हाइटीइ शक्तिशाली भुखाय् ब्बया ३०४ म्ह मनू सीगु दु सा सलसं घाइते जुगु दु।

उगु थासय् प्रधानमन्त्रीं भुखाय् ब्बया यक्को क्षति जुगुलि लच्छिया निति आपतकाल घोषणा यागु दु। भुखाय ब्बया छेँ, चर्च, होटेल लगायतया संरचना दुगुं दु। स्थानीय ई कथं  शनिबाः सुथय् हाइटीइ ७.२ म्याग्निच्युटया भुखाय् ब्बगु दु।

इपिसेन्टर सेन्ट–लुइस दुसुद धइगु थासय् स्वया १२ किलोमिटर तापाक्क ब्बगु धका अमेरिकन जिओलोजिकल सर्भे न धागु दु। उगु भुखाचं करिब १२५ किलोमिटर तापाक्क धक्का नकुगु धका धागु दु।

अमेरिकी राष्ट्रपति जो बाइडनं भुखाचं प्रभावित हाइटीइ तत्काल राहत ग्वाहालि यायेत यूएसआइडीयात धागु दु।

अफगानिस्तानया चरमपन्थी संगठन तालिबानं निगुगु तधःगु शहर कन्दाहार न थःगु कब्जाय् कागु दु।

थुगु शहर छु ई तालिबानया महत्वपूर्ण पकड दुगु शहर खः। रणनीतिक हिसाबं थुगु शहर तसकं महत्वपूर्ण खः। थुकियात अफगानिस्तानया ट्रेड हबया रुपं कायेगु याइ। अन्तर्राष्ट्रिय समाचार संस्था रोयटर्सनाप खँ ल्हासे स्थानीय सरकारया अधिकारीं धागु दु, ‘वंगु तधःगु भीडन्तय् तालिबानं कन्दाहार शहरयात नियन्त्रणय् कागु दु।’

थ्व स्वया न्ह्य बिहीबाः हेरात व घान्जी शहर न तालिबानं कब्जा काये धुकुगु दु। अथेहे अमेरिकां थःगु दूतावासया कर्मचारीपिनिगु उद्धारया लागि ३ हजार सेना अफगानिस्तान छ्वंगु दु। अथेहे बेलायतं न थपिनिगु नागरिकपिन्त देय त्वतेगु ग्वाहालिया निति अस्थायी रुपां ६ सय सैनिक छ्वयेगु निर्णय यागु खः।