लुँया भाः तोलां थौं हाकन निसः थहावंगु दु।

म्हिगः लुँ तोलां निसः कुहावंगु खःसा थौं  हाकन निसः हे थहावंगु दु। थौं लुँ तोलां निसः थहावना ९४ हजार रुपैयाँ न कारोबार जुगु दु।

अथेहे, वहः तोला न न्यातका थहावंगु दु। वहः तोला न्यातका थहावना ११ सय ६५ रुपैयाँ न कारोबार जुगु दु।

श्वेतगंगा हाइड्रोपावर एण्ड कन्स्ट्रक्सन लिमिटेडं धितोपत्रया प्राथमिक सार्वजनिक निष्कासन (आईपीओ) बिक्री खुल्ला याउगु दु।

कम्पनीं ४ साउन बुधबाःनिसे प्रतिकित्ता १०० रूपैयाँ अंकित भाःया आईपीओ बिक्री खुल्ला याउगु दु। कम्पनीं सर्वसाधारणया लागि २३ करोड ८९ लाख ५० हजार रूपैयाँ बराबरया २३ लाख ८९ हजार ५०० कित्ता आईपीओ निष्कासन याउगु खः।

उकिमध्ये ५ प्रतिशत अर्थात १ लाख १९ हजार ४७५ कित्ता सेयर सामूहिक लगानी कोषयात सुरक्षित याना ल्यदनिगु २२ लाख ७० हजार २५ कित्ता आईपीओ सर्वसाधारणया लागि छुटे याउगु खः।

कम्पनीं आयोजना प्रभावित क्षेत्रय् च्वपिनिगु लागि आईपीओ निष्कासन याये धुका आः सर्वसाधारणया लागि निष्कासन याउगु खः।

निर्वाचन आयोगं मेगु न्यागु जिल्लाय् न अनलाइनपाखे मतदाता नामावली फारम भरे यायेगु व्यवस्था मिले याउगु दु।

थौंनिसे चितवन, कास्की, मोरङ, काभ्रे व झापा जिल्लाय् अनलाइन मतादाता फाराम भरे यायेगु व्यवस्था मिले याउगु दु धका निर्वाचन आयोगं धाउगु दु।

थ्व स्वया न्ह्यः स्वनिगलय् वंगु असार २९ गते निसे अनलाइन फाराम भरे यायेगु व्यवस्था मिले याउगु खः। चितवन, कास्की, मोरङ, काभ्रे व झापाय् न व्यवस्था मिले यायेवं आः अनलाइनं मतदाता फारम भरे याइगु जिल्ला आः च्याःगु थ्यःगु दु।

अनलाइन फारम भरे याये धुका वःगु संकेत नम्बर, नागरिकता लगायतया परिचय पत्रनाप फोटो कायेत व ल्हाचिं तयेत सम्बन्धित जिल्ला निर्वाचन कार्यालय वनेमाः।

शल्यक्रिया सेवा बन्द जुगु दु। अत्यावश्यक ‘अक्सिजेनेटर’ सिधःगुलि अस्पतालं इलय् मिले याये मफुगुलि मंगलबाः छन्हु हे ४५ म्ह बिरामीपिन्त बेडं लितःछ्वःगु दु।

मुटुया शल्यक्रिया यायेगु इलय् मुटु व स्वँय् ज्या याइगु कृत्रिम रूपं सञ्चालन यायेमाः। उकिया लागि ‘अक्सिजेनेटर’ या ग्वाहालि माः।

थुकिइ हिइ कार्बनडाइअक्साइड हटे याना अक्सिजनया ज्या याइगु खः। गंगालालय् न्हि न्ह्यम्हनिसे च्याम्हेसिगु तक शल्यक्रिया याः।

येँ महानगरपालिकाया मेयर बालेन्द्र शाह न हिमालय टीभी व नेपाल समाचारपत्र न्हि पौं विरुद्ध प्रेस काउन्सिलय् उजुरी बिउगु दु।

येँ महानगरपालिकाया बजेट विनियोजित जुगलि अमुक संस्थायात उपलब्ध याउगु धासे तथ्यहीन, भ्रामक व कपोलकप्लित समाचारप्रति गम्भीर ध्यानाकर्षण याउगु दु।

सञ्चारमाध्यमपिन्स व्यवसायिक पत्रकारिताया बिचाः मयासे एकतर्फीरुपं प्रकाशन व प्रशारण याउगु तथ्यहीन समाचारं भ्रम सिर्जना याउगु धासे व्यक्तिगत व संस्थागत गरिमाय् आँच वःगु धका धाउगु दु।

शाह न पत्रकार आचार संहिता, २०७३ (न्हापागु संशोधन, २०७६ नाप ) या दफा ४ बमोजिम कारबाही सहित क्षतिपूर्तिया माग यासे निवेदन बिउगु दु धका सामाजिक सञ्जालपाखे जानकारी बिउगु दु।

महानगरं रुटिन अफ नेपाल बन्दया १ करोड रुपैयाँ विनियोजित याउगु धासे वयागु बिरुद्ध आलोचना याना वयाच्वंगु खः।