छु दिं न्ह्य जक दक्षिण अफ्रिकाय् पत्ता लगे जुगु कोभिड–१९ या न्हुगु भेरियन्ट ओमिक्रोनया संक्रमित युरोपय् थीथी थासय् पिहावंगु दु।

बेलायत, जर्मनी व इटलीइ ओमिक्रोनया न्हुपि संक्रमितपि पिहावंगु दु। शनिबाः बेलायतय् निम्हेसित न्हुगु भेरियन्ट खनेदुगु दु। दक्षिण अफ्रिकां लिहावंपि निम्हेसित ओमिक्रोन खनेदुगु दु धका बेलायतया स्वास्थ्यमन्त्री साजिद जाभिदं धाउगु दु।

अथेहे, जर्मनय् नोभेम्बर २४ य् दक्षिण अफ्रिकापाखे वंपि निम्हेसित ओमिक्रोन भेरियन्ट पुष्टि जुगु धका म्युनिखस्थित माइक्रोबायोलोजी केन्द्र म्याक भोन पेटेनकोभरं धाउगु दु। इटलीइ न मोजाम्बिकपाखे लिहावंम्ह छम्हेसित ओमिक्रोन भेरियन्ट संक्रमित जुगु व निम्ह मचा नाप मेपि न्याम्हेसित कोरोना संक्रमण पुष्टि जुगु दु।

तर कोभिड–१९ या मेमेगु भेरियन्ट स्वया ओमिक्रोन थप खतरनाक वा गम्भीर दु वा मदु धइगु पुष्टि जुइ ल्यःदनि।

अमेरिकाया न्यूयोर्कय् आपतकाल घोषणा याउगु दु। न्यूयोर्कया गभर्नर क्याथी होचुलं विज्ञप्ति जारी यासे डिसेम्बर ३ निसे लागू जुइगु कथं आपतकाल घोषणा याउगु दु।

आःतक फैलै जुगु कोरोना डेल्टा व नकतिनि हे पहिचान याउगु ओमिक्रोन भेरियन्टया कारण चिकूगु संक्रमण अप्वोया वंगु धका होचुलं आपतकाल घोषणायानागु धका एनबीसी न्यूयोर्क धाउगु दु। होचुलं शुक्रबाः जारी याउगु विज्ञप्तिइ न्यूयोर्कय् च्वपिन्त खोप कायेत न इनाप याउगु दु।

‘महामारीनाप ल्वायेगु दकलय् तधःगु हतियार खोप न खः’, विज्ञप्तिइ धयातःगु दु, ‘हरेक न्यूयोर्कय् च्वपिन्स खोप कायेत प्रोत्साहित याये व पूरा डोज काये धुकुपिन्स बुस्टर डोज कायेत न इनाप याये।’ आपतकाल लागू जुइवं न्यूयोर्क राज्यं महामारीनाप ल्वायेत माःगु सामग्री खरीद यायेत, अस्पतालया क्षमता अप्वोकेत व स्वास्थ्यकर्मीया अभाव पूर्ति यायेगु पलाः ल्ह्वनेत्यःगु दु।

अथेहे, राज्यया स्वास्थ्य मन्त्रालयं अस्पतालया सामान्य उपचार प्रक्रिया तक सीमित याये फइ।

दक्षिण अफ्रिकां लिहावपि मनूपिन्त कोरोनाया न्हुगु भेरियन्ट ’ओमिक्रोन’ या शङ्कास्पद सङ्क्रमित खनेदुगुलि जर्मनय् उच्च सतर्कता अपने याउगु दु।

दक्षिण अफ्रिकां लिहावम्ह छम्ह मनूयाके न्हुगु भेरियन्टपाखे सङ्क्रमित जुगु शकां पश्चिमी राज्य हेस्सीया सामाजिक मामिलामन्त्री काइ क्रोजले ट्विटय् उल्लेख याउगु दु।

उम्ह मनूयाके ‘ओमिक्रोन’ भेरियन्ट जुगु सम्भावना दुगुलि वयात होम क्वरेण्टीनय् तया तगु दु धका धाउगु दु। तर पुष्टिया लागि थप अनुसन्धान यानाच्वंगु दु।

विश्व स्वास्थ्य संगठनं दक्षिण अफ्रिकाय् पत्ता लगे जुगु कोरोना भाइरसया न्हुगु भेरियन्टया नां ‘ओमिक्रोन’ तःगु दु।

विश्व स्वास्थ्य संगठनं दक्षिण अफ्रिकाय् नकतिनि लुगु कोभिड–१९ या न्हुगु भेरियन्टया नां ‘ओमिक्रोन’ तःगु दु। संगठनं ओमिक्रोन ‘चिन्ताजनक भेरियन्ट’ तक धाउगु दु। समाचार कथं ‘बि.१.१.५२९’ तक धाइगु ओमिक्रोन भेरियन्टया उत्परिवर्तन ल्याः यक्को व यक्को पटक हाकन संक्रमण जुइगु जोमिख अप्वो दु धका धाउगु दु।

आःतक ओमिक्रोन भेरियन्ट दक्षिण अफ्रिका नाप बेल्जियम, इजरायल, बोत्स्वाना व हङकङमा खने दये धुकुगु दु। न्हुगु भेरियन्ट पत्ता लगे जुगु समाचार पिहा वयेवं युरोपेली युनियन व बेलायतं दक्षिण अफ्रिकी मुलुक देयपाखे वइगु हवाई यात्राय् प्रतिबन्ध तःगु खः। अथेहे, अमेरिकां तक दक्षिण अफ्रिका नाप मेमेगु देशपाखे वइगु हवाई यात्राय् प्रतिबन्ध याइगु जुगु दु।कोरोना न्हुगु भेरियन्ट नां ओमिक्रोन भारतय् न खनेदुगु दक्षिण अफ्रिका, बोत्स्वाना व हङकङपाखे वंपि यात्रुपिन्त कडा स्क्रिनिङ व परीक्षण याइगु धका धाउगु दु।

तर ओमिक्रोनया पहिचान लिपा अन्तर्राष्ट्रिय प्रतिक्रियाप्रति दक्षिण अफ्रिकां असहमति क्यंगु खः। शुक्रबाः दक्षिण अफ्रिकाया स्वास्थ्यमन्त्री जो फाहलां हवाइ यात्राय् प्रतिबन्ध यायेगुलि थीथी देशय् ल्ह्वंगु पला ‘गलत’ खः धका निन्दा याउगु दु।

जर्मनीइ समाजवादी पार्टीया नेता अलफ स्कोल्ज न्हूम्ह चान्सलर जुइगु निश्चित जूगु दु ।

वंगु सेप्टेम्बरय् जूगु आम निर्वाचनय् छुं नं पार्टीैं बहुमत हयेमफयेधुंका सत्ता हस्तान्तरणय् लिबानाच्वंगु इलय् स्कोल्जं बहुमतया नितिं आवश्यक ल्याः मुंका सरकारया  नेतृत्वया नितिं दाबी पेश यानादीगु खः ।

आःया छुं वालय् जर्मन संसदं बहुमत सिद्ध याना स्कोल्जं एंजेला मर्केल कार्यकालया  अन्त्य यानादी । स्कोल्जयात फेडरल डेमोक्रेटिक व ग्रीन पार्टीं समर्थन याइगु जूगु दु ।

जर्मनीलिसें मुक्कं युरोप हाकनं कोरोनाया  भुमरिइ तक्यंगु इलय् सत्ता कःघायेत थ्यंकादीम्ह स्कोल्ज व सहयात्री दलतयेसं घरेलु समस्या, युरोपेली युनियनया भूमिका व विश्व सम्बन्धया खँय् मंका ज्याझ्व नं सार्वजनिक याःगु दु  ।