संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठं सुशासन व पारदर्शिता कायम यायेत स्थानीय सरकारयात निर्देशन बिउगु दु। स्थानीय सरकारया सफलता व असफलतां संघीयताया सफलता वा असफलता निर्धारण याइ धका धयादीसे स्थानीय सरकार भ्रष्टाचारमुक्त जुइमाः धका धयादीवु खः।

लुम्बिनी प्रदेशया स्थानीय जनप्रतिनिधिया लागि जुगु ज्याझ्वलय् अभिमुखीकरणया उलेज्या यानादीसे मन्त्री श्रेष्ठं स्थानीय तहय् बेरुजू ४ गुणां थहावना ४० अर्ब थ्यःगू दु धका धयादीसे सार्वजनिक खरिद नाप खर्चयात पारदर्शी व डिजिटलाइज यायेत निर्देशन बिउगु दु। जनप्रतिनिधिपि जनताया अंकुशय् च्वनेमाःगु धका धयादीसे मन्त्री श्रेष्ठं जनताया अंकुशय् मच्वःपि निरंकुश जुइ धका धयादीगु खः।

मन्त्री श्रेष्ठं कानुन व विधिसम्मतया ज्या यायेत स्थानीय जनप्रतिनिधिपिन्त निर्देशन बिउगु खः। संघीय निजामती ऐन इलय् मवःगुदि हे प्रदेश सरकारया कर्मचारीपिन्त समस्या वःगु धका धयादीसे मन्त्री श्रेष्ठं प्रदेश सरकारया मन्त्रालय सचिव व स्थानीय तहया प्रमुख कार्यकारी अधिकृत प्रदेश सरकारं छ्वयगु व्यवस्था कार्यान्वयन मजुगु धका धयादीगु खः।

लुम्बिनी प्रदेश सरकार, मुख्यमन्त्री तथा मन्त्रिपरिषद कार्यालयया ग्वसालय् न्हिन्हु यकं जुगु अभिमुखीकरण ज्याझ्वलय् लुम्बिनी प्रदेश सभाया सभामुख पूर्णबहादुर घर्ती, प्रदेश योजना आयोगया उपाध्यक्ष वामदेव क्षेत्री, मुख्यमन्त्री नाप मन्त्रिपरिषद कार्यालयया प्रमुख सचिव डिल्लीराम शर्मा, प्रदेश प्रशिक्षण प्रतिष्ठानया सीईओ गुरुप्रसाद शर्मापिनिगु न ब्बति दुगु खः।

अष्ट गणेश पब्लिकेशनया ग्वसालय् नेवाः संस्कृति व नेपालभाषायात कःघाना थीथी विषयया न्यागु सफू छगू ज्याझ्वःया दथुइ पितब्वज्या जुउगु दु।

वाङ्गमय शताब्दि पुरुष सत्यमोहन जोशीया मूपाहाँसुइ जुउगु उगु पितब्वज्या ज्याझ्वलय् सन सायमिया “नेपालमण्डलको मौलिक जात्रा परम्परा“, मीना बज्राचार्यया “नवग्रह“ नांयागु ख्यालः मुना, मोहनदेवी महर्जनया “ज्याथा प्रजापति समुदायया पन्चदान गुथि“, राकेश महर्जनया “मल्लकालिन गुथिया धरः पौ“ व भरत महर्जनया “नेपालन्यायपाल विधि“ या चिखिफ्यने ज्या मूपाहाँ जोशीं यानादीगु खः।

पब्लिकेशनया राजेश श्रेष्ठया सभाध्यक्षताय् जुउगु पितब्वज्या ज्याझ्वलय् पिदंगु सफूयात कया पत्रकार व साहित्यकार विजयरत्न असंबरें नुगः खँ तयेगु झ्वलय् साहित्यकार व उप प्राध्यापक राजित बहादुर श्रेष्ठं थः अबु अष्टबहादुर श्रेष्ठ व मां गणेश कुमारी श्रेष्ठया नामय् प्रकाशन संस्था निस्वना उगु संस्थापाखें न्यागु न्यागु सफू छक्वलं पितब्वज्या यागुयात च्वछाये बहगु खँ धका धयादिल।

ज्याझ्वलय् प्रकाशन संस्थापाखें राजित बहादुर श्रेष्ठं सुभाय् देछासे थःपिन्त थ्व धर्ती हःपिं मां अबुया गुनयात चिरस्मरणीय यायेगु मति तया भाषा व साहित्यया सेवा यायेगु भावं थथे सफू पिकानागु खँ धका धयादीगु खः।

वाङ्मय शताब्दी पुरूष संस्कृतिविद् डा. सत्यमोहन जोशीं साहित्यया फुक्क हे विधाय् ल्हाः न्ह्याकादीगु दु।

वयकःया १०३ क्वःगु बुदिंया लसताय् वयकलं हे च्वयादीगु पूधाः प्याखं ‘बैद्य बा’ आः टेलिप्याखं कथं दयेकेगु खँया घोषणा जुउगु दु। वयकःया हे उपस्थितिइ बैद्य बाया शुटिङ्ग नं शुरु यागु दु । वहे झ्वलय् वयकलं कलाकारिताख्यलय् नासः द्यःया महत्वबारे नं खँ कनादिगु खः।

‘बैद्य बा’  टेलिप्याखनय् पूधा प्याखंया हे कलाकार दुथ्याकिगु जुउगु दु। बैद्यबाया मूभुमिकाय् शरद कसाःया हे अभिनय स्वयेदइगु जुउगु दुसाः पुर्णिमा शाक्य डंगोल, धर्मकृष्ण श्रेष्ठ, किरनकेन रन्जित, मोहनदेवी महर्जन, निर्मला श्रेष्ठ, शेफाली महर्जन, चिरिबाबु महर्जन, किशोर कुमार नेपाली, एचके बिजय अवाले व नबिन थेच्वमिया नापं शशीकला मानन्धर लगायतपिनिगु अभिनय याउगु दु।

लोक साहित्य परिषदपाखें निर्माणया ज्या न्ह्याकीगु ‘बैद्य बा’ टेलिप्याखंया निर्देशन शान्तराज शाक्य खः। निर्देशक शाक्यं ‘गुरुमापा’ व  ‘यलय् बाथः’ थेंज्याःगु ऐतिहासिक महत्वं जाःगु नेवाः संकिपाया नापनापं धार्मिक व साँस्कृतिक महत्वं जाःगु ‘दिपंखा यात्रा’, ‘पन्चदान’ लिसेलिसें आपालं डकुमेण्ट्री दयेके धुंकुगु दु।

परिषदया छ्यान्जे राजित बहादुर श्रेष्ठं जानकारी बियादीकथं ‘बैद्य बा’ टेलिप्याखनय् दुथ्याइपिं मेमेपिं कलाकार व प्राविधिकया ल्यज्या जुयाच्वंगु दुसा छवाः दुने हे थुकिया शुटिङ्ग जुइगु क्वछिउगु दु।

लुँया भाः थौं स्वसः कुहावंगु दु।

लुँ तोलां स्वसः कुहावया ९८ हजार ९ सय रुपैयाँ कारोबार जूगु दु धका नेपाल सुनचाँदी व्यवसायी महासङ्घं धाउगु दु।

अथेहे वहः न  तोलां १५ रुपैयाँ कुहवःगु दु।

थौं वहः तोलां झीन्यातका कुहावया १ हजार २ सय ६५ रुपैयाँ कारोबार जूगु दु धका महासङ्घं धाउगु दु।

येँ महानगरपालिकाया नगर सभा असार ५ गते जुइगु दु। म्हिगः आइतबाः च्वंगु नगर कार्यपालिका बैठकं २०७९ या स्थानीय तहया निर्वाचनलिपा थ्व न्हापागु नगरसभा खः।

कार्यपालिका बैठकं नगरसभाया बैठक आह्वान, राजस्व परामर्श समिति गठन, कार्यपालिका अन्तर्गतया विषयगत समिति गठन लगायतया निर्णय जुगु खः। उगु  बैडकं समिति व संयोजकपि न क्वछिउगु दु।

कार्यपालिका बैठकं उपमेयर सुनिता डंगोलया अध्यक्षता स्थानीय राजस्व परामर्श समिति गठन याउगु दु। समितिया सदस्यय् महानगरया प्रमुख प्रशासकीय अधिकृत लोकनाथ पौड्याल, वडा नं १४ या वडाअध्यक्ष सुमन श्रेष्ठ, कार्यपालिका सदस्य मीना सिंहयात ल्यउगु खः। समितिया सदस्य सचिवय् राजस्व विभागया प्रमुख न दुथ्याउगु दु।

उगु बंठकं सुशासन समितिया संयोजकय् वडा नं २६ या अध्यक्ष ख्यामराज तिवारी, वित्त समितिइ वडा नं १५ या अध्यक्ष ईश्वरमान डंगोल, सामाजिक समितिइ वडा नं १० या अध्यक्ष रामकुमार केसी, पूर्वाधार समितिइ वडा नं १६ या अध्यक्ष मुकुन्द रिजाल, वातावरण समितिइ वडा नं १२ या अध्यक्ष बालकृष्ण महर्जन, भवन व्यवस्था समितिइ वडा नं ११ या अध्यक्ष हीरालाल तण्डुकार, सम्पदा तथा पर्यटन समितिइ वडा नं ८ या अध्यक्ष आशामान संगत, सूचना प्रविधि समितिइ वडा नं १७ या अध्यक्ष नविन मानन्धर, शिक्षा व स्वास्थ्य समितिइ वडा २२ या अध्यक्ष चिनीकाजी महर्जन, विधायन समितिइ वडा २३ या अध्यक्ष मचाराजा महर्जन, राजस्व समितिइ वडा ३२ या नवराज पराजुली व विपद् व्यवस्थापन समितिया संयोजकय् वडा ३ या अध्यक्ष प्रेम थापाया मंकाः वैठक च्वंगु धका मेयर बालेन साहया सचिवालयं जानकारी बिउगु दु।