नाइजेरिया व साउदी अरबय् कोभिड–१९ या न्हुगु भेरियन्ट ‘ओमिक्रोन’ खनेदुगु दु।

थ्व नाप आःतक २२ देशय् ओमिक्रोन भेरियन्ट फैलै जुइ धुकुगु दु। बुधबाः नाइजेरियाय् रोग नियन्त्रण केन्द्रं निम्हेसित ओमिक्रोन संक्रमण पुष्टि जुगु जानकारी बिउगु दु।

संक्रमित निम्ह वंगु दक्षिण अफ्रिकापाखे वःपि यात्रुपि खः धका केन्द्रं धाउगु दु। अथेहे साउदी अरबय् न छम्हेसित कोभिड–१९ या न्हुगु भेरियन्ट ‘ओमिक्रोन’ खनेदुगु दु। दक्षिण कोरियाय् न ओमिक्रोनया संक्रमित पिहावंगु दु। अनयागु रोग नियन्त्रण तथा रोकथाम एजेन्सीया कथं नाइजेरियापाखे दक्षिण कोरिया वःम्ह निम्हतिपूयाके ओमिक्रोन खनेदुगु खः।

अथेहे थीथी सञ्चारमाध्यमया कथं न्हुगु भेरियन्ट फैलै जुगु देय् मध्ये युरोपय् १२ गु थासय् फैलै जुगु दु। युरोपय् बेलायतनाप अष्ट्रिया, बेल्जियम, चेक रिपब्लिक, डेनमार्क, फ्रान्स, जर्मनी, इटली, पोर्चुगल, स्पेन व स्विडेनय् ओमिक्रोन खनेदय धुकुगु दु धका सीएनएनं धाउगु दु। बेलायतय् जक ओमिक्रोन संक्रमितपि २२ म्ह थ्यके धुकुगु दु।

टर्कीइ तःजिक्क वा वःगुलिसे धाकुफय् वयाः ४म्ह मनूत मन्त ।

दक्षिणी तट धाकुया हुनिं उगू थाय् प्रभावित जूगु दु । प्रतिघण्टा ८१गू माइलया रफ्तारय् वःगु धाकुं राजधानी इस्तानबुलनाप शहरया यक्व धइथें सडक अवरुद्ध जूगु दुसा छेँ न दुनावःगु दु ।

थ्वहेदथुइ सलंसः सवारीसाधनय् क्षति जूगु दु । थाय् थासय् सिमा ग्वःतुलाः यातायात सेवा तकं अवरुद्ध जूगु दु । आः वयाः सलंसःया ल्याखय् उद्धारकःमितय्त परिचालन याःगु दु ।

धाकुफसं प्रभावित जूपिन्त सुरक्षित थासय् यंकेगु ज्या न न्ह्याःगु दु । छुं दिंनिसें मदिक्क वा वःगुनाप धाकुफय् वयाःच्वंगुलिं सर्वसाधारण मनूतय्त सचेत जुइत इनाप याःगु दु ।

अफगानिस्तानय् तालीवानतय्सं सछिम्ह पुलांपिं सेना, प्रहरीनाप खुफिया अधिकारीतय्त स्याःगु खुलासा जूगु दु ।

छुंया ल्याखय् मनूतय्त बेपत्ता याःगु दु । मानव अधिकारया क्षेत्रय् ज्या याइगु पुचलं वंगु अगष्टय् अफगानिस्तानय् सत्ता परिवर्तन जूगु थुखय् तालिवानतय्सं सछिम्ह पुलांपिं सुरक्षाकःमितय्त स्याःगु दाबी याःगु दु ।

सत्ता कब्जा याःगुनाप पुलांपिं सेना, प्रहरी व खुफिया अधिकारीतय्त आममाफी बीगु घोषणा याःसां इमित तालिवानतय्सं स्याःगु रिपोर्टय् उल्लेख याःगु दु । वंगु अगष्ट १५ तारिखनिसें अक्टोबर ३१ दथुइ इमित स्याःगु धागु दु ।

नांगरहार प्रान्तया राजधानी जलालाबादय् ८घौतक गोलाबारी यानाः इमित स्याःगु धयातःगु दु । तालिवानतय्सं इस्लामिक स्टेट समर्थकतय्त निशाना दयेकाः आक्रमण याःगु न रिपोर्टय् उल्लेख याःगु दु ।

पुलांपिं सेना व प्रहरीतय्त स्याःगु घटनां अफगानिस्तानय् आतंक न्यंगु दु । थ्वहेदथुइ अमेरिकां अफगानिस्तानया स्यनाच्वंगु लकसयात ध्यानय् तयाः पाकिस्ताननाप नेटोय् दुथ्याःगु देय्नाप गठबन्धनया कुतः यानाच्वंगु दु ।

अमेरिकाया मिशिगन राज्यय् छगु विद्यालयय् अन्धाधुन्ध गोली प्रहार जुगुलि स्वम्ह विद्यार्थीपिनिगु ज्यान वंगु दु।

सीपि १६, १४ व १७ दँ दुपि खः। ज्यान वःपिनिगु म्हसिका खुले जुगु दु। अथेहे उगु हमलाय् छम्ह शिक्षकनाप च्याम्ह घाइते जुगु दु।

घटनाय् संलग्न जुगु आशंकाय् प्रहरीं १५ दँ दुम्ह छात्रयात ज्वंगु दु। आक्रमण छाय् व छु उद्देश्यया लागि जुगु दु धका सिइमदुनि।

दक्षिण कोरियाय् न कोभिड–१९ या न्हुगु भेरियन्ट ‘ओमिक्रोन’ पिहावंगु दु।

कोरिया रोग नियन्त्रण व रोकथाम एजेन्सी (केडिसीए)या कथं आःतक नाइजेरियापाखे दक्षिण कोरिया वःपि निम्हतिपुयाके उगु न्हुगु भेरियन्ट ओमिक्रोन खनेदुगु खः।

कोरोनाविरुद्धया खोप निगु मात्रा कायेधकुपि उपि निम्हतिपू नोभेम्बर १४ निसे २३ तारिखतक नाइजेरिया भ्रमणय् वःगु खः।

उपि निम्ह कोरिया दुहावयेव परीक्षण यागुलि ओमिक्रोन खने दुगु खः।