येँ महानगरया प्रमुख बालेन्द्र शाह (बालेन) न नवनिर्वाचित कार्यपालिका सदस्यपिन्त पद व गोपनीयताया शपथ काउगु दु।

थौं राष्ट्रिय सभागृहय् वयकलं शपथ याकूगु खः। उगु ज्याझ्वलय् उपप्रमुख सुनिता डंगोल, प्रमुख प्रशासकीय अधिकृत लोकनाथ पौड््याल नाप राजनीतिक दलया प्रतिनिधिपिनिगु सहभागी दुगु खः।

शपथ काये न्ह्यः मुख्य निर्वाचन अधिकृत राजुकुमार खतिवडां निर्वाचित कार्यपालिका सदस्यपिन्त प्रमाण पत्र लल्हाउगु खः। कार्यपालिका च्याम्ह सदस्यपि निर्वाचित जुगु खः।

नगरकार्यपालिकाय् मिसा सदस्य पदय् नेपाली कांग्रेसया उम्मेदवारपि मीना सुनार, मीना सिंह, कञ्चना नेपाली हरिजन व ललिता खड्गी नाप नेकपा समाजबादीया मैयाँलक्ष्मी महर्जन निर्वाचित जुगु खः।

अथेहे दलित व अल्पसंख्यकपाखे नेपाली कांग्रेका उम्मेदवार बिनोद अछामी व महेश नेपाली नाप नेकपा माओवादीया अनिता कार्की ढोली निर्वाचित जुगु खः।

येँया टुकुचा खुँसि बहां वया छगः मोटरसाइकल चुइकूगु दु।

येँ महानगरपालिका वडा–२ लाजिम्पाटय् निलसरस्वती नाप टुकुचा खुँसि बहां वया मोटरसाइकल नाप छम्ह मनूयात चुइकूगु दु धका महानगरीय प्रहरी परिसरं धाउगु दु।

येँया महानगरपालिका धापासी छेँ दुम्ह २१ दँ दुम्ह सुरज अर्यालया बागमती प्रदेश–०२–०१३ प २५८८ नम्बरयो मोटरसाइकल खुँसिइ चुइकूगु खः।

चालक अर्यालयात तत्काल सकुशल उद्धार याउगु दु सा मोटरसाइकल धासा चुइका यकूगु दु धका प्रहरीं धाउगु दु।

ख्वपय् च्वंगु सल्लाघारी २५ दँ पुलांगु डा.इवामुरा मेमोरियल अस्पतालया व्यवस्थापनय् न्हूगु पुचलं वइगु असार १ गतेनिसे न्ह्याकिइगु जुगु दु।

इवामुरा अस्पतालया व्यवस्थापकीय न्हुगु नेतृत्वय् वरिष्ठ रेडियोलोजिष्ट डा.मनोजमान श्रेष्ठया पुचलं याये त्यःगु दु। १०० शैय्याया इवामुरा अस्पतालया व्यवस्थापन १५ दँ तक न्हूगु पुचलं यायेगु सहमति जुगु दु।

कलेज व्यवस्थापनय् धाःसा पुलांगु पुचलं याइगु जुगु दु। न्हूगु व्यवस्थापकीय नेतृत्व वरिष्ठ रेडियोलोजिष्ट डा. श्रेष्ठ छत्रपाटी निःशुल्क चिकित्सालयया नं अध्यक्ष खः।

२५ दँ न्ह्यः जापानी समाजसेवी डा. नोबुरु इवामुराया लुमन्तीइ अस्पताल स्थापना याउगु खः। डा. इवामुरां जापानिज स्वयंसेवक कथं नेपाः वया टिबी रोग नियन्त्रणय् तधःगु योगदान दुगु खः।

वयकःया हे लुमन्तीइ सन् १९९८ य् स्थापना जुगु खःसा इवामुरा हस्पिटल सन् २००१ य् सञ्चालनय् वःगु खःसा सन् २००५ य् निसे स्थानीयपिनिगु न सहभागी दुगु खः।

येँया फोहोर ज्वना बञ्चरेडाँडा ल्याण्डफिल साइट वंगु सवारी साधन स्थानीयपिन्स अवरोध यायेवं फोहोर वांमछ्वसे येँ हे लिहावंगु दु।

येँ महानगरपालिकाया ल्यान्डफिल साइट इन्चार्जया कथं प्रहरीं तसकं सुरक्षा दथुइ फोहोर ज्वना वंगु गाडी स्थानीय च्वपिन्स अवरोध यायेवं लिहावंगु खः।

छु गाडीं ल्याण्डफिल साइटय् फोहोर वांछ्वःगु दु सा स्थानीय च्वपिन्स अप्पां क्ययकूगुलि अप्पो गाडी फोहोर ज्वना लिहावंगु दु। स्थानीयपिन्स क्यकुगु अप्पां प्रहरीपि घाःपाः न जुगु दु। प्रहरीं सुरक्षा बिइ मफया फोहोर ज्वना वंगु गाडी येँ हे लिहावंगु दु।

प्रहरीं स्वंगु राउण्ड हवाइ फायर याउगु धका स्थानीयपिन्स धाउगु दु। अन निगः ट्रकं फोहोर क्वफागु दु । अप्पा क्यका १२ गु गाडीइ क्षति न जुगु दु।

प्रहरीं बञ्चरेडाँडा संघर्ष समितिया संयोजक श्रीराम ढुंगाना, तपन उप्रेती नाप प्यम्हेसित ज्वंगु दु।

अर्थमन्त्री जनार्दन शर्मा न धितोपत्र बोर्डय् वार्षिकोत्सव समारोहय् समिति गठन यासे समस्याया अध्ययन यायेगु जानकारी बिइवं सेयर बजाः थौं बुधबाः ६०.२२ अंकं थहावना २०८०.४४ बिन्दुइ थ्यःगु दु।

थौं बुधबाः २३१ कम्पनीया ३० हजार ६८४ गु कारोबारपाखे ५० लाख ५ हजार ८१४ कित्ता सेयर किनबेच जुगु खः। कारोबार रकम धाःसा १ अर्ब ६४ करोड ३ लाख ५६ हजार ६०८ रुपैयाँ थ्यंगु दु।

बुधबाः दक्को हे उपसमूहया सेयर भाः कुहावःगु दु। सामुदायिक लघुवित्त वित्तीय संस्था व उपकार लघुवित्त वित्तीय संस्थाया भाःसा सकारात्मक सर्किटय् वःगु दु।

अथेहे बलेफी हाइड्रो, कालिका लघुवित्त, तेह्रथुम पावर, उन्नती सहकार्य लघुवित्तया भाः तक सकारात्मक सर्किट लेबलय् वना कारोबार जुगु दु।

माउन्टेन हाइड्रो, आरबीबी म्यूचअल फण्ड, नबिल ब्यालेन्स फण्ड कम्पनीया सेयर भाः यक्को कुहावंगु दु। थौं अरुण भ्याली हाइड्रोपावरया यक्को कारोबार जुगु दु।