Display Style:
Column Style
बेलायतय् खोप काःपिंन्त हे डेल्टा भाइसर संक्रमण
लहानान्युज | दिल्लागा चतुर्दशी ११४१,साउन २३ सनिवाः
बेलायतय् कोरोनाया निगुलिं मात्रा खोप काःपिं मनूतय्के डेल्टा भाइरसया संक्रमण अप्वः जूगु खनेदुगु दु ।
डेल्टा भाइरसया संक्रमणया हुनिं अस्पताल भर्ना जूपिनिगु ल्याः अप्वया वनाच्वंगु धाःगु दु । बेलायतस्थित स्वास्थ्य विभागं कोरोनाया खोप काःपिंके नं डेल्टा भाइरसया संक्रमण तच्वकं न्यनावंगवु धासें चिन्ता नं प्वंकूगु दु ।
वंगु जुलाई १० निसें अगस्ट २ तक्कया तथ्यांक कथं डेल्टा भेरियन्टया हुनिं अस्पताल भर्ना जूपिं बिरामीमध्ये ५५ प्रतिशत कोरोनाया खोप काःपिं मनूत दुगु धाःगु दु ।
स्वास्थ्य सुरक्षा एजेन्सीया कार्यकारी प्रमुख जेनी ह्याजिजं खोपया मात्रा पूवंपिं हे अप्वः अस्पताल भर्ना जूगुलिं चिन्ता अप्वयेकूगु धयादिल । वय्कलं कोरोनाया खोपं दक्वं जोखिम म्ह्वः मजुइगु जूगुलिं स्वास्थ्य सुरक्षाया मापदण्ड पालना धाःसा अनिवार्य दुगु धयादीगु दु ।
बेलायतय् जुलाई १ निसें प्रतिबन्धत फुकुवा याःगु खः । बेलायतया दक्वं नागरिकयात पूर्ण मात्राय् खोप उपलब्ध याकेगु सरकारं थ्वयां न्ह्यः हे घोषणा यायेधुंकूगु दु ।
५७ प्रतिशत स्वयां अप्वः वयस्कतय्सं खोपया निगुलिं मात्रा पूवंकेधुंकूगु बुखँय् धयातःगु दु ।
तालिवानी आक्रमण न्ह्यानाच्वन
दिल्लागा चतुर्दशी ११४१,साउन २३ सनिवाः
लिपांगु इलय् हिंसात्मक ज्याखँ तच्वयेकूगु तालिवानी विद्रोही पुचलं दक्षिणपश्चिम अफगानिस्तानया प्रान्तिय राजधानी नियन्त्रणय् काःगु दु ।
दक्षिण पश्चिम अफगानिस्तानया निम्रोज प्रान्तिय राजधानी जन्जरा थःगु नियन्त्रणय् दुगु विद्रोहीं दावी याःगु दु । अमेरिकी सेना लिहां वंगु लिसें सशस्त्र ज्याखँयात तच्वयेकूगु तालिवानी पुचलं ग्रामीण क्षेत्रय् पकड दयेकूगुलिसें शहर केन्द्रीत आक्रमण न्ह्याकूगु अनया सरकारी अधिकारीतय्सं धाःगु दु ।
हेरात, कन्धार व लश्करलिसेंया प्रान्तिय राजधानी नं विद्रोहीं थःगु नियन्त्रणय् कायेगु कुतः यानाच्वंगु अन्तर्राष्ट्रिय समाचार संस्थातय्सं न्ह्यथंगु दु । अफगानिस्तानया लागिं संयुक्त राष्ट्रसंघीय विशेष दूत डेबोरा लियोन्सं न्हूगु चरणया युद्ध न्ह्याःगु धयादीगु दु ।
वय्कलं विनाशकारी युद्धया हुनिं वंगु महिनानिसें सर्वसाधारण सीगु अप्वयावःगु धयादिल । तालिवानीलिसेया द्वन्द्वया हुनिं लिपांगु लच्छि दुने जक अफगानिस्तानय् द्वःछि स्वयां अप्वः सीधुंकूगु दु ।
थ्व हे दथुइ, अफगानिस्तानया अवस्था नाजुक दुगु धासें थीथी राष्ट्रं थःगु कुटनीतिक नियोगया कर्मचारी स्वदेश लित सःतेगु तयारी याःगु दु । लिपांगु छुं दिं दुने सामाजिक सञ्जालय् पोष्ट याःगु लू ग्यानापूगु धासें बेलायतं नं थः नागरिकयात थःगु देशय् लित सःतेगु तयारी याःगु न्ह्यथंगु दु ।
राष्ट्रसंघीय सुरक्षा परिषदं नं अफगानिस्तानया अवस्था नाजुक दुगुलिं थः नागरिकयात थःगु देशय् लित सःतेत थीथी कुटनीतिक नियोगतय्त इनाप याःगु बीबीसीं न्ह्यथंगु दु ।
चिनिया जनतापिनिगु स्वतन्त्रता हनन जुयाच्वंगु राष्ट्रपति बाइडेन द्वपं
दिल्लागा त्रयोदशी ११४१,साउन २२ शुक्रवाः
अमेरिकी राष्ट्रपति जो बाइडेनं अमेरिका थ्यकिंंपिं हङकङया नागरिकयात अस्थायी रुपय् अमेरिका च्वने फइगु धयादीगु दु ।
चीनं हङकङया स्वतन्त्रता हनन यानाच्वंगु धका राष्ट्रपति बाइडेनं अमेरिका थ्यंकिपिं थ्यंपिं हङकङया नागरिकयात १८ला तक्क अन च्वने दइगु अनुमति बिइगु धयादीगु खः ।
थुगु प्रस्तावं थ्वयान्ह्यः हे अमेरिका थ्यंनेधुंकुपिं द्वलंद्वःम्ह हङकङया नागरिक लाभान्वित जुइ ।
थगुने चीनं हङकङय् कडा सुरक्षा कानुन लागू यायेधुंका अमेरिकां हङकङया नागरिकयात थःगु देशय् स्थायी बसोबासया नितिं लुखा चायेकुगु खः । उखे चीनं धाःसा अमेरिकाया लिपांगु निर्णयया तच्वकं कुँख्यंगु दु ।
वासिटङ डीसीस्थित चिनियाँ दूतावासया प्रवक्ता लिउ फङयों अमेरिकां चिनियाँ नीतिया अपब्याख्या व अपमान याःगु धका अमेरिकी निर्णयलं चीनया सार्वभौमिकताय् हस्तक्षेप यायेत स्वगु द्वपं बियादील ।
अफगानिस्तानय् रक्षामन्त्रीया निवासय् कारबम विष्फोट, ४म्ह सित
दिल्लागा एकादशी ११४१,साउन २० बुधवाः
अफगानिस्तानय् बिद्रोही पुचः तालिवानं रक्षा मन्त्रीया निवासय् याःगु कार बम बिस्फोटय् ४म्ह सीगु दु ।
घटनाया इलय् रक्षामन्त्री बिस्मिल्लाह खान मोहमदी धाःसा छेँय् मदूगुलिं म्वायेत ताःलागु खः । घटना लिपा रक्षामन्त्री मोहमदीया छेँजःयात सकुशल उद्धार याःगु दु । रक्षामन्त्रीया निवास लागाय् बिस्फोटक ज्वलं लिसेंया कार बिस्फोट जूगु न्ह्यथंगु दु ।
बिस्फोटं आपालं सवारी ज्वलं ध्वस्त जूगु दु । उगु हे इलय् जूगु गोलीं कयेकेज्याय् ४म्ह आक्रमणकारी नं सीगु दु । थ्वहे दथुइ संयुक्त राष्ट्रसंघ सुरक्षा परिषदं अफगानिस्तानय् न्ह्यानाच्वंगु हिंसा थथें अन्त्य यायेत आब्हान याःगु दु ।
अफगानिस्तानय् न्ह्यानाच्वंगु संघर्षया दथुइ बामय्काःपिं जनता राजधानी काबुल व लश्करगाह शहरया सतक व छेँया पल्लीइ च्वना देशय् न्ह्यानाच्वंगु ंिहंसा अन्त्य यायेत भगवानयात प्रार्थना यानाच्वंगु दु ।
उमिसं छक्वःलं थःगु छेँया पल्ली च्वना भगवानया प्रार्थना याःगु दु । अफगानिस्तानय् लिपांगु ई हताःया घटनात न्हिं न्हिं अप्वयाच्वंगु दु ।
युएईं नेपाःलिसें खुगु देय्यात तयातःगु प्रतिबन्ध चीकल
दिल्लागा एकादशी ११४१,साउन २० बुधवाः
संयुक्त अरब इमिरेट्स यूएईं कोभिड–१९ संक्र्रमणया जोखिमया हुनि नेपाः व भारत लिसेंया थी थी ६ गू देय्या यात्रुयात तःगु प्रतिबन्ध चिइकुगु दु ।
यात्रा प्रतिबन्ध चिइकुगु ६ गू देय् मध्ये नेपाः, भारत, पाकिस्तान, श्रीलंका, नाइजेरिया व युगान्डा दु । कोभिड–१९ संक्रमणया हलिंयंकया महामारीया अवस्थायात मध्यनजर यासें यूएईपाखें व यूएईइ वय् वनिगु थुपिं देय्या नितिं प्रतिबन्ध तःगु खः ।
यूएईया ‘नेशनल इमरजेन्सी एण्ड क्राइसिस म्यानेजमेन्ट अथरिटीं ट्वीटं जारी याःगु हसनाय् यात्रा प्रतिबन्ध फुकुवा जूगुलिइ कोभिड–१९ खोपया निगूगु मात्रा तःपिं वैध रूपय् आवसीय अनुमति चूलापिं विदेशीपिं नं दुथ्याइगु धाःगु दु ।
अयेसां युएइ प्रवेश याइपिन्सं कोभिड विरूद्धया निगूगु खोप काःगु १४ न्हू बिइधुंकेमाःगु प्रावधान दु । देशय् ज्या यानाच्वंपिं चिकित्सक, नर्स व खोप मकाःपिं प्राविधिक लिसेंयापिन्त धाःसा थुगु पुचःलय् तःगु मदु ।
संयुक्त राज्य अमेरिका, युरोप व अफ्रिकी देयेतयेत स्वाइगु जूगुलिं यात्रुया नितिं यूएई छगू प्रमुख पारगमन केन्द्र खः तर कोभिड महामारीया हुनिं युएई जुया यात्रा यायेत छुं ला थुखे अस्थायी रोक तःगु खः ।
