प्रधानमन्त्री शेरबहादुर देउवाया भारत भ्रमणय् सहभागी वनिइपि मन्त्रीपिनिगु नां टुंग्ये जुगु दु।

बिहीबाः च्वंगु मन्त्रिपरिषद् बैठकय् वकिइपि मन्त्री नां टुग्ये। भ्रमणय् प्रधानमन्त्री नाप परराष्ट्र, ऊर्जा, कृषि व स्वास्थ्यमन्त्री सहभागी जुइगु जुगु दु।

प्रधानमन्त्री देउवा शुक्रबाः भारत भ्रमणय् वनेत्यंगु खः। भ्रमणया झ्वलय् शनिबाः भारतीय प्रधानमन्त्री नरेन्द्र मोदीनाप भेटवार्ता यायेगु ज्यााझ्वः क्वछिना तये धुकुगु खः।

सत्तारुढ दलपिन्स स्थानीय तह चुनावय् एकतावद्ध जुया वनेगु निर्णय याउगु दु। प्रधानमन्त्री निवास वालुवाटारय् च्वंगु बैठकं चुनावय् मिले जुया वनेगु सहमति जुगु दु।

बैठकलिपा पत्रकारपि नाप खँ ल्हानादीसे कांग्रेस नेता ज्ञानेन्द्रबहादुर कार्की न न्यागु दलीय गठबन्धनं स्थानीय तह चुनावय् तालमेल याना न्ह्यावनेगु निर्णय जुगु दु धका धाउगु दु।

तालमेलया लागि प्रदेशस्तरीय व जिल्लास्तरीय व पालिकास्तरीय समिति दयका वनेगु सहमति जुगु खः। ‘समितिं २२ गते दुने प्रदेश, जिल्ला व स्थानीय तहया स्थितिया बारे प्रतिवेदन बिइ’, कार्की न धाउगु दु, ‘वया लिपा प्रतिवेदनया आधारय् तालमेल जुइ।’

चुनावी तालमेलया बाँकी याउगु प्रक्रियाया विषय हाकनं छलफल याना न्ह्यावनेगु सहमति जुगु दु धका धाउगु दु ।

येँ महानगरपालिकां २३ गु गुँला बाज खलःयात आर्थिक ग्वहालि याउगु दु। येँया कसाः ख्यलय् छगु ज्याझ्वः दथुइ येँ महानगरया मेयर विद्यासुन्दर शाक्यं गुँला बाज खलःयात निगु निगु लाख रुपैयाँया ग्वाहालि याउगु खः।

अनुदान रकम लल्हानादिसे मेयर शाक्यं धयादीगु दु, अमूर्त सम्पदा बचे यायेगु निति थुुगु समुदायपिनिगु न तधःगु भूमिका दु धका धयादीगु खः। ‘सांस्कृतिक गतिविधिइ थाइगु बाजं व परम्परागत बाजं बचे यायेगु निति व बाजं थाइपिनिगु समुदाय न ई व ध्यवा याये मालाच्वंगु दु। उकिया निति धैर्यतायात प्रोत्साहन यायेगु कथं थथे अनुदान बिया वयाच्वनागु खः।’ धका धयादीगु खः।

अथेहे १५ या वडाध्यक्ष नाप महानगरया प्रवक्ता ईश्वरमान डंगोलं सम्पदा पुननिर्माणया लागि थुगु ई आःतकया हे स्वर्णिम ई खः धका धयादीसे वयकलं मेयर विद्यासुन्दर शाक्यया नेतृत्व यानाच्वंगु जनप्रतिनिधिपिन्स यक्को हे सांस्कृतिक सम्पदा पुननिर्माण व संरक्षण याउगु धका धयादीगु खः।

अनुदान काउगु गुँला बाजं खलः थुकथं दु

१) कसाः तःधं गुथि, जनबहाल २) चस्वाँद्व मानन्धर सनागु खलः, चस्वाँद ३)असं बाज गुथि, असं ४) स्वयम्भू गंला बाजँ खलः स्वयम्भू ५) केशचन्द्र गुंला बाजं खलः, इतुंमबहाः ६) तेबहाः गुंला बाजं खलः, तेबहाः ७) ओम बहाः गुंला बाजं खलः, ओमबहाः ८) थँहिति मानन्धर गुथि, थँहिति ९) न्यागमणि फेदी धाः बाजं खलः, बालाजु १०) रत्नमण्डल महाबिहार सवं संघ, नघः ११) पाक्व पख्द्यां मानन्धर सना खलः, पाको १२) लाय्कुसाः मानन्धर समाज, लाय्कुसा १३) कीर्ति पुण्य महाबिहार, क्वहिति १४) ङत गुंला बाजं खलः, न्यत १५) मानन्धर सनागु खलः न्हूसाः, न्हूसाः १६) कीर्तिपुण्य महाबिहार, लगन १७) ताम्राकार गुंला बाजं खल, मरु १८) धर्मचक्र महाबिहार बाजं खलः, वँतु १९) त्यंघः कुमाः बाजं खलः, त्यघंः २०) भिंद्य गुथि, कालिमाटी २१) दैसाः त्वाः मानन्धर समाज, दैसा २२) चारुमती गुंला बाजं खल, चावहिल व २३) जय बागेश्वरी धा बाजं खल, जयबागेश्वरी खः।

निर्वाचन आयोगं राजनीतिक दलपिनिगु उम्मेदवार तय यायेगु समावेशिता बिचाः यायेत निर्देशन बिउगु दु।

बुधबाः दलपिनिगु नामय् १२ बुँदे निर्देशन जारी यासे आयोगं लैंगिक नाप समावेशी प्रतिनिधित्व सुनिश्चित जुइगु कथं उम्मेदवार मनोनयनया व्यवस्था यायेत इनाप याउगु दु। स्थानीय तहया प्रमुख व उपप्रमुख वा अध्यक्ष व उपाध्यक्षया पदमध्ये छगु पदय् मिसापिनिगु मनोनयन याये माःगु व्यवस्था दु धका आयोगं स्मरण याउगु दु।

अथेहे २०७४ य् १७५ दलित मिसा वडा सदस्य पदय् उम्मेदवारी हे मदु धासे आयोगं धाउगु दु, ‘‘प्रचलित कानून बमोजिम दक्को वडाय् दलित मिसा उम्मेदवारी जुएइगु व्यवस्थाया लागि माःगु कुतः यायेगु।’

राजनीतिक दलयात सामाजिक सञ्जाल प्रयोग यायेगु इलय् मिसा व समावेशी समूहया मनू तयेगु भावनाय् नकारात्मक असर जुइगु कथं गलत, भ्रामक वा द्वेषपूर्ण सूचना प्रवाह मयायेत न आयोगं इनाप याउगु दु।

सर्वोच्च अदालतया न्यायाधीश तिलप्रसाद श्रेष्ठं पद नाप गोपनीयताया शपथ काउगु दु।

न्यायाधीश श्रेष्ठं कामु प्रधानन्यायाधीश दीपककुमार कार्की समक्ष शपथ काउगु खः।

न्यायपरिषदया सिफारिस व संसदीय सुनुवाइ समितिं अनुमोदन यायेवं राष्ट्रपति विद्यादेवी भण्डारीें मंगलबाः श्रेष्ठयात नियुक्त याउगु खः।