लुँया तोलां थौं खुसः थहावंगु दु।

लुँ तोलां थौं खुसः थहावना ९८ हजार ६ सय रुपैयाँ थ्यःगु दु धका नेपाल सुन चाँदी व्यवसायी महासङ्घं धाउगु दु।

अथेहे वहः तोलां न न्यातका थहावंगु दु। महासङ्घया कथं थौं न्यातका तोलाया १२ सय ८५ रुपैयाँ थ्यःगु दु धका धाउगु दु।

स्थानीय तह निर्वाचनय् थीथी पदय् जूगु दु। उकि मध्ये छम्ह जक उम्मेदवारी वःगुलि निर्वाचन आयोगं निर्विरोध जुगु घोषणा याउगु खः।

आयोगं जारि याउगु बुलेटिन कथं गाउँपालिकाय् स्वम्ह अध्यक्ष नाप थीथी पदय् निर्विरोध निर्वाचित जुगु दु धका धाउगु दु।

स्वतन्त्र उम्मेदवार कथं येँ महानगरपालिकाय् मेयर पदया उम्मेदवारी बियादीम्ह सुमन सायमिं थःगु उम्मेदवारी येँया जनतापिन्त न्याय बिइगु नितिं भाषा संस्कृति सम्पदाया संरक्षण यायेगु व सतक विस्तारपाखें पीडित जूपिन्त न्याय बिइगु नितिं खः धका धयादीगु दु ।

वयकलं येँय् पिनेच्वपिन्स शासन यानाः नेवाः तय्गु अस्तित्व न्हंकाः छ्वयेगु ज्या याःगलिं येँ महानगरय् नेवाः नुगः थूपिं व भूमिपुत्रपिं हे थासय् वनाः ज्या यायेमाःगुलिं चुनावय् कुहावया धका धयादीगु खः। वय्कलं पार्टीया उम्मेदवारपिन्सं त्याःसां येँया जनताया ज्या इमान्दारपूर्वक मयाःगु जक मखुसे येँया जनतायात दुःख बिइगु बाहेक मेता छुं हे मयाःगुलिं तःधंगु पार्टीया भलसाय् मकयासे स्वतन्त्र उम्मेदवार बियागु खः धका धयादीगु खः।

येँ देय् दुने थीथी वडाय् स्वतन्त्र उम्मेदवारपिं छथाय् च्वनाः येँ देय्या नितिं छुं यायेगु ह्वताः चूलाःगु खँ नं कनादीगु दु । नाप वय्कलं स्वतन्त्र उम्मेदवार जूपिनिगु कन्हय् राजनीतिक दलया रुपय् न्ह्यःने वयेफूगु धका धयादीगु दु। उपत्यका सतक विस्तार पीडित संघर्ष समितिया अध्यक्ष जुयादीम्ह सायमि मेयरय् व उपमेयरय् बिद्या श्रेष्ठ उम्मेदवारी बियादीगु खः।

येँ महानगरपालिका २३ वडाया उम्मेदवार मचाराजा महर्जनं वडावासी पिनिगु जनजीविकानाप स्वागु थीथी समस्यायात व्यवस्थापन यायेगु, पूर्वाधार विकास व सुधारलिसें शिक्षा, स्वास्थ्य, सम्पदा, संस्कृतिया संरक्षण व संवद्र्धन यायेगु उद्देश्य थःम्ह हाकन उम्मेदवार बियागु धका धयादीगु दु।

नापं सामाजिक सुरक्षा, विपद् व्यवस्थापननापं आवश्यकताकथं प्राथमिकता बियाः ज्या यायेगु हे थुगुसीया चुनावया मू एजेन्डा दु धका धयादीगु दु। वयकलं धयादीगु दु, २३ वडाया मुख्य समस्या धइगु ट्राफिक व्यवस्थापन, अव्यवस्थित पार्किङ, विपदया इलय् दमकल दुहां वने मफइगु लँ खःसा अज्याःगु थासय् च्वंगु व छेँ क्वं वनाच्वंगु धःया निकासयात सहज व्यवस्थापन यायेमाःगु दु धका धयादीगु दु।

अथेहे अस्तव्यस्त जुयाच्वंगु तारयात व्यवस्थित यायेमाःगु मुख्य चुनौति दु धका धयादीगु दु। हाकनं वडाअध्यक्षय् निर्वाचित जुल धासा न्हापां प्रतिवद्धताकथंया ज्या न्ह्याके । उकिया निंतिं योजना तर्जुमा यानाः तत्काल, मध्यकाल व दीर्घकालीन छुटे याये । उकियात छगू क्यालेण्डर हे दयेकाः योजनायात कार्यान्वयनय् यंकेगु जुइ धका धयादीगु दु ।

वयकलं स्थानीय भाषा, कला, संस्कृतिया उत्थानया निंतिं योजनाबारे धयादीगु दु, सामुदायिक ब्वनेकुथिइ नेपालभाषा अनिवार्य ब्वंकेत माःगु कानून निर्माण, सम्पदामैत्री भवन निर्माणयात अनुदान बीत कानून दयेका न्ह्या वनेगु जुइ धका धयादीगु दु। सम्पदा पुनःनिर्माणया निंतिं आवश्यक कार्यविधि व निर्देशिका दयेका ज्या यायेगु जुइ धका धयादीगु।