Display Style:
Column Style
म्यानमारया अभियन्तायात ज्वन
कौलागा पंचमी ११४१, कार्तिक ८ सोमवाः
म्यानमारय् बिद्यार्थी आन्दोलनया झ्वलय् चर्चाय् वःम्ह अभियन्ता को जिमीयात ज्वंगु दु ।
म्यानमारय् सन् १९८८ निसें चर्चाय् दुम्ह वय्कःयात लिपांगु इलय् सेना बिरोधी आन्दोलन तच्वयेकूगु द्वपनय् ज्वंगु खः । म्यानमारया उत्तरी दागोनय् नं वय्कःयात सेनां घेरा तयाः ज्वंगु खः ।
वय्कः च्वनाच्वंगु थासय् सेनां घेरा तयेधुंकाः ल्यूनेया ब्वं बिस्युंवनेत स्वःबलय् सेनां ज्यादती यानाः नियन्त्रणय् काःगु वय्कःया पारिवारिक श्रोतं धाःगु दु । बिद्यार्थी आन्दोलनयाि झ्वलय् वय्कः सन् २००७ निसें सन् २०१२ तक्क जेलजीवन हंम्ह अभियन्ता खः ।
लिपांगु इलय् वय्कलं म्यानमारय् सैनिक बिरुद्ध आन्दोलन तच्वयेकेत थीथी योजना दयेकूगु द्वपं सेनां ब्यूगु दु ।
लागु औषध तस्करयात अमेरिकायात जिम्मा बिइगु
कौलागा पंचमी ११४१, कार्तिक ८ सोमवाः
कोलोम्बियां कुख्यात लागु वासः तस्करीया नाइके ओटोनियलयात अमेरिका सुपुर्दगी याइगु जूगु दु ।
ओटोनियलं सन् २००३ निसें २०१४ या दथुइ ७३ मेट्रिक टन कोकिन अमेरिकाय् तस्करी याःगु द्वपं दु । कोलोम्बियाया रक्षामन्त्री डिएगो मोलानों अमेरिकाया मोस्ट वान्टेड धलखय् लाःम्ह ओटोनियलयात सुपुर्दगी यायेगु थःगु दायित्व खःगु धासें अमेरिकां तँसा कारबाही याइगु जानकारी बियादिल ।
कोलोम्बियाय् च्वनाः दंदँ न्ह्यःनिसें लागू वासः तस्करीया साम्राज्य न्ह्याकावःम्ह ओटोनियलयात आः बिशेष सुरक्षा घेरा दथुइ राजधानी बोगोटाया सैनिक अड्डाय् तयातःगु दु । वय्कःयात कोलोम्बियाया सेना व प्रहरीया मंकाः टोलीं ज्वंगु खः ।
कोलम्वियां ओटोनियलया बारे जानकारी बीम्हेसित च्यागू लख अमेरिकी डलर सिरपाः बीगु घोषणा याःगु खः । अमेरिकां वय्कःया छ्यंया मू ५० लख डलर क्वःछ्यूगु खः । कोलोम्बिायाय् च्वनाः हलिंन्य.क लागू वासः तस्करीया नेटवर्क न्ह्याकाच्वंम्ह ओटोनियलयात नियन्त्रणय् कायेमफुबलय् हलिंन्यंक लागु वासः तस्करी अप्वःगु बिश्लेषण याःगु खः ।
वय्कःया पुचलय् १८सः हतियारधारी दुजः दुगु धाःगु दु । कोलम्वियाया दक्कले घातक हतियारधारी जत्थाया रुपं ओटोनियलया पुचःयात कायेगु याः । थ्व पुचःया दुजःत अर्जेन्टिना, ब्राजिल, होन्डुरस, पेरु, स्पेन व रुसय् तकं सक्रिय दु ।
टर्कीं १०गू देय्या राजदूततयेत कूटनीतिक हैसियत चिइकल
कौलागा चर्तुथी ११४१, कात्तिक ७ आइतबा
टर्कीं नेटो आवद्ध १० गू देय्या राजदुतया कुटनीतिक संरक्षण चिइकुगु दु ।
थुगु निर्णयलिसें १० गू देय्या राजदुततयेत न्ह्याथेंज्यागु हे मुद्दाय् छानवीन लिसें कारवाही न्ह्याके दइगु जूगु दु । राष्ट्रपति रिसेप तेयप एर्दोगानं अमेरिका, जर्मनी व फ्रान्स लिसेंया १०गू देय्या राजदुततयेत ‘पर्सना नन् ग्राटा’ य् तया उमिगु कुटनीतिक हैसियत लाकाकयादीगु खः ।
थः समर्थकतयेत सम्बोधन यायेगु झ्वलय् राष्ट्रपती एर्दोगानं बिदेशी हस्तक्षेप थःपिन्त स्वीकार्य मजुइगु धयादील । उपिं देशं वंगु ४दँ निसें टर्कीया कारागारय् दूम्ह अभियन्ता ओस्मान कवलाया रिहाइया माग लिसें बक्तब्य जारी यायेधुंका राष्ट्रपति एर्दोगानं उगु निर्णय याmगु सीदूगु दु ।
कबलाया हे नेतृत्वय् राष्ट्रपतियात सत्ताच्युत यायेमाःगु माग लिसें ४दँ न्ह्यः देय्यंक बिरोध ब्वज्या जूगु खः । अमेरिका, क्यानाडा, फ्रान्स, फिनल्याण्ड, डेनमार्क, जर्मनी, नेदरल्याण्ड्स, न्युजिल्याण्ड, नर्वे व स्वीडेनया राजदुततयेसं वंगु वालय् मंका बक्तब्य जारी याना कवलाया रिहाईया माग याःगु खः ।
थ्वयान्ह्यः युरोपया फु्क्क मानव अधिकारबादी संस्थातयेसं कबाला निर्दोेष दूगु धका वयेकया रिहाई मयाःसा गम्भीर परिणाम फयेमालिगु ख्याच्वः टर्कीयात बिउगु खः ।
अमेरिकां अलकायदाया वरिष्ठ नेता स्यानागु दावी
कौलागा तृतीया ११४१, कात्तिक ६ शनिबाः
अमेरिकां अलकायदाया वरिष्ठ नेता स्यानागु दावी याःगु दु । सिरियाय् ड्रोन हताःलं अलकायदाया वरिष्ठ नेता अब्दुल हमिद अल मतार सीगु अमेरिकी सेनां न्ह्यथंगु दु ।
अमेरिकी सेनाया केन्द्रीय कमाण्डया प्रवक्ता मेजर जोर रिग्स्बीं हमिद सीगु पुष्टि यानादील । अमेरिकी सेनां दक्षिणी सिरियाय् दूगु थःपिनि चौकीइ हताः जूगु निन्हु लिपा याःगु कारवाहीलय् हमिद सीगु धाःगु दु ।
अमेरिकी सेनां अलकायदालिसे बदला कायेत हमिदयात स्यानागु दाबी नं याःगु दु । सेप्टेम्बरनिसें अमेरिकी सेनां पश्चिमी सिरियाया विद्रोही नियन्त्रित क्षेत्रय् थःगु कारवाहीयात तच्वयेकागु न्ह्यथंगु दु ।
उगु क्षेत्रय् न्ह्यागु कारवाहीलय् अलकायदाया मेम्ह नेता सलीम अबु अहमद नं सिइधुंकुगु दु । थ्वयान्ह्यः न्ह्यागु हवाई कारवाहीलय् तःधंगु ल्याःखय् विद्रोहीत सीगु अमेरिकी सेनां दाबी याःसा नं उकिया स्वतन्त्र रुपय् पुष्टि जुइ मफूगु अन्तर्राष्ट्रिय समाचार संस्थातयेसं न्ह्यथंगु दु ।
विवादास्पद नेता रिजवीया रिहाइया माग याना जूगु ब्वज्याय् २म्ह सित, आपालं घाःपाः
कौलागा तृतीया ११४१, कात्तिक ६ शनिबाः
पाकिस्तानया लाहोरय् सुरक्षाकर्मी व दषिणपन्थी पुचः दथुइ जूगु ल्वापुइ निम्ह सुरक्षाकर्मी सीगु दु ।
हिंसात्मक ल्वापुइ लाना आपालं प्रदर्शनकारी घाःपाः जूगु अन्तर्राष्ट्रिय समाचार संस्थातयेसं न्ह्यथंगु दु । कट्टरपन्थी तहरिक ए लाबियाक पाकिस्तान (टीएलपी) पार्टीया ज्यासनामिं राजधानी इस्लामावादय् ब्वज्या यायेत पिकाःगु ¥यालीइ प्रहरीं हस्तक्षेप याःबलय् उगु घटनना जूगु धाःगु दु ।
टीएलपीं बन्दी दूपिं थः नेता ज्यासनामिया रिहाइया माग याना सरकारविरुद्ध ब्वज्या याःलबय् सुरक्षाकर्मीं बल छ्यगु धाःगु दु । ब्वज्यामितयते पनेत प्रहरीं न्ह्योनेलाथें अश्रु ग्यास प्रहार याःगु आन्दोलनकारीया कुँख्यना दु ।
उगु पार्टी प्रमुख साद रिजवी लिसें थः ज्यासनामिया बिना शर्त रिहाइया माग यासे टीएलपीं राजधानी इस्लमावादय् तःधंगु ब्वज्या याःगु खः । इस्लाम धर्मया पैगम्बर मुहम्मदया व्यङ्ग्य किपाः प्रकाशित याःगु द्वपनय् थगुने फ्रान्सय् जूगु ब्वज्याय् रिजवीयात ज्वंगु खः ।
हिंसा अप्वयावनेधुंका सुरक्षा व्यवस्था तच्वयेकुगु दु । सुरक्षाकर्मीं जःखःया शहरं सर्वसाधारणयात राजधानी दुहाँवयेगुलिइ रोक तःगु दु ।
