लुम्बिनीं निर्माण जुयाच्वंगु बज्रयान विहारयात कलात्मक दयकेत येँ महानगरपालिकां थप १ करोड ५० लाख रुपैयाँ लल्हागु दु।। महानगरया मेयर विद्यासुन्दर शाक्यं नेपाल परम्परागत बौद्ध धर्म, संघ लुम्बिनीया अध्यक्ष प्रा. डा. नरेशमान बज्राचार्ययात उगु ग्वाहालि ६० प्रतिशत न्हापागु चरणया रकमया चेक लल्हानादीगु खः।

वंगु कार्तिकय् राष्ट्रपति विद्यादेवी भण्डारीं उलेज्या यानादीगु खः। महानगरं १ करोड ५० लाख रुपैयाँ उपलब्ध याना बिउगु खः। लुम्बिनी विकास कोषया गुरुयोजनाय्, नेपालया सम्पदा विम्बित यायेगु उद्देश्यं बज्रयान विहार निर्माण याउगु खः। थुकिया लागि येँ महानगरपालिकां थ्व स्वया न्ह्यः ४ करोड २९ लाख १८ हजार रुपैयाँ लल्हाये धुकुगु खः।

उगु ज्याझ्वलय् मेयर शाक्यं, नेपालय् निर्माण जुइगु विहार नेपाःया हे लगानी जुइमाःगु धका धयादीगु खः। ‘विदेशी तयेस दयकूगु विहारया शैली नेपाःया पहः वइगु मखु। नेपाःया शैलीइ विहार थःगु हे लगानीइ जुइमाःगु धका जिमिसं थथे ग्वहालि यानागु खः।’ मेयर शाक्यं धयादीगु दु, ‘जिमिसं लुम्बिनी सांस्कृतिक नगरनाप समन्वय याना ग्वहालि यानागु खः।

येँ केन्द्रीय राजधानी सहर जुगुलि थःगु क्षेत्रपिने वना न ग्वहालि यानागु खः। अथे ग्वहालि यायेत न अनया पालिकानाप समन्वय याना ज्या याना च्वनागु दु।’

अथेहे बौद्ध धर्म संघया अध्यक्ष प्रा. डा. बज्राचार्य न महानगरं बिउगु थुग ग्वाहालि थम्हेसिया संगः कथं कयागु दु धका धयादीगु। ‘नेपाः न थपिन्स हे विहार दयेकगु दायित्व खः। तर, वंगु ३ सय ७२ दँनिसे नेपाली बौद्धकला, बास्तुकलां आःतक विहार दयकूगु मदुनि धका वयकलं धयादीगु खः।

वंगु २४ घण्टाया दुने देयन्यक थप २५ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ३ हजार ६२३ म्हेसिगु पीसीआर परीक्षण याउगुलि २४ म्ह व १ हजार ३२८ म्हेसिगु एन्टीजेन परीक्षण याउगुलि छम्हयाना २५ म्हेसित संक्रमण पुष्टि जुगु दु।

अथेहे २४ घण्टाय् ८९ म्ह कोरोनामुक्त जुगु दु।

नेपाल प्रहरीइ अतिरिक्त महानिरीक्षक (एआईजी) बढुवा यायेत सरकारं बिहीबाः याउगु निर्णयविरुद्ध सर्वोच्च अदालतय् रिट दायर याउगु दु।

बढुवाय् मलाम्ह डीआईजी ईश्वरबाबु कार्की न गैरकानुनी रुपं एआईजी बढुवा याउगु धासे सर्वोच्च अदालतय् रिट तःगु खः।

थौं बिहीबाः सुथय् च्वंगु मन्त्रिपरिषद् बैठकं डीआईजी वसन्तकुमार पन्त, धिरजप्रताप सिंह व रवीन्द्रबहादुर धानुकयात एआईजीइ बढुवा यायेगु निर्णय याउगु खः।

तर वरिष्ठताक्रम व कार्यक्षमताया आधारय् मयाउगु धासे काकी न सर्वोच्चमा रिट तःगु खः। उगु रिटय् चैत २० गते आइतबाः सुनुवाइ जुइ धका धाउगु दु।

लुँया भाः थौं सच्छि थहावंगु दु।

म्हिगः तोलाया ९८ हजार ८ सय रुपैयाँ न कारोबार जुगु लुँ थौं सच्छि थहावंगु दु धका नेपाल सुनचाँदी व्यवसायी महासंघ धाउगु दु।

थौं लुँ तोला सच्छि थहावना ९८ हजार ९ सय रुपैयाँ तोके याउगु दु धका महासंघ धाउगु दु। अथेहे वहः तोलां झीतका कुहावंगु दु।

तोलाया झीतका कुहावया थौं १३ सय ५० रुपैयाँ तोके याउगु दु धका महासंघ धाउगु दु।

सरकारं नेपाल प्रहरीइ स्वम्ह प्रहरी नायब महानिरीक्षक (डीआईजी) पिन्त प्रहरी अतिरिक्त महानिरीक्षक (एआईजी) य् बढुवा यायेगु निर्णय याउगु दु।

बिहीबाः च्वंगु मन्त्रिपरिषद् बैठकं डीआईजी वसन्तकुमार पन्त, धिरजप्रताप सिंह व रवीन्द्रबहादुर धानुकयात एआईजीइ बढुवा यायेगु निर्णय याउगु खः। गृह मन्त्रालयया बढुवा सिफारिस समितिं १ चैतय् स्वम्हेसित एआईजीइ बढुवा सिफारिस यायेगु निर्णय याउगु खः।

सिफारिसय् वरिष्ठता व कार्यक्षमतायात मस्वस्ये सिफारिस याउगु धका सिनियर डीआईजीपिन्स लोक सेवा आयोगय् उजुरी बिउगु खः। प्रहरी नियमावलीइ एआईजीपि मध्येपाखे सरकारं चाहे जुम्ह मनूया आईजीपीइ नियुक्त याये फइगु प्रावधान दु। थ्व स्वया न्ह्यः उमिगु ब्याचया विश्वराज पोखरेल व सहकुलबहादुर थापापि एआईजी जुइ धुकुगु खः।

आःयाम्ह आईजीपी थापा १९ वैशाख २०७९ य् अवकाश काइगु खः।