वंगु २४ घण्टाय् देयन्यक थप ३८८ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ५ हजार २२५ म्हेसिगु पीसीआर परीक्षण २४७ म्ह व २ हजार ९१५ एन्टिजेन परीक्षण यागुलि १४१ म्ह याना ३८८ म्हेसित संक्रमण पुष्टि जुगु दु।

मन्त्रालयया कथं वंगु २४ घण्टाय् १२०५ म्ह संक्रमणमुक्त जुगु दु। अथेहे कोरोना संक्रमणया कारण प्यम्हेसिगु ज्यान वंगु दु। स्वनिगलय् थप ९६ म्ह कोरोना संक्रमण पुष्टि जुगु दु।

उकिमध्ये येँ ७७ म्ह, यलय् ११ म्ह व ख्वपय् च्याम्हेसित कोरोना संक्रमित जुगु दु। अथेहे यस्तै कास्कीइ १५, झापा व मोरङय् १२÷१२ म्ह, सुनसरी व चितवनय् १०÷१० म्ह, तनहुँइ ७, नुवाकोटय् ६ नाप पाँचथर व बाँकेय् ५÷५ म्हेसित कोरोना संक्रमण पुष्टि जुगु दु धका स्वास्थ्य मन्त्रालयं धाउगु दु।

नेपाल बार एसोसिएसनया चैत १९ गते जुइगु चुनावया लागि निर्वाचन ज्याझ्वः सार्वजनिक याउगु दु।

चुनाव देयन्यक हे छकल याइगु धका निर्वाचन समितिं धाउगु दु। चुनावपाखे छम्ह अध्यक्ष, च्याम्ह उपाध्यक्ष, छम्ह कोषाध्यक्ष, छम्ह महासचिव व झींप्यम्ह सदस्यपि निर्वाचित जुइगु खः।

निर्वाचन समितिया कथं चुनावया लागि फागुन १० गते मतदाता नामावली प्रकाशन याइसा १३ गते नांया दावी विरोध यायेत धाउगु दु। अथेहे अन्तिम नामावली फागुन २० गते प्रकाशित याइसा फागुन २३ गते उम्मेदवारी दर्ताया ई क्वछिउगु दु।

फागुन २५ गते अन्तिम नामावली प्रकाशित याना चैत १९ गते सुथय् ८ निसे ४ बजेतक मतदान जुइ। निर्वाचन क्वचायेवं मतगणनाया ज्याझ्वः जुइ।

सञ्चारमन्त्री ज्ञानेन्द्रबहादुर कार्कीया सुरक्षा बढे याउगु दु।

सञ्चार मन्त्रीया सुरक्षा नेपाल प्रहरीं न्ह्यने वनेगु गाडी नाप थप सुरक्षाकःमिपि परिचालन याउगु दु। म्हिगः सञ्चार मन्त्री कार्की न अर्थमन्त्रीया पाखे प्रतिनिधिसभाय् मिलेनियम च्यालेन्ज कर्पोरेसन (एमसीसी) टेबल याउगु खः।

एमसीसीया विरोध यानाच्वपिन्स आक्रमण याये फइ धका सुरक्षा विश्लेषणया आधारय् गाडी नाप सुरक्षाकःमिपि थप यासे टोली परिचालन याउगु दु।

वयकःया निजी सुरक्षाय् अधिकृत नाप थ्व स्वया न्ह्यः प्रहरी नायव निरीक्षक (सई) खटे यानातःगु खः। कार्की न एमसीसी टेबल याउगु खःसा प्रमुख प्रतिपक्षी दलं नाराबाजी यानाच्वंगु खः।

थौं अन्तर्राष्ट्रिय मातृभाषा दिवस, थीथी ज्याझ्वः याना हनेत्यंगु दु।

संयुक्त राष्ट्र सङ्घ महासभां सन् १९९९ य् घोषणा यायेव सन् २००० निसे फेब्रुअरी २१ तारिख कुन्हु अन्तर्राष्ट्रिय मातृभाषा दिवस हनेगु सुरु याउगु खः।

नेकपा माओवादी केन्द्रया नेता देव गुरुङं अमेरिकी सहयोग परियोजना एमसीसी संसदय् टेबल मयायेत सभामुख अग्निप्रसाद सापकोटयात इनाप याउगु दु।

थौं आइतबाः प्रतिनिधिसभाया बैठकय् ई न्ववासे एमसीसीइ राष्ट्रिय हित विपरीतया विषय दुगु, संसद अवरोध दुगु व आर्थिक सहयोग सम्बन्धी सम्झौता संसदय् पेश यायेगु प्रचलन दुसा एमसीसी टेबल यायेमज्यु धका धाउगु दु।

एमसीसी कार्यसूचीइ तयेगु विषय कार्यव्यवस्था परामर्श समितिं बैठकय् सहमति न मजुगु धासे गुरुङं संसद अवरोध जुयाच्वंगु इलय् बरु संसद खुले यायेत ध्यान बिइत इनाप याउगु दु।