाः परिसूचक नेप्से न घटे जूगु दु। मेमेगु उपसूचक यक्को०.५७ प्रतिशतं थहावगुलि लघुवित्त उपसूचक ०.२८ प्रतिशत व जीवन बीमा उपसूचक ०.०१ प्रतिशतं थहावःगु दु।

लगानी उपसूचक दकलय् अप्पो ०.९१ प्रतिशतं कुहावगुलि बैंकिङ उपसूचक ०.३९ प्रतिशतं कुहावःगु दु। नेप्से नाप मंगलबाः कारोबार रकम न कुहावया २५ लाख ८१ हजार ४२५ कित्ता सेयर किनबेच जुगुलि ९६ करोड ५२ लाख ११ हजारया कारोबार जूगु दु। उकि मध्ये शिवम् सिमेन्टया दकलय् अप्पो ८ करोड १२ लाख ३४ हजार, हिमालयन डिस्टिलरीया ५ करोड ५० लाख ८ हजार व रिडी पावरया ५ करोड २ लाख ७ हजारया कारोबार जूगु खः।

मंगलबाः नेप्सेय् कुल १९९ कम्पनीया सेयर कारोबार जूगुलि १०९ कम्पनीया सेयर भाः कुहावःगु दु। उकिइ ७८ कम्पनीया सेयर भाः थहावना १२ कम्पनीया सेयर भाः स्थिर जूगु दु।

धौलागिरी लघुवित्तया सेयर भाः दकलय् अप्पो दकलय् अप्पो ८.१७ प्रतिशत थहावगु वगुलि सिटिजन्स म्युचुअल फण्ड १ या इकाइभाः ६.१२ प्रतिशत व सपोर्ट माइक्रोफाइनान्सया सेयर भाः ५.८६ प्रतिशतं थहावःगु दु।

अथेहे एनएमबि बैंकया सेयर भाः दकलय् अप्पो ६.०७ प्रतिशतं कुहावगु व एनएमबि ५० या इकाइभाः ३.८५ प्रतिशत व आईसीएफसी फाइनान्स डिबेञ्चर २०८३ या भाः ३.३२ प्रतिशतं कुहावःगु दु।

वंगु मंसिर ४ गते जूगु निर्वाचनया मतगणना थौं क्वचाइगु सम्भावना दु। निर्वाचन आयोगं थौं मतगणना क्वचाइ धका धाःगु दु। प्रत्यक्षपाखे मतगणना क्वचाये धुकुगु दु।

समानुपातिक निर्वाचन प्रणालीया मतगणना लिपागु इलय् थ्यःगु दु। प्रतिनिधिसभाया समानुपातिकपाखे नेकपा (एमाले) न दकलय् अप्पो मत हःगु दु। वयालिपा नेपाली कांग्रेस, नेकपा (माओवादी केन्द्र), राष्ट्रिय स्वतन्त्र पार्टी, राष्ट्रिय प्रजातन्त्र पार्टी (राप्रपा), जनता समाजवादी पार्टी (जसपा), जनमत पार्टी लाःगु दु।

मेगु पार्टी आः राष्ट्रिय दल मजुइगु दु। माधवकुमार नेपाल नेतृत्वया नेकपा (एकीकृत समाजवादी), रेशम चौधरीया जहान रन्जिता श्रेष्ठ नेतृत्वया नागरिक उन्मुक्ति पार्टी, लोकतान्त्रिक समाजवादी पार्टी (लोसपा)लगायतपि न राष्ट्रिय दल मजुइगु दु।

अथेहे, नेपाल मजदुर किसान पार्टी (नेमकिपा), हाम्रो नेपाली पार्टी, राष्ट्रिय जनमोर्चा, कमल थापा नेतृत्वया राप्रपा नेपाल न राष्ट्रिय दल मजुगु दु।

फिफा विश्वकप फुटबलय् थौं निगु कासा जुइगु दु। थौं मोरक्को व स्पेन नाप पोर्चुगल व स्विट्जरल्यान्ड दथुइ जुगु दु।

न्हापागु कासा मोरक्को व स्पेन नेपाःया ई कथं ८ः४५ बजे जुइगु दु।अथेहे मेगु कासा पोर्चुगल व स्विट्जरल्यान्ड दथुइ १२ः४५ बजे सुरु जुइगु दु ।