Display Style:
Column Style
अफगानिस्तानया मस्जिदय् बिस्फोटय् लाना सीपिनिगु ल्याः ४०म्ह थ्यन
कौलाथ्व एकादशी ११४१, शनिबाः
अफगानिस्तानय् मस्जिदय् जूगु बिस्फोटय् लाना सीपिनि ल्याः ४०म्ह थ्यंगु दु ।
दक्षिणी अफगानिस्तानया कान्दाहार सहरया छगू शिया मस्जिदय् प्रार्थना जुयाच्वंगु इलय् म्हिगः बिस्फोट जूगु खः । बिस्फोटय् लाना आपालं मनू घाःपाः जूगु बीबीसीं न्ह्यथंगु दु । घाःपाः जूपिनि अवस्था तच्वगुलिं सीपिनि ल्याः अझं अप्वये फइगु धाःगु दु ।
बिस्फोट कान्दाहारया इमाम बारगाह मस्जिदय् जूगु खः । बिस्फोटया भाला इस्लामिक स्टेट (आईएसं) काःगु दु । विष्फोट लिपा तालिवान सरकारया गृह मन्त्रालयया प्रवक्ता कारी सइद खोस्तीं ट्वीट याना घटनाय् दुथ्यापिनि मालेज्या जुयाच्वंगु धाःगु दु ।
वयेकया कथं क्षतिया थप विवरण संकलन जुयाच्वंगु दु । रोयटर्सया कथं ३म्ह आत्मघाती आक्रमणकारीं उगु बिस्फोट याःगु खः । घाःपाः जूपिन्त अस्पताल यंकुगु दु । अफगानिस्तानया उत्तरी सहर कुन्दुजया छगू मस्जिदय् बिस्फोट जूगु छवालिपा कान्दाहारय् बिस्फोट जूगु खः ।
उगु बिस्फोटया नं भाला आइएसं काःगु खः । इस्लामिक स्टेटया सुन्नी मुस्लिम लडाकुतेसं वंगु दिंलय् नं तक्वःमछि शियातयेत ताके याना बिस्फोट याःगु खः ।
बेलायतया सांसद डेभिड एम्सयात छुरा सुया स्यात
कौलाथ्व एकादशी ११४१, शनिबाः
बेलायतया सांसद डेभिड एम्सयात स्यागु दु । पूर्वी इङ्ल्याण्डया छगू चर्चया मुँज्याय् दुथ्यागु इलय् छुरां सुया एम्सयात स्यागु बीबीसीं न्ह्यथंगु दु ।
प्रहरीं घटनाय् दुथ्यागु आंशकाय् २५दँया छम्ह ल्याम्हयात नियन्त्रणय् काःगु न्ह्यथंगु दु । वेलफेयर मेथोडिस्ट चर्च स्थानीयतयेलिसे सहलह यानाच्वंगु अवस्थाय् सांसद एम्सयात हताः जूगु बुखँय् न्ह्यथनातःगु दु ।
हताःलय् तच्वकं घाःपाः जूम्ह एम्स वासः यायेगु झ्वलय् मदूगु धाःगु दु । एम्सयात आतंकवादीतयेसं हताः याःगु अनया सरकारं न्ह्यथंगु दु । प्रहरीं घटनाया खँय् थप अनुसन्धान जुयाच्वंगु जानकारी बिउगु दु । हरेक लाया न्हापांगु व ३गूगु शुक्रबाः थः मतदातालिसे नियमित अन्तरक्रिया याइम्ह सांसद एम्सयात योजनावद्ध रुपय् हताः जूगु प्रहरीया दावी दु ।
बेलायतया प्रधानमन्त्री बोरिस जनसनं घटनाप्रति दुःख प्वंका दोषीयात कारवाही यायेगु प्रतिवद्धता न्ह्यथनातःगु दु । वयेकलं आतंकवादविरुद्ध हाकनं छधि जुइमाःगु ई वःगु नं धयादील ।
एम्स सन् १९९७ निसें साउथेन्ड वेस्टया नितिं सांसद निर्वाचित जुयादीगु खः । सन् २०१६ य् नं लेबर पार्टीया सांसद जो कोक्सयात उत्तरी इंग्ल्याण्डया निर्वाचन क्षेत्रय् गोलीं कयेका स्यागु खः ।
लेबनानय् म्हमस्युगु पुचःलं कयेकुगु गोलीं लाना ६ म्ह सीत
कौलाथ्व दशमी, ११४१, शुक्रबाः
लेबनानया राजधानी बेरुतय् गोलीं कयेकुबलय् ६ म्ह सीगु दु ।
घटनाय् ३२म्ह सिवें अप्वः घाःपाः जूगु बीबीसीं न्ह्यथंगु दु । थगुने जूगु विस्फोटया छानविन याइपिं न्यायाधीशतये विरोधया झ्वलय् उगु विस्फोट याःगु खः । शिया मुसमां पुचः हिज्बुल्लाह व अमलं थगुने शहया तःधंगु बन्दरगाहलय् याःगु श्रृंखलावद्ध विस्फोटया छानविनया नितिं सरकारं दयेकुगु समितिया विरोधय् आन्दोलन याःगु दु ।
आन्दोलनकारीं छानविन समितिइ दूपिं दुजःत स्वतन्त्र मजूगु धका ब्वज्या याःगु बुँखय् न्ह्यथनातःगु दु । विरोधया झ्वलय् लेबनान फोर्सेस (एलएफं) भीडय् गोलीं कयेकुगुया प्रत्यक्षदर्शीयात उध्रित यासें अन्तर्राष्ट्रिय समाचार संस्थातयेसं न्ह्यथंगु दु ।
तर एलएफं धाःसा उगु द्वपनय् सत्यता मदूगु दावी याःगु दु । थगुनेया अगस्टय् जूगु विस्फोटय् २सः व १९म्ह सीगु खः । विस्फोट धुंका प्रधानमन्त्री नजिब मिकाटीं लेबनानय् जूगु हिंसाया छानविन जुइगु धयादीगु दु ।
थः हे पासायात स्यागु द्वपनय् करोडपति रोबर्ट डस्र्टयात जन्मकैदया सजाय
कौलाथ्व दशमी, ११४१, शुक्रबाः
थः हे पासायात स्यागु द्वप लाम्ह अमेरिकी रियल स्टेट व्यवसायी लिसें करोडपति रोबर्ट डस्र्टयात जन्मकैदया सजाय न्यंकुगु दु ।
अमेरिकाया लस एन्जेलसस्थित छगू उच्च अदालतं डस्र्टयात थः पासायात स्यागु प्रमाणित जुइधुंका जन्मकैदया सजाय न्यंकुगु खः । डस्र्टं सुसान बर्मनया छँय्नये गोलीं कयेका स्यागु प्रमाणित जूगु खः ।
थः तिरि बेपत्ता जूगु विषयलय् बर्मनं प्रहरीात जानकारी बिइगु ग्याचिकुं वयेकयात स्यानागु धका डस्र्टं नालाकाःगु दु । छँय्नये गोलीं लाःगु अवस्थाय् बर्मनया सीम्ह वयेकया हे निवासय् लुइधुंका अनुसन्धान न्ह्याकुगु खः ।
उगु हे झ्वलय् हत्या अभियोगय् डस्र्टयात अमेरिकाया न्यू ओर्लियन्सं ज्वंगु खः । ७८ दँया डस्र्टयात जन्मकैदया सजाय जुइधुंका बर्मनया छेँजःलं राहत महशुष याःगु दु । अपराध सम्बन्धि च्वमि बर्मन डस्र्टया प्रवक्ता खः ।
डस्र्ट अमेरिकी करोडपतिया धलःखय् लाम्ह मनू खः ।
कोरोना महामारीया कारण सीकेगु ह्वःताः दुगु डब्लुएचओया धापू
कौलाथ्व नवमी ११४१, असोज २८ विहीबाः
विश्व स्वास्थ्य संगठन डब्ुलएचओं कोरोना महामारीया कारण सीकेगु लिपांगु ह्वःताः दुगु धाःगु दु ।
डब्ुलएचओं थौंकन्हय् तिनि गठन याःगु २६ दुजःया विज्ञ पुचःया लागिं कोरोनाया उत्पति सीकेगु लिपांगु ह्वःताः जुइगु न्ह्यथंगु खः । डब्ुलएचओं थगुनेनिसें हे चीनया वुहान सहरं न्ह्याःगु कोरोना महामारीया कारणबारे अध्ययन यानाच्वनागु न्ह्यथंगु दु ।
डब्लुएचओलिसें थीथी संस्थां कोरोना भाइरस उत्पतिया कारणबारे ताः इलंनिसें अध्ययनया कुतः न्ह्यानाच्वंसां चीनं माक्व ग्वहालि मयाःगु द्वपं बियावःगु दु ।
वुहान सहरं कोरोना न्यंगु पुष्टि जूसां उकिया कारण धाःसा अझं अस्पष्ट तिनि । गुलिसिनं वुहानय् दुगु प्रयोगशालां कोरोनाया जिवाणु मनुखय् पुंगु न्ह्यथंसां उकिया आधिकारीक पुष्टि जुइमफुनि ।
वंगु फेब्रुअरीइ डब्लुएचओया टोली चीन वंसां सरकारं माक्व ग्वाहालि मयाःगुलिं बिचाः यानाकथं अनुसन्धान यायेमफूगु न्ह्यथंगु दु । डब्लुएचओया महानिर्देशक डा टेड्रोस अधानोम गेब्रेयससं चीनं माक्व ग्वहालि मयाःबलय् अनुसन्धानय् पंगः जूगु धयादिल ।
डब्लुएचओं चीनय् कोरोना भाइरसबाहेक मेगु तःधंगु जोखिमं जाःगु ल्वय्या बारेय् नं अनुसन्धान यायेगु न्ह्यथंगु दु । चीनं ग्वहालि याःसा कोरोनाया उत्पति बारे अध्ययन यायेगु तःधंगु ह्वःता चूलाइगु डब्लुएचओया ठहर दु ।
