Display Style:
Column Style
अफगानिस्तानय् तालिवानं न्ह्याकल छेँखाय् छेँखाय् तलासी
गुंलाथ्व त्रयोदशी ११४१, भाद्र ४ शुक्रवाः
अफगानिस्तानय् सत्ता नियन्त्रणय् काःपिं तालिवान विद्रोहीतय्सं पूर्ववर्ती सरकार व नेटो गठबन्धनलिसे ज्या याःपिं मनूतयेत मालेगु न्ह्याकुगु दु ।
छेँखाय् छँेखाय् थ्यंका उमिसं लिपांगु २० दँ दुने नेटो व पूर्ववर्ती सरकारलिसे ज्या याःपिं मनूतयेत मालेगु न्ह्याकुगु खः । विद्रोहीतय्सं छेँखाय् छेँखाय् वना ख्याच्व बिइगु याःगु दाबी थी थी गैरसरकारी संस्थातयेसं याःगु दु ।
राष्ट्रसंघया नितिं ज्या याइगु नर्वेजियन सेन्टर फर ग्लोबल एनालाइसिस लिसेया आइएनजीओतयेसं थ्वयान्ह्यःया संस्थापन व नेटोया सहयात्रीतयेत थुकथं ख्याच्वः वःगु दाबी याःगु खः ।
तालिवानं मालाच्वंगु अज्यापिं मनूत तःधंगु ल्याःखय् दूगु व उपिं ग्याचिकुइ जीवन हनेत बाध्य जूगु दाबी मेगु संस्था क्रिश्चियन नेलमनं याःगु दु । उमिसं आत्मसमर्पण मयाःसा उमित ज्वना कारवाही यायेगु ख्याच्वः तालिवानं बिउगु दाबी याःगु दु ।
अज्यापिं ग्वहालिमितयेत मंका मृत्युदण्डया सजाय जुइफइगु ख्याच्वः नं उपिं संस्थातयेसं बिउगु दु । तालिवानं सत्ता कःघायेगु कुतः यानाच्वंगु इलय् उपि विरुद्ध छुं शहरय् ब्वज्या नं जूगु दु । राजधानी काबुलय् राष्ट्रिय ध्वाँय् ज्वना ब्वज्या जूगु दुसा मेगु शहर असावादय् नं अज्यागु हे ब्वज्या जुयाच्वंगु दु ।
थ्वहे दथुइ, छुं दिं न्ह्य अमेरिकी सैनिक विमानं कुतुंवंपिं मध्ये छम्ह अफगानिस्तानया राष्ट्रिय फुटबल टीमया कासामि जूगु खुलासा जूगु दु ।
अमेरिकी नागरिकया उद्धार क्वमचातले सेना च्वनिगु राष्ट्रपति बाइडेनया धापू
गुंलाथ्व द्धादशी ११४१, भाद्र ३ बिहीवाः
अमेरिकी राष्ट्रपति जो बाइडेनं अमेरिकी सेना अफगानिस्तानं लिहाँवइगु ई सीमा सिवें अप्वः च्वने फइगु धयादीगु दु ।
थ्वहे अगस्ट महिनाया अन्त तक्क अफगानिस्तानं फुक्क सेना लितकायेगु पक्षय् राष्ट्रपति बाइडेन जुइधुंका अफगानिस्तानय् दूपिं थ्यंमथ्यं १५द्वःम्ह अमेरिकी नागरिकत अलपत्र जुइगु अवस्था वयेधुंका सेनाया बसाई ताहाक जुइफइगु खनेदूगु खः ।
एबीसी न्युजलिसेया खँल्हाबल्हास राष्ट्रपति बाइडेनं काबुल विमानस्थलय् ४५सःम्ह अमेरिकी सैनिक तैनाथ दूसा नं तालिवान लडाकुतयेसं विमानस्थल प्रवेशया मू विन्दुइ घेरा तःगुलिं नागरिकतयेत उद्धार यायेत थाकुयाच्वंगु धयादील । पश्चिमा देय्तयेसं अफगानिस्तानय् दूपिं थः नागरिक व उमिगु निंतिं ज्या यानाच्वंपिं विदेशीतयेत अनपाखें पिकायेगु कुतः यानाच्वंगु दु ।
आः अमेरिकी सैनिकत विमानस्थलं पिने अलपत्र जूगु थः नागरिकत मालेगु अवस्थाय् मदूगु खँ अमेरिकी रक्षामन्त्री लिलोइड अस्टिनं नालादीगु दु । राष्ट्रपति बाइडेनं अगष्ट ३१ तक्क नं फुक्क अमेरिकी नागरिकयात उद्धार याये मफइगु अवस्थाय् सेनाया बसाई ताहाक जुइगु धयादील ।
१० द्वः निसें १५द्वःम्ह अमेरिकी व उमिगु नितिं थी थी ग्वहालि चूलाकुपिं ५०द्वः निसें ६५द्वःम्ह अफगान नागरिकयात पिकायेमाःगु कर्तव्य दूगु नं वाइडेनया धापू दु । काबुलं थ्यंमथ्यं ५ द्वःम्हसित पिकायेधुंकुगु व न्हिं ९ द्वःम्हसित उद्धार यायेमाःगु अवस्था दूगु पेन्टागनं धाःगु दु ।
छुं दिं न्ह्यः ब्वयाच्वंगु अमेरिकी सैनिक विमानं अफगानीत कुतुंवंगु विषयलय् स्पष्ट जुइ मफूगु धका राष्ट्रपति बाइडेनं उद्धारया झ्वलय् अराजकता जूगु धइगु द्वपं नं अस्वीकार यानादील ।
राष्ट्रपति असरफ घानी युएइलय्
लहानान्युज | गुंलाथ्व द्धादशी ११४१, भाद्र ३ बिहीवाः
विद्रोही तालिबानं अफगानिस्तान कब्जा यायेवं देश त्वतुम्ह राष्ट्रपति असरफ घानीं संयुक्त अरब इमिरेट्स (युएई)य् शरण कागु दु।
युएईया परराष्ट्र मन्त्रीं घानी व वयागु परिवारया सदस्यपिन्त मानवीय दृष्टिं थःगु देशय् लसकुस यानागु धका धागु दु। तालिबान लडाकुपिन्स राजधानी काबुल प्रवेश यायेवं वंगु आइतबाः घानीं त्वतुगु खः।
शुरु ताजिकिस्तान वंगु बुखँ सार्वजनिक जुगु खः । वया लिपा राष्ट्रपति घानी, वया जहान,सेना प्रमुख व राष्ट्रिय सुरक्षा सलाहकार उज्बेकिस्तानया राजधानी ताशकन्द वंगु व्यक्तिगत सुरक्षा गार्डयात उद्धृत यार्से अल–जजीरां समाचार सार्वजनिक यागु खः। ७२ दँ दुम्ह घानीं थः याकन हे अफगानिस्तान लिहावनेत छलफल यानाच्वनागु दु धका अन्तर्राष्ट्रिय समाचार एजेन्सीपिन्त धागु दु ।
कताय् निर्वासनय् दूम्ह तालिवानका शिर्ष नेता अफ्गानिस्तान लिहाँवल
गुंलाथ्व एकादशी ११४१, भाद्र २ गते बुधबाः
कतारय् निर्वासनय् दूम्ह तालिवानया शिर्ष नेता मुल्लाह अब्दुल घानी बरादर अफ्गानिस्तान लिहाँवःगु दु ।
वयेक तालिवान पुचःया सह–संस्थापक खः । कतारय् दीम्ह वयेकलं तालिवानया पाखें अन्तराष्ट्रिय समुदायलिसे मदिक्क वार्ता याःगु खः । अमेरिकी व मेपिं विदेशी सेना अफ्गानिस्तानं लितछ्वयेत जूगु वार्ताया नेतृत्व वयेकलं हे यानादीगु खः ।
कतारया हमाम अन्तराष्ट्रिय विमानस्थलं ब्वःम्ह बरादर अफ्गानिस्तानया कान्दाहार विमानस्थलय् अवतरण याःबलय् द्वलंंद्वःम्ह जनतां वयेकया लसकुस याःगु खः । बरादर २० दँ लिपा अफ्गानिस्तान लिहाँवःगु खः ।
११दँ न्ह्यः वयेकयात अफ्गानिस्तानलिसेया सिमा लिक्कसं दूगु पाकिस्तानी गाँमय् पाकिस्तानी सेनां ज्वंगु खः । सन् २००१ तक्क अफ्गानिस्तनय् तालिवानं शासन याःबलय् मुल्लाह बरादर सरकारया महत्वपूर्ण दुजः जुयादीगु खः ।
न्यूजिल्याण्डय् छम्हेसित संक्रमण जुइवं लकडाउन यात
गुंलाथ्व दशमी ११४१, भाद्र १ मंगलवाः
न्युजिल्याण्डय् लिपांगु खुलाय् न्हापांखुसी छम्ह मनु कोरोना संक्रमण खनेदेवं राष्ट्रव्यापी लकडाउनया घोषणा याःगु दु ।
न्युजिल्याण्डं कोरोना संक्रमित खनेदेवं अकल्याण्ड सहरय् छवाःया नितिं लकडाउन याःगु खः । देय्या मेमेगु थासय् धाःसा स्वन्हू जनक लकडाउन याःगु दु ।
न्युजिल्याण्डया अधिकारीतयसं आः खनेदूगु कोरोना संक्रमण डेल्टा भेरियन्टया हे खः धासें सुरक्षा सतर्कता अप्वेकूगु धाःगु दु । आः न्युजिल्याण्डय् थ्यंमथ्यं २०गू प्रतिशत नागरिकतय्सं कोरोना भाइरसविरुद्धया खोप कायेधुंकूगु दु ।
न्युजिल्याण्डय् खनेदुम्ह संक्रमित थ्यंगु थाय् मान्डेल सहरय् छवा लकडाउन याःगु दु । न्युजिल्याण्डया प्रधानमन्त्री ज्यासिन्डा अर्डनं लकडाउन ईलय् अत्यावश्यकबाहेक दक्वः सेवा बन्द जुइगु धाःगु दु ।
न्युजिल्याण्ड कोरोना संक्रमणयात कजय् कायेत ताःलागु देय्कथं कयावयाच्वंगु दु ।
