अफगानिस्तानया चरमपन्थी संगठन तालिबानं निगुगु तधःगु शहर कन्दाहार न थःगु कब्जाय् कागु दु।

थुगु शहर छु ई तालिबानया महत्वपूर्ण पकड दुगु शहर खः। रणनीतिक हिसाबं थुगु शहर तसकं महत्वपूर्ण खः। थुकियात अफगानिस्तानया ट्रेड हबया रुपं कायेगु याइ। अन्तर्राष्ट्रिय समाचार संस्था रोयटर्सनाप खँ ल्हासे स्थानीय सरकारया अधिकारीं धागु दु, ‘वंगु तधःगु भीडन्तय् तालिबानं कन्दाहार शहरयात नियन्त्रणय् कागु दु।’

थ्व स्वया न्ह्य बिहीबाः हेरात व घान्जी शहर न तालिबानं कब्जा काये धुकुगु दु। अथेहे अमेरिकां थःगु दूतावासया कर्मचारीपिनिगु उद्धारया लागि ३ हजार सेना अफगानिस्तान छ्वंगु दु। अथेहे बेलायतं न थपिनिगु नागरिकपिन्त देय त्वतेगु ग्वाहालिया निति अस्थायी रुपां ६ सय सैनिक छ्वयेगु निर्णय यागु खः।

अफगानिस्तान सरकारं सेना प्रमुखयात बर्खास्त यागु दु। अफगानिस्तानया प्रान्तीय राजधानीइ श्रृंखलाबद्ध रूपं तालिबान कब्जा यायेवं बुधवाः अफगान सरकारं सेना प्रमुख वली मोहम्मद अहमदजाइयात बर्खास्त यागु दु।

सेना प्रमुख वंगु जुन महिनाय् जक सेना प्रमुख नियुक्त जुगु खः। राष्ट्रपति असरफ गनीं अहमदजाइयात हटे याना हिबतुल्लाह अलिजाईयात सेना प्रमुखय् नियुक्त यागु दु धका बीबीसीं धागु दु। आःतक ३४ मध्ये ९ गु प्रान्तीय राजधानीइ नियन्त्रण याये धुकुगु तालिबानं कान्दहारयात न कब्जा यायेगु कुतः याना च्वंगु दु।

अफगानिस्तानय् २० दँ निसे अमेरिकी व मेमेगु विदेशी सेना लिहा वनेवं तालिबान समूह हाकनं सक्रियताय् वंगु खः। तालिबानविरुद्ध संघर्षरत अफगान सेनाया हौसला थकायेगु लागि राष्ट्रपति असरफ गनी बुधबाः उत्तरी शहर मजार–ए–शरीफय् छगु ¥यालीइ सहभागी जुगु खः। मजार–ए–शरीफ परम्परागत रूपं तालिबान विरोधी शहरया रुपय् म्हसिगु शहर खः।

अष्ट्रेलिया निगुगु तधःगु सहर मेलर्बनय् छवाःया लागि लकडाउन थपे यागु दु। छन्हुया दुने २० म्हेसित कोरोना संक्रमण खनेदयवं मेलबर्नय् लकडाउन थपे यायेगु निर्णय यागु दु।

यक्को हे संक्रामक माने यानातःगु डेल्टा भेरियन्टया संक्रमणं अष्ट्रेलियाय् लिपागु इलय् यक्को कोरोना संक्रमण फैलै जुगु खने दुगु खः। मेलबर्नय् थ्व स्वया न्ह्यः यागु लकडाउन बिहीबाः क्वचागु खः। तर, संक्रमण नियन्त्रणय् मवगुलि अष्ट्रेलियां लकडाउन थपे यायेगु निर्णय यागु खः।

अन कडा लकडाउनया विरोध यासे लकडाउन हटे यायेत माग याना वयाच्वंगु खः तर बुधबाः भिक्टोरियाया प्रिमियर डान एन्ड्र्युजं अगष्ट १९ तक लकडाउन जारी जुगु घोषणा यागु खः।

अष्ट्रेलियाय् आःतक ३७ हजार स्वया अप्वोसित कोरोना संक्रमित जुइ धुकुगु दु सा ९४४ म्ह सी धुकुगु दु।

तालिबान लडाकु समूहं अफगानिस्तानया मेगु प्रान्तीय राजधानी फराह सहर नियन्त्रणय् कागु दु।

अफगानिस्तानया पश्चिमी प्रान्त फराह न प्रान्तीय राजधानी फराह सहर नियन्त्रणय कयागु दु धका तालिबान समूह न दाबी यागु दु। वंगु प्यन्हु निसे तालिबानं प्रान्तीय राजधानी नियन्त्रणय् कागु थ्व न्ह्यगूगु खः। अफगानिस्तानया सुरक्षाय् अमेरिकी सेना  लिहा वःगु तसक हथाय्् चाःगु खने दु धका धागु दु।

थुजागु घटना जुइवं बाइडेनं अफगानिस्तानया लागि सङ्घर्ष यायेत अफगान नेतापिन्त छप्प छधिइ  जुइत इनाप यागु खः। तालिबानं ३४ गु प्रान्तीय राजधानी मध्ये कम्ती न न्ह्यगू नियन्त्रणय् कायेधुकुगु दु। मेमेगु सहरय् न नियन्त्रण कायेगु कुतः जुयाच्वंगु दु।