शेयर बजाः थौं हाकन दोहोरो अङ्कं घटे जुगु दु। म्हिगः आइतवाः ४१ अङ्कं घटे जुगु शेयर बजार परिसूचक नेप्से थौं हाकन २९ दशमलव ९८ अङ्कं घटे जुया २ हजार ५ सय ४२ दशमलव २८ विन्दुइ कुहावंगु दु।

दक्को समूहया शेयर घटे जुगुलि विकास बैंक, व्यापार, बीमा व उत्पादन समूहया शेयर यक्को तसक कुहावंगु दु। थौं थौं २ सय ३१ कम्पनीया ४९ लाख ५८ हजार कित्ता शेयर २ अर्ब ५४ करोड ५३ लाख रुपैयाँ कारोबार जुगु दु।

दकलय् अप्पो जीवन विकास लघुवित्तया २२ करोड २४ लाख रुपैयाँ शेयर किनबेच जुगु दु। अथेहे आईसीएफसी फाइनान्सया शेयर झन्डै ५ प्रतिशत व सानिमा लाइफ इन्सुरेन्सया शेयर साढे ४ प्रतिशतं घटे जुगु दु।

समग्र बजार घटे जूसा राष्ट्रउत्थान लघुवित्त व इमर्जिङ नेपाल कम्पनीया शेयर १० प्रतिशतं थहावंगु दु।

येँ महानगरया मेयर विद्यासुन्दर शाक्यं थौं छगु ज्याझ्वः दथुइ आनन्द भूवन विहारया उलेज्या यानादीगु दु।

स्वयम्भू महाचैत्यया पादमूल भुइँख्यलय् च्वंगु विहार २०७२ सालया भुखाचं क्षतिग्रस्त जुगुलि २०७७ मंसिर २५ गते शिलान्यास याना पुननिर्माण न्ह्याकूगु खः। विहारया ज्या निगु चरणं पुननिर्माण याउगु खः। ४ करोड २५ लाख रुपैयाँ लागत अनुमान दुगु विहार पुननिर्माणया न्हापागु चरणय् करीब २ करोड रुपैयाँ बराबरया खर्च न पुननिर्माण जुगु खः।

२ करोड रुपैयाँ मध्ये ८५ प्रतिशत रकम महानगर व १५ प्रतिशत उपभोक्तापाखे तःगु खः।उलेज्याझ्वलय् न्ववासे मेयर शाक्यं, सम्पदानाप सम्बन्धित न्ह्यागु न योजनायात न्हापागु प्राथमिकता बिया कार्यान्वयन याना २०७२ सालया भुखाचं जीर्ण जुगु यक्को सम्पदा पुननिर्माण याये धुकागु दु । ‘जिं यकागु प्रस्ताव कार्यपालिकाया बैठक व नगर सभां गुवलय् न अस्वीकृत याउगु मदु।

सुधारया लागि सुझाव वंगु दु तर लित धासा आःतक छ्वये माःगु मदु। दक्को सर्वसम्मत निर्णय जुगुलि थःत गौरव जुगु दु।’ वयकलं धयादीगु दु, ‘सांस्कृतिक थासया गतिविधि नाप पर्यटकीय प्रवर्धनया ज्या यानागु दु। थुकिइ स्थानीयबासीपिनिगु आय थहावनिइ। सरकारयात थुगु थासं वःगु आयं सम्पदा संरक्षणय् ग्वाहालि जुइ।’

विहारया संरक्षणयात माःगु पहिचान जुइ धुका महानगरं लगानी अप्पोकागु धासे उपमेयर हरिप्रभा खड्गी श्रेष्ठं, हरेक न्यादँय् स्थानीय सरकारया निर्वाचनपाखे नेतृत्वय् ह्यूपाः वइ धासे महत्वपूर्ण योजनाया निरन्तरता दइ धका धयादीगु खः।

उगु ज्याझ्वलय् विहार निर्माणय् महत्वपूर्ण ग्वहालि याउगुलि मेयर शाक्य, उप मेयर खड्गी श्रेष्ठ व वडाध्यक्ष डंगोलयात हंगु।

वंगु २४ घण्टाया दुने देयन्यक थप २१ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ५ हजार १५२ म्हेसित पीसीआर परीक्षण याउगुलि ११ म्ह व १ हजार १५७ म्ह एन्टीजेन परीक्षणय् खुम्हयाना २१ म्हेसित संक्रमण पुष्टि जुगु दु।

अथेहे २४ घण्टाया दुने ३१९ म्ह कोरानामुक्त जुगु दु।

वगु स्थानीय तहया चुनावय् येँ जिल्लाया स्थानीय तहय् ४६ गु राजनीतिक दलं चुनाव ल्वाइगु जुगु दु।

निर्वाचन आयोगया कथं स्थानीय तहया चुनावय् येँपाखे ४६ दलं दलीय चुनाव चिं ज्वना चुनाव ल्वाइगु जुगु दु।

दलीय ल्याखं येँ जिल्लाय् दकलय् अप्पो राजनीतिक दलं चुनाव ल्वाइगु जुगु खः।

अथेहे स्थानीय तहया चुनावय् देयन्यक ७९ गु दलं चुनाव चिं ज्वना चुनाव ल्वाये दइगु जुगु दु।

राष्ट्रिय प्रजातन्त्र पार्टी नेपाल राप्रपाया अध्यक्ष कमल थापां राजसंस्था पुनःस्थापनाया सम्भावना नेपालय् मन्त धका धाउगु दु।

राप्रपा नेपालं थौं सोमबाः वीरगञ्जय् ग्वसाः ग्वंगु पत्रकार सम्मेलनय् सम्बोधन यासे झीन्यादँ न्ह्यः वंगु राजनीतिक ह्यूपा न पुलाम्ह जुजुं दलप्रति याउगु आक्रामक बिचाः न राजसंस्था पुनः स्थापनया सम्भावना क्वचाःगु दु धका धाउगु दु।

थापा राजसंस्था पुनः स्थापनाया वकालत याना च्वंगु छगु हे जक पार्टी राप्रपाय् पुलाम्ह जुजु व वयागु  सचिवालयं याउगु चलखलेया कारण थःपिन्स न्हुगु लँपु ल्ययाउगु खः धका प्रष्ट याउगु दु।

अध्यक्ष थापां वइगु स्थानीय तहया निर्वाचनपाखे यक्को अपेच्छा मयानागु देयन्यक दक्को स्थानीय तहय् राप्रपा नेपालया उम्मेदवारपि चुनाव ल्वाएगु जानकारी बिउगु दु।