येँ महानगरपालिका–५ य् एमालेया वीरेन्द्र प्रजापति निर्वाचित जुगु दु।

प्रजापतिं नेपाली कांग्रेसया निकटतम प्रतिद्वन्द्वी रमेश डंगोलयात २५३ मतं पराजित याउगु खः। प्रजापतिं १ हजार ८१८ मत हःगु खःसा डंगोलं १ हजार ५७५ मत हःगु खः।

अथेहे, सदस्यय् एमालेया हरिबहादुर महर्जन व कांग्रेसया विजय कर्माचार्य विजय जुगु खः। मिसापाखे कांग्रेसया मीना सिंह व दलित महिला सदस्यय् आरती सुनुवार विजयी जुगु धका येँया मुख्य निर्वाचन अधिकृत राजुकुमार खतिवडां जानकारी बिउगु दु।

बागलुङ नगरपालिकाया मेयरय् नेपाली कांग्रेसया बसन्तकुमार श्रेष्ठ विजयी जुगु दु।

सत्तारुढ न्यागु दलीय गठबन्धनया मंकाः उम्मेदवार श्रेष्ठं १२ हजार ८०५ मत हया निर्वाचित जुगु खः।

श्रेष्ठया प्रतिस्पर्धी नेकपा एमालेया उम्मेदवार नाप निर्वतमान नगरप्रमुख जनकराज पौडेलं ६ हजार २८४ मत हःगु खः।

अथेहे उपमेयरय् गठबन्धनया हे उम्मेदवार नेकपा माओवादी केन्द्रया राजु खड्कां १० हजार ९९८ मत हया निर्वाचित जुगु खः। राप्रपाया सञ्जय खड्कां ६ हजार ६४५ मत हःगु खः।

बागलुङ नगरपालिका १४ मध्ये न्ह्यगु वडाय् नेपाली कांग्रेस, निगु वडाय् नेकपा एकीकृत समावजादी, छगु वडाय् नेकपा माओवादी केन्द्र व छगु वडाय् स्वतन्त्र उम्मेदवारपि त्याउगु खः।

थिमी नगरपालिकाया मेयरय् नेपाली कांग्रेसया सुरेन्द्र श्रेष्ठ निर्वाचित जुगु दु। निर्वाचन आयोगया कथं सुरेन्द्रं १५ हजार ९८ मत हया निर्वाचित जुगु दु धका धाउगु दु।

अथेहे एमालेया मदन सुन्दर श्रेष्ठं ११ हजार ३५ मत हःगु खःसा नेपाल मजदुर किसान पार्टीया आशाहरि प्रजापतिं २ हजार २५ मत हःगु खः।

अथेहे उपमेयरय् नेकपा माओवादी केन्द्रया विजयकृष्ण श्रेष्ठं १२ हजार १०२ मत हया निर्वाचित जुगु दु। नेकपा एमालेया उत्तरा नेपालं ८ हजार ९६३ मत व नेपाल मजदुर किसान पार्टीया दीक्षा बाडे न २ हजार ७२२ मत हःगु खः।

थिमि नगरपालिकाया गुगू वडामध्ये खुगु वडाध्यक्षय् नेपाली कांग्रेस, निगु नेकपा एमाले व छगु वडाय् नेपाल मजदुर किसान पार्टीया उम्मेदवारपि निर्वाचित जुगु दु।

किपू नगरपालिकाय् नेकपा (एमाले) न प्रमुख, उपप्रमुख नाप दक्को वडाय् पराजित जुइवं नगर इन्चार्जं पदपाखे राजीनामा बिउगु दु।

नेकपा (एमाले) किपू नगर इन्चार्ज लक्ष्मीकुमार महर्जनं नैतिकताया आधारय् थःगु पदपाखे राजीनामा बिउगु दु। थःगु सामाजिक संजालपाखे नगर इन्चार्जं राजीनामाया घोषणा याउगु दु।

‘स्थानीय तहया निर्वाचनय् किपू नगरपालिकाया दक्को वडा व मेयर उपमेयर पदय् पराजित जुगुलि नैतिकताया आधारय् राजिनामा यानागु दु’ धका महर्जनं थःगु राजीनामा पत्रय् च्वंगु दु।

‘एतिहासिक किपुलिइ सुर्यया ध्वजाबाहकपिन्त त्याके मफुगुलि जि थुगु किपू नगरया इन्चार्ज व जिल्ला कमिटीइ च्वनिइगु जितः नैतिकतां मबिइगु। थौंनिसे हे उगु पद व जिम्मेवारीपाखे राजिनामा याये’ धका महर्जनं म्हिगः थःगु सामाजिल संजालय् च्वयादीगु खः।

चीनया लागि  प्रस्तावित राजदूत विष्णुपुकार श्रेष्ठया नां संसदीय सुनुवाइ समितिं अनुमोदन याउगु दु।

थौं मंगलबाः सुनुवाइ समितिं श्रेष्ठ व दक्षिण अफ्रिकाया लागि प्रस्तावित राजदूत दानबहादुर तामाङया नां अनुमोदन याउगु खः।

निम्हेसिगु विरुद्ध समितिइ उजुरी वंगु मदु। ल्यदनिइगु प्रस्तावित १८ राजदूतपि विरुद्ध उजुरी दुगुलि व सुनुवाइ यायेत कन्ह्यः बुधबाः बैठक सःतूगु दु।