यल महानगरपालिका– १६ वडा कार्यालयं ईलाननीइ फिजियाथेरापी उपचार केन्द्र सञ्चालन याःगु दु। रचना आयुर्वेद नाप अर्थो न्यूरो रिहाबिलिटेशन व ईलाननी टोल सुधार समितिनाप मिले जुया ईलाननी रचना फिजियोथेरापी उपचार केन्द्र नामं न्ह्याकूगु खः।

टोल सुुधार समितिया भवनय् प्यंगु शैय्यानाप फिजियोथेरापीया सामग्री सञ्चालनय् हःगु खः। थुकिया लागि वडां २० लाख रुपैयाँ विनियोजित याःगु दु धका वडां धाःगु दु। केन्द्रया व्यवस्थापन व दीर्घकालीन सञ्चालन यायेत राज बज्राचार्यया अध्यक्षताय् छगु समिति गठन याःगु दु। वडाअध्यक्ष संरक्षक व वडा सदस्यपि पदेन सदस्य दुगु कथं उगु समितिइ स्वःगु हे पक्षया प्रतिनिधित्व जुगु दु।

थौं शनिबाः जुगु ज्याझ्वलय् वडाअध्यक्ष निर्मलरत्न शाक्यं उगु केन्द्रया उलेज्या यानादीगु खः। वडाध्यक्ष शाक्यं उगु ज्याझ्वलय् फिजियोथेरापी सञ्चालन यायेत स्वदँनिसे कुतः यानागु आः न्ह्याःगु दु धका धयादीगु खः। स्वास्थ्य क्षेत्रय् नमूना योग्य वडा दयकेगु बिचाः कथं थुगु केन्द्र सञ्चालन यानागु धका वडाअध्यक्ष शाक्यं धयादीगु खः।

केन्द्रया स्थापनां समुदायस्तरय् स्वास्थ्य सेवाय् याउक पहुँच स्थापित जुइ धका वयकलं धयादीगु खः।  उगु ज्याझ्वलय् रचना रिहाबिलिटेशन सेन्टरया सञ्चालक डा चन्द्रदीपकुमार महतो केन्द्रं क्वँय् ज्यःपि, नशा च्यापे जुगु, म्हुतु ब्यक्वःगु, जोर्नी स्यागु, प्यारालाईसिस, ल्हात तुतिइ झमझम जुगु, पोलेजुगु व सुस्त मनस्थिति जूपि मस्तय्त सहुलियत दरं उपचार जुइगु जानकारी बियादीगु खः।

समितिया अध्यक्ष राज बज्राचार्य न स्वास्थ्य सेवाय् याउक दयकेगु कथं वडाया ज्याय् समुदायपाखे ग्वाहालि यानगु खँ धका धयादीगु खः। उगु ज्याझ्वलय् वडा सदस्य बबिता श्रेष्ठ, वडा समितिया सल्लाहकार धर्मेन्द्र शाक्य लगायतपिन्स न खँ तयादीगु खः।

थुगु शिविर वइगु शुक्रबाः तक सञ्चालन जुइ।

पिपुल्स हाइड्रोपावर कम्पनीं थौंनिसे सर्वसाधारणया लागि प्राथमिक सेयर (आईपीओ) निष्कासन बिक्री खुल्ला याःगु दु।

कम्पनीं प्रतिकित्ता १०० रुपैयाँ अंकित कुल ५६ लाख ६ हजार ३९० कित्ता साधारण सेयर सर्वसाधारणया लागि बिक्री खुल्ला याःगु दु।

उकि मध्ये ५ प्रतिशत अर्थात् २ लाख ८० हजार १९० कित्ता सेयर सामूहिक लगानी कोषया लागि सुरक्षित याःगु दु। ३ प्रतिशत अर्थात् १ लाख ६८ हजार १९० कित्ता सेयर कर्मचारीपिन्त छुटे याःगु दु।

सर्वसाधारणपिन्स ल्यःदुगु ५१ लाख ५७ हजार ८८० कित्ता सेयरया लागि आवेदन बिइ फइ। लगानीकर्तापिन्स न्यूनतम १० कित्ता सेयर खरिदया लागि आवेदन बिइ फइसा अप्पो १ लाख कित्ता सेयरया लागि आवेदन बिइ फइ।

निष्कासन बन्द जुइगु याकन कात्तिक २९ गते तक ई तःगु दु। उगु इलय् माग कथं आवेदन मवसा मंसिर ९ गते तक आवेदन बिइगु ई थप याइ।

बाजुरा केन्द्र जूया थौं भुखाय् ब्बःगु दु। थौं सुथय् ५ बजे जुया १३ मिनेतय् भुखाय् ब्बःगु दु धकाल राष्ट्रिय भूकम्प मापन तथा अनुसन्धान केन्द्रं धाःगु दु।

केन्द्रया कथं ४.१ रेक्टर स्केलया भुखाय् ब्बःगु दु धका धाःगु दु।

मल्लकालीन ऐतिहासिक कात्तिक प्याखं क्वचाःगु दु। म्हिगः कृष्णया दधि लीला क्यनेवं थुगु दँयो कात्तिक प्याखं क्वचाःगु खः।

सोमबाः कृष्णया वस्त्रहरण लिला क्यःगु खः। कात्तिक प्याखंया मू आकर्षण नरसिहं अवतार आइतबाः क्यःगु खः । थुगु दँय् कात्तिक प्याखं झीन्हु तक क्यःगु खः।

थुगु प्याखंया लागि ९० म्ह कलाकारपिन्स क्यनेगु याइ। कात्तिक प्यानय् राजोपाध्याय, श्रेष्ठ, प्रधान, अमात्य, जोशी, मल्ल लगायत नेवाः समुदाय दुनेपिनिगु प्रतिनिधित्व दइ।नेपाल सम्वत् ७६१ य् जुजु सिद्धिनरसिंह मल्लं शुरु याःगु खः।