नेपाली कांग्रेसया महामन्त्री गगन थापां अमेरिकी सहयोग परियोजना एमसीसीया पक्षय् मतदान मयासा नेकपा माओवादी केन्द्र व एकीकृत समाजवादीं सरकार त्वतेमाः धका धाउगु दु।

भरतपुर विमानस्थलय् मंगलबाः महामन्त्री थापां सत्तारुढ दलं हे सरकारं संसदय् पेश याउगु एमसीसी सम्झौताया विपक्षय् मतदान यासा गठबन्धनया औचित्य व हे दिं क्वचाइ धका धाउगु दु।

सरकारं हःगु प्रस्तावया विपक्षय् मतदान यायेगु, अले सरकारय् च्वनेगु धायेगुु अनैतिक जुइ धका कांग्रेस महामन्त्री थापा धाउगु खः।

मतदानया इलय् प्वाःस्यात धका छेँ च्वनिइगु, मेगु दिं ठीक जुल धका गठबन्धनय् लिहावयेगु खँ मिले मज्य्र धका थापां धाउगु खः।

कम्युनिष्टया नेतृत्वय् दुगु व कम्युनिष्ट सहभागी जुगु सरकारं थीथी इलय् एमसीसी सम्झौता न्ह्यने वंगु ज्याय् विरोध यायेगु औचित्य मदु धका धाउगु खः

यलय् गाडी दुर्घटना जुया छम्हेसिगु ज्यान वंगु दु।

यल महानगरपालिका–१५ एन्फा न्ह्यने थौं सुथय् ४ बजेति डेलिभरी भ्यान दुर्घटना जुगु इलय् महाङ्काल गाउँपालिका–३ गोटीखेलया ६६ दँ दुम्ह सन्तप्रसाद तिमल्सिनाया ज्यान वंगु दु धका प्रहरीं धाउगु दु।

प्रदेश नम्बर ३–०१०२४ च ४१४७ नम्बरया भ्यान अनियन्त्रित जुया पल्टे जुगु धका प्रहरीं धाउगु दु। भ्यानया चालकयात प्रहरीं ज्वनातःगु दु।

गण्डकी प्रदेशया पहाडी जिल्ला लमजुङय् थौं हाकनं भुखाय् ब्बःगु दु।

थौं चान्ह्यः २ बजे जुया २२ मिनेट वंगु इलय् बेँसीसहर नगरपालिका–१० बाँझखेत केन्द्रविन्दु जुया ३.२ रेक्टर स्केलया भुखाय् ब्बःगु दु धका राष्ट्रिय भूकम्प मापन तथा अनुसन्धान केन्द्रं धाउगु दु।

निर्वाचन आयोगं परिचय पत्र तःपिन्स मतदातायात प्रतिलिपि परिचय पत्रया लागि फागुन २० गते दुने सम्बन्धित जिल्ला निर्वाचन कार्यालयय् निवेदन बिइत इनाप याउगु दु।

सोमबाः आयोगं छगु विज्ञप्ति जारी यासे थःगु वडा कार्यालयया सिफारिसय् सम्बन्धित जिल्ला निर्वाचन कार्यालय निवेदन बिया  प्रतिलिपि परिचय पत्र कायेफइ धका धाउगु दु।

नाप, थःगु विवरणय् छु न द्धःगु दुसा भिकेगु निति फागुन ५ गते दुने इमेल वा भौतिक उपस्थितिइ सम्बन्धित फारम भरे याना भिंके फइ धका निर्वाचन आयोगया सहायक प्रवक्ता सूर्यप्रसाद अर्यालपाखे जारी याउगु विज्ञप्तिइ उल्लेख याउगु दु।

नेकपा माओवादी केन्द्रया अध्यक्ष पुष्पकमल दाहाल प्रचण्डं एमसीसीया कारण गठबन्धन त्वाधली मखु धका धाउगु दु।

नेपाली कांग्रेसया वरिष्ठ नेता रामचन्द्र पौडेल नापलाना प्रचण्डं एमसीसी संसदीय प्रक्रियाय् दुगु व उकिया टुंग्ये जुइ धका धाउगु दु।

नाप प्रचण्डं न्यागु दलीय गठबन्धन टुटे जुइमखु धका न धाउगु दु। पौडेलनाप लापालाये धुका सञ्चारकःमिपि नाप संक्षिप्त प्रतिक्रिया बिउसे प्रचण्ड एमसीसी व गठबन्धनबारे खँ जुगु व थम्हेसिया गठबन्धन टुटे जुइमखु धका भलसा बियाउगु धाउगु दु।