नेप्से ८ सय अंक थहावंन शेयर बजार सकारात्मक दिशाय् वःगु दु।

न्हिच्छियकं उचारचढाव खनेदुगु बजाः मध्यान्हय् पाखे २८ सय अंक थहावंगु खः। २८ सय च्वय् थ्यका नेप्से परिसूचक कारोबार बन्द जुगुलि १९ अंकं थहावना २७ सय ८४ अंकय् थ्यका बन्द जूगु खः। कारोबार रकम धासा ७ अर्ब १२ करोड नाघे जूगु दु।

यक्को शेयर भाः थहावंगुलि मध्य भोटेकोशी जलविद्युत् आयोजना १० प्रतिशतं थहावना २८५ रुपैयाँ थ्यःगु खः। अथेहे युनियन हाइड्रोपावरया शेयर भाः ९.९९ प्रतिशतं थहावना २८५ रुपैयाँ ३० पैसा, कर्पोरेट डेभलपमेन्ट बैंकया ९.९८ प्रतिशतं थहाना ५५ रुपैयाँ थ्यःगु खः।

अथेहे खानीखोला हाइड्रोपावर ८ प्रतिशतं थहावना ३३० रुपैयाँ, हिमालय उर्जा विकास कम्पनी ८ प्रतिशतं थहावना ४९८ रुपैयाँ, गोर्खाज फाइनान्स ७ प्रतिशतं थहावना ८२९ रुपैयाँ, रुरु जलविद्युत करिब ७ प्रतिशतं थहावना १०४० रुपैयाँ, नेशनल लाइफ करिब ७ प्रतिशतं थहावना १०८० रुपैयाँ, जोशी हाइड्रोपावर कम्पनीया शेयर भाः ६.५८ प्रतिशतं थहावना ३४० रुपैयाँ थ्यःगु दु। एनएमबी म्युचअल फण्डया शेयर ६ प्रतिशतं थहावना १२ रुपैयाँ ९७ पैसा थ्यःगु दु।

स्वास्थ्य मन्त्रालयया कथं स्वनिगलय् थप ८७६ म्हेसित कोरोना संक्रमित थपे जूगु दु।

मन्त्रालयया कथं थौं येँ ६७५, यलय् १३६ म्ह व ख्वपय् ६५ म्हेसित कोरोना संक्रमण पुष्टि जुगु दु।

मन्त्रालयया कथं मोरङय् ७२, कास्कीइ ५८, चितवनय् ४५, रुपन्देहीइ ४३ म्हेसित कोरोना संक्रमण जूगु दु।

अथेहे,  झापाय् ३१, धनुषाय् १८, मकवानपुर व दाङय् १६÷१६ म्ह, कैलालीइ १४, पश्चिम नवलपरासीइ १३, सिरहा व बाँकेय् १२÷१२ म्ह, काभ्रेपलाञ्चोकय् ११ नाप तनहुँ व स्याङजाय् १०÷१० म्हेसित कोरोना संक्रमण पुष्टि जूगु दु धका मन्त्रालयं धाउगु दु।

वंगु २४ घण्टाया दुने देयन्यक थप १,४४६ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं ८ हजार ९६५ म्हेसित पीसीआर परीक्षण याउगुलि १३५७ म्ह व २ हजार ४६४ म्हेसित एन्टिजेन परीक्षण याउगुलि ८९ म्ह याना १,४४६ म्हेसित संक्रमण पुष्टि जूगु दु।

वंगु २४ घण्टाय् निम्ह सीउगु दु सा २५५ म्ह संक्रमणमुक्त जूगु दु।

लुँ तोलां थौं स्वसः कुहावंगु दु।

लुँ तोलां थौं स्वसः कुहावया ९१ हजार ३ सय रुपैयाँ कायम जूगु दु धका नेपाल सुनचाँदी व्यवयासी महासङ्घं धाउगु दु।

अथेहे वहः तोला न न्यातका कुहावगु दु। वहः तोला थौं न्यातका कुहावया १२ सय २० रुपैयाँ कायम जुगु दु धका महासङ्घं धाउगु दु।

ज्यापु महागुथि नेपाः येँ महानगर समितिया अध्यक्षय् पंचनारायण महर्जन निर्वाचित जुगु दु।

न्हुगु नेतृत्वया लागि अध्यक्ष, उपाध्यक्ष २, सचिव, सहसचिव, कोषाध्यक्ष व सहकोषाध्यक्ष नाप १४ म्ह सदस्यपिनिगु लागि निर्वाचन जुगुलि निम्ह उपाध्यक्ष, सहसचिव, सहकोषाध्यक्ष नाप सदस्यपि निर्विरोध निर्वाचित जुगु खः।

अध्यक्ष, सचिव व कोषाध्यक्ष पदया लागि धासा निर्वाचन जुगु खः।अध्यक्ष पदया लागि न्यतया न्हुछेकाजी महर्जन, गोफः त्वाःया पंचनारायण महर्जन व वतु त्वाःया सुरेन्द्र महर्जनपि दथुइ निर्वाचन जुगुलि अध्यक्ष पदय् पंचनारायण महर्जन ३६० मत हया निर्वाचित जुगु दु। अथेहे निकटतम प्रतिद्वन्द्वी न्हुछेकाजी महर्जनं १७१ मत व सुरेन्द्र महर्जनं ८ मत जक काउगु खः।

अथेहे सचिव पदय् किलाघः त्वाःया मचाराजा महर्जन ३२४ हया निर्वाचित जुगु दु सा शर्मिला सुवाल डंगोलं २०६ मत काउगु खः। कोषाध्यक्ष पदय् भिद्यः त्वाःया जुजुकाजी महर्जनं ३६१ मत हया निर्वाचित जुगु खःसा राजु रत्न महर्जनं १२४ मत काउगु खः।

महागुथिय उपाध्यक्ष कृष्ण नारायण महर्जन व उपाध्यक्ष (मिसा), नानी हेरा महर्जन, सहसचिव रजिना डंगोल, सहकोषाध्यक्ष नानी हेरा डंगोल र्निबिरोध निर्वाचित जुगु दु।

अथेहे खुल्ला सदस्यय् श्याम कृष्ण प्रजापति, राजन महर्जन, श्रीकृष्ण महर्जन, कृष्ण महर्जन, मचाराजा महर्जन, श्याम महर्जन, कुलनारायण डंगोल, सूर्यमान महर्जन, दिनेश महर्जन निर्वाचित जुगु दु सा मिसा सदस्यय् विद्यालक्ष्मी डंगोल, बिमला महर्जन (डंगोल), कमला महर्जन, सजनी महर्जन व सुनिता महर्जन डंगोल निर्वाचित जुगु दु।