अफगानिस्तानया काबुल विमानस्थलय् अझ न झीद्धः न मल्याक नागरिकपि उद्धारया लागि पियाच्वंगु दनिइ।

विमानस्थलया मुनाच्वपिन्त सुरक्षित रुपं उद्धार यायेगु कुतः जुयाच्वंगु दु धका अमेरिकां धागु दु। अमेरिकी अधिकारी मेजर जनरल हेक टेलरं उद्धारया लागि पियाच्वंपिन्त सुरक्षित रुपं अन पित हयेगु निति थपिन्स कुतः यानाच्वनागु दु धका धागु दु।

अमेरिकाया रक्षा मन्त्रालयं गुलिफु उलि याकन काबुल विमानस्थलय् च्वपिन्त उद्धार यायेगु जुइ धका धागु दु। अमेरिकां अगस्ट ३१ तारिख तक उद्धार अभियान सञ्चालन याये दइ।

अमेरिका व बेलायतं अफगानिस्तानया काबुल विमानस्थलय् सुरक्षाया जोखिम अप्वोया वंगु दु धका धागु दु।

उमिसं सुरक्षाया खतरा दुगु धासे विमानस्थलपाखे तापाक च्वना विमानस्थलपाखे यात्रा मयायेत धागु दु धका बीबीसीं जानकारी बिगु दु। काबुल विमानस्थलय् द्धलद्ध नागरिक उद्धारया लागि पियाच्वंगु दुगु इलय् निगु देशं सुरक्षा चुनौती सम्बन्धी चेतावनी पिकागु खः।

अमेरिका व बेलायतं सुरक्षा चुनौतीबारे छु न थप जानकारी बिगु मदुनि। थ्व स्वया न्ह्यः अमेरिकां अफगानिस्तानय् दुपि इस्लामिक स्टेट आइएसका कारण सुरक्षाया चुनौती अप्वोया वंगु दु धका धागु दु।

काबुलपाखे आःतक ८२ हजार स्वया अप्वोसित उद्धार याये धुकुगु दु।

जी सेभेन बैठकय् अफगानिस्तान इस्लामिक स्टेटा जोखिम नाप उद्धारया ज्या बारे छलफल जूगु दु।

जी सेभेनय् आवद्ध देशपि दथुइ अफगानिस्तानया सुरक्षा मामिला व उद्धारया ज्याबारे छलफल जूगु दु। अमेरिका नाप क्यानडा, फ्रान्स, जर्मनी, इटली, जापान, बेलायत सम्मिलित जी सेभेन समूहया शीर्ष नेतापि दथुइ भर्चुअल बैठकय् अफगान सुरक्षा मामिलायात केन्द्रय् तया छलफल जूगु दु धका बीबीसीं धागु दु।

स्थानीय इस्लामिक स्टेटया भातृ सङ्गठनपाखे जोखिम अप्वोगु व अफगानिस्तान त्वते चाहे जूपिन्स उद्धारया लागि लिबाके मज्यू धका नेतापिन्स बःबिगु दु। अमेरिकी राष्ट्रपति जो बाइडनं अफगानिस्तानय् जूयाच्वंगु उद्धारया ज्या याकन सिधेकामाः धका बःबिगु दु।

झीन्हु न्ह्यः तालिबानया कब्जाय् काबुलपाखे कम्ती न ७० हजार मनूतयेत उद्धार यागु दु। बैठकय् बेलायतया प्रधानमन्त्री बोरिस जोनसनं न लिपागु ईलय तक उद्धारया ज्या यायेमा धका बःबिगु दु।

विश्व बैंकं अफगानिस्तानय् परियोजनाया लागि बियावयाच्वंगु अनुदान रोक्का यागु दु।

अफगानिस्तानय् तालिबानं नियन्त्रण लिपा विश्व बैंकं थ्व महत्वपूर्ण निर्णय कागु खः।  तालिबानया नियन्त्रण लिपा अफगानिस्तानय् विकास परियोजना व विशेष याना मिसापिन्त बामलागु चिच्वः लागु दु।

थ्व स्वया न्ह्यः अन्तर्राष्ट्रिय मुद्रा कोष (आईएमएफ) न भुक्तानी निलम्बन यागु खः। बाइडेन प्रशासन न अफगानिस्तान केन्द्रीय बैंकया अमेरिकाय् दुगु सम्पत्ति रोक्का यागु दु।