Display Style:
Column Style
ब्रिक्स दुजः देय्तये १३क्वःगु शिखर सम्मेलन थौंनिसें भर्चुअल रुपय् जुइगु
ञंलाथ्व तृतीया ११४१, भाद्र २४ बिहीवाः
ब्राजिल, रुस, इण्डिया, चाइना व साउथ अफ्रिका दुथ्यागु ब्रिक्स देय्तये १३क्वःगु शिखर सम्मेलन थौंनिसे न्ह्यायेत्यंगु दु ।
रुसं ग्वसाःग्वइगु शिखर सम्मेलनया अध्यक्षता धाःसा भारतीय प्रधानमन्त्री नरेन्द्र मोदीं यानादीगु त्यंगु सम्मेलनय् दुजः देय्तये फुक्क राष्ट्राध्यक्ष दुथ्याइगु जूगु दु । अफगानिस्तानय् तालिवानं नियन्त्रण कायेधुंका जुइत्यंगु थुगु सम्मेलनय् अफगानिस्तानया अवस्था, क्षेत्रीय विषयत लिसें दुजः देयेतये दथुया एजेण्डाय् सहलह जुइगु न्ह्यथंगु दु ।
सैन्य प्रणालीइ सुधार, प्रति आतंकवाद, विकास लक्ष्य प्राप्तिया नितिं प्रविधिया विकास व छ्यलाबुला थप जनस्तरया स्वापू विस्तार लिसेंया विषयलय् नं सहलह जुइगु धाःगु दु ।
अथेहे कोभिडं अर्थतन्त्रय् लाकुगु लिच्वःया खँ नं सहलहया मेगु विषय जुइगु धाःगु दु । भर्चुअल मुँज्याया ग्वसाःखलः धाःसा रुस जूगु दु ।
अफगानिस्तानय् तालिवानं इस्लामिक इमिरेट घोषणा यात
ञंलाथ्व द्धितीया ११४१, भाद्र २३ बुधवाः
अफगानिस्तानय् तालिवानं अन्तरिम सरकार गठन याना देय्यात इस्लामिक इमिरेट घोषणा याःगु दु ।
तालीवानया संस्थापक नेता मुल्ला मोहम्मद हसन अखुन्दजादाया नेतृत्वय् अन्तरिम सरकार दयेका देय्यात इस्लामिक इमिरेट घोषणा याःगु खः । मुल्ला गनी बरादर व मुल्ला अबदस सलाम उपप्रधानमन्त्री जूगु दु ।
रक्षामन्त्रीया भालाय् मुल्ला याकुब वःगु दुसा सिराजुद्दिन हक्कानी गृहमन्त्री जूगु दु । सरकार प्रमुख अखुन्दजादा संयुक्त राष्ट्रसंघया हाकुगु धलःखय् दूम्ह मनू खःसा आन्तरिक मामिला मन्त्रीया भाला बिउम्ह हक्कानी अमेरिकाया फेडरल ब्युरो अफ इन्भेष्टिगेसन एफबीआइं मालाच्वंम्ह मनू खः ।
१७म्ह दुजःया अन्तरिम सरकारया अप्वः धैथें मन्त्रीत वंगु २० दँ निसें अमेरिकी सेनायात जूगु हताःलय् दुथ्यागु थी थी सशस्त्र पुचःया नाइकेत जूगु दु । सुं नं मिसायात सरकारय् दुथ्याकुगु मदु । सरकार प्रमुख अखुन्दं देशय् इस्लामिक कानुन लागु यायेत फुक्क मन्त्रीतयेत निर्देशन बिइधुंकुगु दु ।
अमेरिकी नेतृत्वया गठबन्धन सेनाया बहिर्गमन प्रक्रिया न्ह्यागु लिसें अगस्ट १५य् तालिबानं देय्या फुक्क धैथें प्रान्त लिसें राजधानी काबुल थःगु नियन्त्रणय् काःगु खः । अफगानिस्तानय् थःगु युद्ध क्वचागु न्ह्यथंगु २४ घौ दुने हे तालिवान पुचःलं अन्तरिम सरकारया नेतृत्व ल्यःगु खः ।
इन्डोनेशियाया कारागारय् मिं च्याबलय् ४०म्ह कैदीबन्दी सीत
ञंलाथ्व द्धितीया ११४१, भाद्र २३ बुधवाः
इन्डोनेशियाया छगू कारागारय् मिं च्याबलय् ४०म्ह कैदीबन्दी सीगु दु ।
इन्डोनेशियाया बैंटन प्रान्तय् दूगु कारागारय् मिं च्याबलय् ५०म्ह सिवें आपा कैदीत घाःपाः जुगु दु । सुथय्सिया इलय् अप्वः धैथें कैदीत द्ययनाच्वंगु अवस्थाय् मिं च्याबलय् कैदीबन्दीतय्सं तसकं सः थ्वयेका ग्वहालि फ्वंगु खः ।
मिं च्याना जेलय् दूपिं अप्वः धैथें कैदी बन्दीतय्त मिं पूगु न्ह्यथंगु दु । मिं नःगुया हुनिंया बारेय् अनुसन्धान जुयाच्वंगु धाःगु दु ।
मेक्सिकोय् ७.० रेक्टर स्केलया भुखाय् ब्बल
लहनान्युज | ञंलाथ्व द्धितीया ११४१, भाद्र २३ बुधवाः
मेक्सिकोय् वंगु चान्ह्य ७.० रेक्टर स्केलया भुखाय् ब्बःगु दु।
उगु भुखाचं गुलि क्षति जुगु धका सिइमदुनि। मेक्सिकोया दक्षिण पश्चिम एकापुल्को समुद्री तटीय क्षेत्रय् वंगु शक्तिशाली भुखाय्या कारण मेक्सिको सिटीया भवन तसकं सकूगु दु धका धाउगु दु।
यूएस जिअलजिकल सर्भे (यूएसजीएस) नं एकापुल्को गुएरेरोको ११ माइल (१७.७किमी) उत्तरपूर्वय् ७.० म्याग्निट्यडया भुखाय् ब्बःगु धका धाउगु दु।
तालिवानं नियन्त्रणय् काःगु धाःगु पञ्जशीरय् हाकनं ल्वापू
गुंलागा चतुर्दशी ११४१, भाद्र २२ मंगलबाः
तालिबानं पूवंक नियन्त्रण काःगु धका दाबी याःगु अफगानिस्तानया पञ्जशीर उपत्यकाय् वंगु चान्हय् ंसंघर्ष तच्वगु बुखँ दु ।
वंगु चान्हय् सैन्य विमातयेसं तालिवानया अखडाय् हताः याःगु व आपालं लडाकुत सीगु दाबी याःगु खः । म्हिगः तालिवानं पञ्जशीरया प्रान्तीय गभर्नरया ज्याकुथिइ ध्वाँय् ब्वयेका उगु प्रान्त नं पूवंक थःगु नियन्त्रणय् वःगु घोषणा याःगु खः ।
उखे, तालिबान विरुद्ध पञ्जशीर क्षेत्रय् ल्वानाच्वंगु नर्दन एलायन्स धाइगु नेशनल रेसिस्टेन्स फ्रन्टं थःगु हार अस्वीकार याःगु दु । एनआरएफया लडाकुतयेसं अझं नं रणनीकि रुपय् महत्वपूर्ण क्षेत्रय् थःगु उपस्थिति दूगु धका युद्ध न्ह्यानाच्वंगु धाःगु दु ।
एनआरएफया नेता अहमद मसूदया अडियो हसना सामाजिक सञ्जालं सार्वजनिक यासें तालिवान विरुद्ध देय्यंकपाखें प्रतिरोध यायेत आह्वान याःगु दु । मसुदं तालिवानयात मान्यता बिउगु धका अन्तर्राष्ट्रिय समुदायया नं कुँख्यंगु दु ।
पहाडी उपत्यका पन्जशिरय् छगू लख ५० द्वः निसें निगू लख मनतये बसोबास दु ।
