यल महानगरपालिकाय् छेँ छेँय् नम्बर प्लेट तःगु बापत द्धःछि शुल्क काइगु जूगु दु।

यल महानगरं थःगु लागा दुनेया छेँ याउगु लागत सङ्कलन व पहिचान यायेगु धासें नम्बर प्लेट तिकाच्वंगु दु।

यल महानगरं छगु सूचं पिकयाः नम्बर प्लेट तःगु बापत द्वःछि तका शुल्क कायेगु धका धाउगु दुु। छेँ नम्बर प्लेटया ध्यबाः मपुसाः सम्पत्ति कर नं कायेगु सङ्केत महानगरं याःगु दु।

आः महानगरय् छेँ थुवाःपिन्स सम्पत्ति कर पुलिगु इलय् द्वःछि तका नम्बर प्लेट बापत न पुलेमाः धका छगु सुचं जारी याउगु खः।

छु दिं लगातार कथं सामान्य थहावना च्वंगु शेयर बजाः थौं धासा घटे जुगु दु।

शेयर बजाः परिसूचक नेप्से थौं बिहीवाः ५ दशमलव ८७ अङ्कं घटे जुया २ हजार ४४ दशमलव ७२ विन्दुइ कुहावंगु दु।

थौं बैंकिङ व मेमेगु समूहया शेयर सामान्य थहावंगु दु सा मेगु दक्को समूहया शेयर घटे जुगु दु। २२५ गु कम्पनीया ३९ लाख ८ हजार कित्ता शेयर १ अर्ब ६४ करोड २६ लाख रुपैयाँया कारोबार जुगु दु।

दकलय् अप्पो शिवम् सिमेन्टया १७ करोड रुपैयाँ शेयर किनबेच जुगु खः। थौं किसान लघुवित्तया शेयर झन्डै साढे ५ प्रतिशतं घटे जुगु दु। समग्रमा बजार घटे जूसा सेन्ट्रल फाइनान्सया शेयर धाःसा ३ प्रतिशतं थहावंगु दु।

ओमिक्रोन भेरियन्टया उपप्रजाति बीएफ.वान नेपालय् न खनेदुगु दु।

धुलिखेल अस्पतालया मोलिक्युलर एन्ड जिनोमिक सिक्वेन्सिङ रिसर्च ल्याबय् परीक्षण याउगुलि ओमिक्रोनया न्हुगु उपप्रजाति ‘बीएफ.वान’ पुष्टि जुगु दु।

कोरोना संक्रमण पुष्टि जुगु २२ गु नुमनायात आनुवंशिक परीक्षण (जिन सिक्वेन्सिङ) पाखे स्वगुलि थीथी उपप्रजाति खनेदुगु खः। थुगु प्रजातियात विश्व स्वास्थ्य संगठनं ‘भेरियन्ट अफ कन्सर्न’ घोषणा याउगु खः।

थ्व गुलि ग्यानापुसे च्वः धका धासा अध्ययन जुयाच्वंगु दु। विश्व स्वास्थ्य संगठनं वंगु असारय् ‘बीएफ.वान’ युरोपय् खनेदुगु पुष्टि याये धुकुगु खः। लिपागु निवाः दुने येँया अस्पतालय् भर्ना जूपिन्त कोरोना संक्रमितया निगुगु डोज खोप कायेधुपिन्त न खनेदुगु खः।

स्वास्थ्य तथा जनसंख्या मन्त्रालयया तथ्यांक कथं नेपालय् आः संक्रमणदर १० प्रतिशत स्वया अप्पो जुइ धुकुगु दु। विज्ञया कथं थ्व कोरोनाया प्यंगु लहर खः।

अर्थमन्त्री जनार्दन शर्मायात छानबिन यायेत गठन जुगु संसदीय विशेष समितिया म्याद न्ह्यन्हु थपे याउगु दु।

आर्थिक वर्ष २०७९–८० या बजेट निर्माणया झ्वलय् अनधिकृत मनूयात दुकया करया दर हेरफेर याउगु विषय सार्वजनिक याउगुलि प्रतिनिधिसभां छानबिनया लागि विशेष समिति गठन याउगु खः।

सुरुइ झीन्हुया ई बिया न्ह्याउगु समितिं ज्या क्वमचाउगुलि मेगु न्ह्यन्हु थप याउगु खः। सभामुख अग्निप्रसाद सापकोटां उगु समितियात न्ह्यन्हु म्याद थपे यायेगु प्रस्ताव प्रतिनिधिसभाय् तःगु खः।

उगु प्रस्तावयात बैठकं अनुमोदन याउगु खः।

वंगु २४ घण्टाया दुने देयन्यक थप ४३५ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं १ हजार ६६७ म्हेसिगु पीसीआर परीक्षणय् ३१७ म्ह व १ हजार ९०२ म्हेसिगु एन्टिजेन परीक्षणय् ११८ म्ह याना ४३५ म्हेसित संक्रमण पुष्टि जुगु दु धका धाउगु दु।

अथेहे वंगु २४ घण्टाय् कोरोना भाइरस संक्रमणमुक्त जूपि ५६ म्ह थ्यःगु दु। आःतक देयन्यक कोरोना भाइरसया सक्रिय संक्रमितपि २ हजार ५३७ म्ह थ्यःगु दु।